हिब्रू 6:9 - जिरेल

⁹ ङिङज्‍येते आज्‍यो न्‍वावे, ङ्योकोनगी खाबाते दि बातओन थोला ख्‍योकोन ज्‍यीबा माकेत। ख्‍योकोनचेन थे काम लै मिक्‍किच्‍येते स्‍यीङ च्‍योक्‍ते मेन। थेमे ख्‍योकोन परमेश्‍वर छ्य्‌वापेई नोमुङ ठाल्‍ला मोन्‍डोओ सिन ङ्योकोनला लेमु खाला छ्या ओत। परमेश्‍वरगी ख्‍योकोनला पूरो खाला पापदुकी डेल्‍ग्‍यो।

हिब्रू 6:9 ပူးပေါင်းရင်းမြစ်များ

मर्कूस 16:16

दि बात ङेन्‍ला ङाला विश्‍वास खाला बप्‍तिस्‍मा लिन्‍कान्‍ते मिला परमेश्‍वरगी पापकी सजायदुकी डेल्‍ग्‍यो। दि बात मेङेन्‍कानताङ ङाला विश्‍वास मिक्‍किकान्‍तेलाचेन परमेश्‍वरगी पापकी सजाय तेरग्‍यो।

शक्ति काम 11:18

थेकी दि गाङे बात सानामेकी गोमा थेला ङारकान्‍ते मि गाङेराङ खाराक्‍पा देत्‍सुङ। थेमे थेबेकी परमेश्‍वरते जय जय खिनकामा “दि चुक अचम्‍बे बात ईन्‍दाका। थानी परमेश्‍वरगी ङुरूङगी च्‍योकराङ खाला ज्‍येन ज्‍येन जातकी मिकीङ नोमुङ मिसिन्‍च्‍येते जुनी ङेत्‍स्‍यीत सिन थेबाला खोपरोङ पापी दुका सिन छ्या स्‍येला परमेश्‍वर छ्य्‌वापा लै खित्‍च्‍ये मौका तेराला स्‍यूदुक,” सिन बात खासुङ।

शक्ति काम 20:21

यहूदी ईन्‍स्‍यीत, ग्रीक ईन्‍स्‍यीत ङे गाङेला ओर्च्‍ये ख्‍योकोनगी खेराङ पापी दुका सिन छ्या स्‍येला परमेश्‍वर छ्य्‌वापा लै खि थेमे प्रभु येशूला विश्‍वास खि सिन साबा ओत। ङे दोक दोक खाबा ओतान सिन ख्‍योकोन गाङेला छ्याराङ ओत।

१ कोरिन्‍थी 10:14

थोगी ङिङज्‍येते आज्‍यो न्‍वावे, ल्‍हा लु सिराते ख्‍योकोनगी माने खिताराङ मेङगो।

२ कोरिन्‍थी 12:19

ङिङज्‍येते आज्‍यो न्‍वावे, ङे थाल्‍लासाक खाबाते दि गाङे बात ङेराङ आउदी लेमु मि ईन सिराला खाबासीन सिन सितासीन मेन? ख्रीष्‍टताङ जीउज्‍यीकराङ ओङाते मि ईन्‍देकी ङ्योकोननी परमेश्‍वर दोन्‍दुराङ बात खाबाच्‍योक खाला बात खिओ। ख्‍योकोन झन लेमु खाला येशू ख्रीष्‍टकी खि साबा साबा खित्‍कान ओङस्‍यीत सिन दि गाङे बात खाबाते ईन।

२ कोरिन्‍थी 7:1

थोगी ङिङज्‍येते आज्‍यो न्‍वावे, परमेश्‍वरगी थोक थोक खिओ सिन साबाते ङुरूङ लाईदुङ ईन्‍देकी ङुरूङगी काम बात जे खित्‍जीनोङ थेला मन परे मिक्‍किच्‍येते छ्याःङ खिता मेङगो सिन ज्‍यीबा खिन थेला मान खिता फाप्‍क्‍यो। थेमे सेम खुदुक गालाते मि ईन्‍देकी ङुरूङगी लेमुते कामताङ बातकामा खिन देता फाप्‍क्‍यो।

२ कोरिन्‍थी 7:10

परमेश्‍वरगी मि सेमला फोक्‍च्‍येते काम खित्‍जीन मिकी दाक्‍पोनगी मेलेबा काम खाबाते दुका सिन छ्या स्‍येला लोक्‍ला लेमु काम खिताला स्‍यूइओ। थेमे थोक्‍ते मिकी पापकी सजाय भोगे खिता माफाबो, परमेश्‍वरगी ङाला च्‍यिला दोक खाईन सेमला फोक्‍च्‍येते काम खासुङा सिराच्‍योक खिताङ माफाबो। तर परमेश्‍वरगी थोक खित्‍जीन लोक्‍ला लेमु काम खिता साटोला परमेश्‍वरगी ङाला च्‍यिला दोक खाईन सेमला फोक्‍च्‍येते काम खासुङा सिरा च्‍योककामा खिन देत्‍कान्‍ते मिचेन पापकी सजाय ङेत्‍ला नरककुण्‍डमा स्‍यूइओ।

गलाती 5:6

च्‍यिला सासीन येशू ख्रीष्‍टताङ जीउज्‍यीकराङ ओङाते मिओनगी खतकी चिनु जोसीनोङ माजोसीनोङ छ्याःङ फरक परे मिक्‍किओ। छ्येते बातचेन थेबेकी येशू ख्रीष्‍टला विश्‍वास खाला ज्‍येनतेबालाङ ङिङज्‍ये खिकाना मिक्‍किका सिरच्‍येतेकामा ईन।

