मत्ती 16:17 - जिरेल

¹⁷ थोक सिरजीन थेकी थेला “खुई ठीक सिदुक योने फुज्‍युङ शिमोन, खो थोई भाग्‍यमानीज्‍यीक ओता ईन्‍दाका। च्‍यिला सासीन दि बात खुई खोरोङगीराङ छ्या स्‍येबाते मेन, मिकी लाप्‍कीन बिन्‍दातेङ मेन। स्‍वर्गने देत्‍कान्‍ते ङे आबेकी खोल्‍ला दि बात छ्या स्‍ये च्‍युताते ईन।

मत्ती 16:17 ပူးပေါင်းရင်းမြစ်များ

लूका 22:32

तर ज्‍यीबा माकेत शिमोन। शैतानगी लुजीन खुई ङाला विश्‍वास खिता मोतोङस्‍यीत सिन ङे परमेश्‍वरला प्रार्थना खाबाप। था खोरोङ याङराङ ङे छ्य्‌वापा लै खानामेई दुरू खोरोङताङ ओताते आज्‍यो न्‍वाओनला ङाला विश्‍वास खिन देताला आँट बिन,” सिन सिदुक।

यूहन्‍ना 1:42

थेमे थेकी न्‍वातेलाङ येशू ओत्‍सादु टीकीन खेरसुङ। थेबा थेपा लेप्‍नामेई येशूकी शिमोनताङ बात खिन “खोचेन योआनेस फुज्‍युङ शिमोन ईन। थरिङमेई खुई मिन केफास ईन,” सिन सिदुक। केफास साबाते पत्रुस साबाते ईन। पत्रुस अर्थचेन दो ईन।

यूहन्‍ना 6:45

परमेश्‍वर बात खित्‍कान्‍ते मिओनगी ‘परमेश्‍वरगीराङ मि गाङेला थे खोरोङ बात लाप्‍ला तेरग्‍यो,’ सिन टिबा ओत। आबेकी साबाते बात ङेन्‍ला खि साबाच्‍योक खित्‍कान्‍ते मि जति ङे छ्य्‌वापा लै खिओ।

१ कोरिन्‍थी 15:50

थोगी आज्‍यो न्‍वावे, बात दिराङ ईन। च्‍यि सासीन दि स्‍या ठाक ओताते जीउताङचेन ङुरूङ परमेश्‍वर राज्‍यने स्‍यूक्‍पाराङ मेङेदो। थोकराङ खाला दि स्‍यिला रूल्‍ला डोच्‍येते जीउओङ नोमुङ स्‍यिला रूल्‍ला मोन्‍डोच्‍येते ओङाराङ मुथुबो।

गलाती 1:16

थे खोरोङ फुज्‍युङ सु ईन्‍दे सिन ठेत च्‍युत्‍कीन बिन्‍सुङ। थे फुज्‍युङ सु ईन्‍दे, चुक्‍ते ईन्‍दे सिरच्‍येते बात ज्‍येन ज्‍येन जातकी मिला लोप सिन परमेश्‍वरगी ङाला थोक खाबा ओतान। थोक ओङनामेई था च्‍यि खित्‍च्‍ये, चुक खित्‍च्‍ये सिन ङे सुङ मित्ताङ सल्‍लाह माला।

एफिसी 2:8

ख्‍योकोनगी थेला विश्‍वास खानामेई थे खोरोङ दयेकीकामा परमेश्‍वरगी ख्‍योकोनला पापकी सजायदुकी टालाते ईन। ख्‍योकोनगी खइँदा लेमु काम खाबेकी खित्‍सादु मेन्‍गीन थे खोरोङगी दोक खिता चालेकीकामा थेकी ख्‍योकोनला पापकी सजायदुकी टालाते ईन।

एफिसी 3:5

थे बात च्‍यि ईन्‍दे सिन परमेश्‍वरगी गोमे मि सुङलाङ छ्या स्‍ये च्‍युता मेतान। थाचेन थेकी येशू ख्रीष्‍टकी खटे खाबाते मिओन थेमे थे खोरोङ बात खित्‍कान्‍ते मिओनला थे बात च्‍यि ईन्‍दे सिन थे खोरोङ आत्‍मे छ्य्‌वापेई छ्या स्‍ये च्‍युत्‍कीन बिन्‍दा ओत।

एफिसी 6:12

च्‍यि सासीन ङुरूङ जीङा फाप्‍च्‍येते मित्ताङ मेन। ङुरूङनी दि सा नाम खाङ ओताते ल्‍हा लु, ल्‍हन्‍डीक स्‍यिन्‍डीप थेमे होदिबा च्‍योकराङ शैतानताङ डिक्‍ला दि कलि जुगला राज्‍य खित्‍कान गाङेताङ जीङच्‍येते ईन।

हिब्रू 2:14

थे खोरोङगी परमेश्‍वर फुज्‍युङ फुमु साबाते मिओन च्‍योकराङ खाईन येशूङ मि स्‍या ठाक खुराते जुनी लाकीन केसुङ। मिला स्‍यिर ज्‍युत्‍कान्‍तेला ग्‍यालालाराङ थे दोक खाईन मि जुनी लाकीन केकीन स्‍या फापाते ईन। मिला स्‍यिर ज्‍युत्‍कान्‍तेचेन शैतान ईन।

१ पत्रुस 5:1

थाचेन ङा ख्‍योकोन नाङ येशू ख्रीष्‍ट मिओनला ताकान्‍ते मिओनला बातज्‍यीक बात ङि सिरामीन। ङा ङाराङोङ ख्‍योकोन च्‍योकराङ येशू ख्रीष्‍ट मिओनला ताकान्‍ते मिज्‍यीक ईन। ख्रीष्‍टकी भोगे खाबाते दुक्‍पातेबा ङे गाङे ङाराङ मिगीराङ थोङाते ईन। था थे छ्येज्‍यीक शक्ति ङेत्‍ला ग्‍युरला ओङजीन ङाङ मान ङेत्‍ला थेत्ताङ देता ङेत्‍क्‍यो सिनोङ ङाला छ्या ओत। येशू ख्रीष्‍ट मिओनला ताकान्‍ते मिओन ख्‍योकोनगी ओर्च्‍ये दोक खि।

१ यूहन्‍ना 4:15

येशूला परमेश्‍वर फुज्‍युङ ईन सिन सिरकान्‍ते मित्ताङ परमेश्‍वर ङ्योम्‍बु देत्‍क्‍यो। थेमे होथोक्‍ते मिचेन परमेश्‍वरताङ डिक्‍ला देत्‍क्‍यो।

१ यूहन्‍ना 5:20

ङुरूङला ज्‍येनोङ बात च्‍यि छ्या ओते सासीन परमेश्‍वर फुज्‍युङगी दुरू वाकीन परमेश्‍वर सु ईन्‍दे, चुक्‍ते ईन्‍दे सिन ङुरूङला छ्या स्‍ये च्‍युत्‍सुङ। थेकी दोक खानामेई ङुरूङ सत्‍यते परमेश्‍वरताङ डिक्‍पा थुप्‍सुङ थेमे परमेश्‍वर फुज्‍युङ येशू ख्रीष्‍टताङ डिक्‍पा थुप्‍सुङ। येशू ख्रीष्‍टचेन सत्‍यते परमेश्‍वर ईन, नोमुङ मिसिन्‍च्‍येते जुनी तेरकान्‍तेङ थेराङ ईन।