शक्ति काम 17:18 - जिरेल

¹⁸ थे मि रूक्‍सादु इपिक्‍युरीताङ स्‍तोइकी सिरातेन्‍दे पाटी गुरूओनोङ ओतान। पावलगी लापाते येशू बात थेमे स्‍यिनामेकी याङराङ सोम्‍बो लोइओ सिरच्‍येते बात थोजीन थेत्ताङ छलफल खिन थेबे नाङ लालेकी “दि फतफते बादोङ च्‍यि ङेन्‍च्‍ये?” सिन सासुङ। लालेकीचेन “दिकी ज्‍येन लुङबे ल्‍हे बात खित्‍च्‍या ईन्‍दा च्‍यिन्‍दा,” सिन सासुङ।

शक्ति काम 17:18 ပူးပေါင်းရင်းမြစ်များ

मर्कूस 9:14

येशूताङ थे चेला सुमबो ज्‍येन चेलातेबा ओत्‍सामा लेप्‍जीन थेरू थेबे फेरो खाङ आउदी काल्‍बेई मि जम्‍मा ओङा ओताते थोङसुङ। थेबे नाङ कोई कोई धर्मे गुरूङ ओतान। थेबाचेन येशू चेलाओनताङ टेकाटेउरी खिन ओतान।

लूका 11:53

दि बाततेबा खाईन सिन्‍नामेई येशू थे खाम्‍बादुकी थेन्‍गीन गाल्‍सुङ। दि बातओन थोनामेई धर्मे गुरूओनताङ फरिसी पाटी मिओनला स्‍येदाङगी मे बारसुङ। थेमे होथेजीनमेईराङ थेबेकी येशूला च्‍यि बातला दोष लै खिताबे सिन मौका छोल्‍गीनराङ देत्‍सुङ। थेकी खइँदा गल्‍तीते बात खिता सिन थेला काल्‍बेई बात ठाप्‍ला स्‍यूसुङ।

शक्ति काम 26:23

थेबेकीचेन ख्रीष्‍टकी विषयला बात खिन ख्रीष्‍टकी दुरू वाला आउदी दुक्‍पा भोगे खिता फाप्‍क्‍यो थेमे स्‍याङ फाप्‍क्‍यो। थेमे स्‍याप्‍तेबा गाङे नाङ थे गोमा सोम्‍बो लोक्‍ला था परमेश्‍वरगी मिओनला पापताङ दुक्‍पादुकी डेल्‍ग्‍यो सिन खोपरोङ यहूदी थेमे ज्‍येन ज्‍येन जातकी मि गाङेला छ्या स्‍ये ज्‍युत्‍क्‍यो सिन साबा ओतान,” सिन सिदुक।

शक्ति काम 4:2

थेमे थेबाबरी थेबा ङिबोताङ आउदी स्‍येदाङ खासुङ। च्‍यिला सासीन थेबा ङिबो येशू स्‍यिनामेकी लोईन सोम्‍बो लोक्‍पा ओत, थोगी स्‍याप्‍ते मिओनोङ सोम्‍बो लोइओ सिन मिओनला लोप्‍कीन ओतान।

शक्ति काम 5:42

थे तिरीङ थेबेकी गा लाङच्‍येते बात लोपा ताङराङ माताङसुङ। ङीमे ठाङमा परमेश्‍वर मन्‍दिरदु थेमे मि खाम्‍बा खाम्‍बाला गाल्‍ला येशू परमेश्‍वरगी तोङगो साबाते ख्रीष्‍टराङ ईन सिन दि बात मिओनला लोप्‍कीनराङ देत्‍सुङ।

शक्ति काम 6:9

तर कोई कोई यहूदीला थेकी खाबाते कामताङ बात लेमु मालाकीन थेबा थेत्ताङ माडिक्‍सुङ। थेबेते मिटिङ खित्‍च्‍येते खाम्‍बाङ खोपरोङते खुदुकराङ ओतान। थेबाला योक्‍पो योङमु खित्‍सादुई ताङाते मि ईन सिन सिरच्‍येते खिन ओतान। साइरेनीताङ अलेक्‍जेन्‍ड्रिया सार थेमे सिलिसियाताङ एशिये अञ्‍चल नाङपेकी वाकीन देताते ज्‍येन ज्‍येन यहूदीङ दिबाताङ डिक्‍पा ओतान। होदिबा गाङेराङ डिगीन स्‍तिफनसकी खाबाते बात ङेन्‍दा ओङच्‍येते मेन सिन थेत्ताङ टेकाटेउरी खासुङ।

रोमी 1:22

थेबेकी खोपरोङगी जे बादोङ छ्या स्‍येक्‍यो, जेङ खिता थुप्‍क्‍यो सिराला स्‍यूनामेई थेबा झन सो साकान पशु च्‍योकराङ डुइन गाल्‍सुङ।

१ कोरिन्‍थी 3:18

ख्‍योकोन सुङगीङ दाक्‍पोनगी ठुबाते डालुम नाङ दाक्‍पोनराङ स्‍यूक्‍च्‍येते काम माकेत। च्‍यि सासीन दि सा लुङबे मिकी कोईला आउदी बुद्धि ओताते मि ईन सिओ। ख्‍योकोन नाङ सुइँदाला खेराङ होथेबेकी साबा च्‍योक्‍ते मि ईन सिराच्‍योक लाङगीदुक सासीन बरू ख्‍योकोनगी ङानी छ्याःङ मेस्‍येकान्‍ते मि ईन सिराच्‍योक खि। दोक खाला छ्ये मिक्‍किकान्‍ते मिराङ बुद्धि ओताते मि ईन।

१ कोरिन्‍थी 4:10

ख्रीष्‍टकी मि ईन्‍देकी ङ्योकोनचेन छ्याःङ मेस्‍येकान्‍ते लेम्‍बाते मि च्‍योक ओङा ओत। तर ख्रीष्‍टकी खित्‍सादु ख्‍योकोननी आउदी च्‍याङबो गाल्‍दुक। थेमे ङ्योकोन छ्याःङ खिता मुथुप्‍कान्‍ते मि ईन। ख्‍योकोनचेन जेङ खिता थुप्‍कान्‍ते ईन। थोकराङ खाला मिओनगी ङ्योकोनला दिबाङ सु ईन्‍देरो सिराच्‍योक खिदुक। ख्‍योकोनलाचेन गाङेकी मान खिओ।

कलस्‍सी 2:8

ख्‍योकोन च्‍याङबो खाला देत। सुइँदेकी दोक दोक खासीन लेमु ओङगो सिरजीन थेबे बात माङेन। थेबेकी लोप्‍च्‍येते बातनी छ्याःङ काम लै मिक्‍किच्‍येते ईनराङ मेन्‍दे बात ईन। थोक्‍ते बातनी दि सा लुङबा खाङ मिओनगी खोपरोङ ज्‍युज्‍यु पुर्खे पालोमेई माने खिन वाबाते रीतिथिति बातकामा ईन। थोक्‍ते बात ख्रीष्‍ट सु ईन्‍दे, चुक्‍ते ईन्‍दे सिरच्‍येते बातताङ बान्‍दा मिडिगो।