हिब्रू 10:34

जेलला लुक्‍पाते मिओनला थुप थुपला ठेत्‍च्‍येते थेमे थेबे दुक्‍पाला ताच्‍येतेङ ख्‍योकोनगी खिनराङ ओतान। खेराङगी नोमुङ सिन्‍ला तोरला मोन्‍डोच्‍येते स्‍वर्गे सम्‍पत्ति ङेता ओत सिन छ्या ओतेकी खेराङ सम्‍पत्ति ठ्वाला खेरजीनोङ ख्‍योकोन सेम मेसेता खाईन देता ओतान।

हिब्रू 10:39

तर ङुरूङचेन परमेश्‍वरला विश्‍वास खिता ताङला नरककुण्‍डमा स्‍यूक्‍कान्‍ते मि नाङ माफाबो। ङुरूङनी थेला विश्‍वास खिन देत्‍कीन थेकी पूरो खाईन पापदुकी टाल्‍गीन स्‍वर्गने देत ज्‍युत्‍च्‍येते मि नाङका फाप्‍क्‍यो।

हिब्रू 2:3

थे नियम मेङेन्‍कान्‍तेबेकीनी सजाय ङेता ओतान सासीन परमेश्‍वरगी मिओनला पापकी सजायदुकी डेल्‍ग्‍यो सिरच्‍येते दोक लेमुते बात माङेन्‍सीन ङुरूङ चुक खाला सजाय छ्य्‌वापेई थारगीतेरो? परमेश्‍वरगी मिला पापकी सजायदुकी डेल्‍च्‍येते बात गोमा प्रभु येशूकी लापाते ईन। थेमे थेकी लापाते बात थोकान्‍तेबेकी थे बात सत्‍यते ईन सिन ङुरूङला लाप्‍कीन बिन्‍दा ओत।

हिब्रू 5:9

दोक खाईन परमेश्‍वरगी खि साबाते जति पूरो खाबा ओतेकी थे खोरोङ बात ङेन्‍कान्‍तेबाला थेकी पूरो खाला पापदुकी टाल्‍ला सधैँ स्‍वर्गने देत ज्‍युत्‍क्‍यो।

हिब्रू 6:10

ख्‍योकोनगी परमेश्‍वरला थोई ङिङज्‍ये खिते सिन परमेश्‍वर सन्‍तान ज्‍येनतेबाला ङिङज्‍ये खाईन लेमु खाबाते थेमे थोरूमोङ थोकराङ खिन ओताते बातकी छ्य्‌वापेई लेमु खाला छ्या स्‍येबा थुप्‍कीदुक। ख्‍योकोनगी थोक खाबाते परमेश्‍वरला गाङे छ्या ओत। थेकी दि बात थाराङ टोक मेज्‍येदो।

१ पत्रुस 2:11

ङिङज्‍येते आज्‍यो न्‍वावे, ख्‍योकोन दुरू टिक्‍पी दिनकामा देत्‍च्‍येते ईन्‍देकी मि लुङबे मि च्‍योकराङ ईन। थोगी ओर्च्‍ये, ख्‍योकोन ङे दोक्‍ते कामताङ बात खिता मेङगो सिन छ्या ओत्‍कीन ओत्‍कीनोङ ङे दोक माक्‍याबाला ओङराङ मेङगो सिराच्‍योक खाला खेराङ सेमला लाबा लाबा खित्‍च्‍येते नोमुङ छ्याःङ माकेत।

२ पत्रुस 3:1

ङिङज्‍येते आज्‍यो न्‍वावे, दित्ताङ ङे ख्‍योकोनला टिबाते चिट्ठी ङि छाङगो। गोमे चिट्ठी च्‍योकराङ ङे दि चिट्ठीङ खेराङगी छ्या स्‍येबाते बाततेबा टोक मेज्‍येता खाला देत सिराला टिबाते ईन।

१ यूहन्‍ना 2:7

ङिङज्‍येते फिजावे, प्रभु येशूकी खि सिन कोताते ङे टिगीन ओताते दि बात ख्‍योकोनगी गोमा माथोबाते बातनी मेन। दि बात ख्‍योकोनगी थेला विश्‍वास खिता छोमुमेईराङ थोबाते बात ईन। दि बातचेन ख्‍योकोनगी थोबा ओताते गा लाङच्‍येते बातराङ ईन।

यहूदा 1:3

ङिङज्‍येते आज्‍यो न्‍वावे, परमेश्‍वरगी ङुरूङला पापकी सजायदुकी चुक खाईन टाल्‍सुङा सिन ख्‍योकोनला चिट्ठी टिक्‍पाला ङाला आउदी सेम लाबा ओतान। थे बात मेन्‍देकी थाचेन ङाला ख्‍योकोनला दि बात टिक्‍पाराङ फाप्‍क्‍यो सिराच्‍योक लासुङ। च्‍यि सासीन ज्‍येनगी जे सासीनोङ, जति दुक्‍पा बिन्‍सीनोङ येशूला विश्‍वास खाईन ङेन्‍दाते बात ख्‍योकोनगी ङेन्‍दा मातोङ। दि बात परमेश्‍वरगी थे खोरोङ सन्‍तान गाङेला ङेन सिन बिन्‍दाते ईन।