परमेश्वरगी दया खाईन ङुरूङला दाक्पोन दाक्पोनला खुदुक खुदुक काम खित्च्येते सीपताङ शक्ति बिन्दा ओत। दाक्पोनताङ च्यि खित्च्येते सीप कि शक्ति ओते ङुरूङगी थे काम लेमु खाला खिता फाप्क्यो। च्यि सासीन परमेश्वरगी ङुरूङ सुइँदाला थे खोरोङगी सिर च्युताते बात खित्च्येते शक्ति बिन्ला दुक सासीन थे मिकी थे कामराङ खिता फाप्क्यो। तर थेकी थे खोरोङगी परमेश्वरला खजो विश्वास खिका थे ताला परमेश्वरगी सिर च्युता च्युता बातकामा सिरा फाप्क्यो, ज्येन बात खिता मेङगो।
१ कोरिन्थी 14:1 - जिरेल1 थोगी ख्योकोनगी चुक खाला ज्येनला ङिङज्ये खिता थुप्कीका सिरच्ये छ्य्वापा विचार खि। थेमे परमेश्वर आत्मेकी तेरच्येते खुदुक खुदुकते सीपताङ शक्ति चुक खाला ङेदोङा सिरच्ये छ्य्वापा सेम लै खि। थोक्ते सीपताङ शक्ति नाङदुङ परमेश्वरगी सिर च्युताते बात खित्च्येते शक्ति ङेतालाचेन ख्योकोनगी आउदी सेम खि। အခန်းကိုကြည့်ပါ။ |
१ कोरिन्थी 14:1
29 ပူးပေါင်းရင်းမြစ်များ
ज्येनतोक गाङे ङीमा लेनज्यीक छ्याःङ काम लै मिक्किच्या गाल्सीनोङ परमेश्वरला विश्वास खित्च्येते, थेकी ङुरूङला तेरग्यो साबाते ङेत्क्यो सिन खित्च्येते आश थेमे ज्येनला ङिङज्ये खित्च्येते दि बात सुमचेन नोमुङ छ्याःङ काम लै मिक्किच्या मोन्डोओ। दि बात सुमगी नाङदुङ छ्येते बातचेन ज्येनला ङिङज्ये खित्च्येतेराङ ईन।
ङेचेन परमेश्वरगी सिर च्युताते बात खित्च्येते शक्ति ङेता ओत्सीनोङ, परमेश्वरगी गोमा सुङलाङ छ्या स्ये च्युता मेताते बाततेबा गाङे छ्या स्येकान्ते ईन्सीनोङ थेमे परमेश्वरगी चुक खाला काम खिते सिरच्येते बात गाङे छ्या स्येबा ओत्सीनोङ ङे ज्येनला ङिङज्ये माक्यासीन दि बाततेबा छ्या स्येला छ्याःङ काम लै मिक्किओ, ङा छ्याःङ मेन। थेमे परमेश्वरगी जेङ खिता थुप्क्यो सिन थेला विश्वास खाला बोमज्यीकला सरे खाला ग्युक साला थे बोमला समेत सरे खित ज्युता थुप्सीनोङ ङा छ्याःङ मेन।
थोगी खोपरोङगी छ्या मास्येबाते खुदुक खुदुकते भाषाला बात खित्च्येतेचेन येशूला विश्वास खाबा मेताते मिओन लाईदु परमेश्वर सु ईन्दे, चुक्ते ईन्दे सिन छ्या स्ये ज्युत्च्येते दोक्पोई चिनु ईन। थोकराङ खाला परमेश्वरगी सिर च्युताते बात खित्च्येतेचेन येशूला विश्वास खाबा मेतातेबे लाईदु मेन्देकी थेला विश्वास खित्कान्ते मिओन लाईदु चिनु ईन।
येशू ख्रीष्ट मिओनला ताकान्ते मिओनगी खुई गोःकी लाक लाक्पा ज्याक्ला प्रार्थना खिते बेलाला कोई कोईकी परमेश्वरगी खुई विषयला सिर च्युताते बात खाबा ओतान। थोक खाईन परमेश्वरगी खोल्ला सीप बिन्दा ओतान सिन खुई टोक ज्येता मेतासीन। थेकी खोरोङला दोक खाईन बिन्दाते सीप पित मोतोङा खाला लेमु खाला चले खिन देत।
दोस्यिककामा मेन, थेबाचेन लेमु कामगी लाईदु मिन चले खाबाते मि ओङा फाप्क्यो। थोक साबाते च्यि सासीन फुज्युङ फुमुला लेमु खाईन हुर्के खाबाते, खाम्बादु वाबाते मिला लेमु खित्कान्ते, परमेश्वर सन्तानओन खाम्बादु ओङजीन काम्बा टुला तेरकान्ते, दुक्पा ओताते मिओनला ताकान्ते थेमे ज्येनोङ होदोक्ते लेमुते काम खित्च्ये छ्य्वापा स्येत खिन देताते फेम्मे मि ओङा फाप्क्यो।
तर खोचेन परमेश्वरगी खि साबाते काम खित्कान्ते मि ईन। थोगी खुई थोक्ते मेलेबा काम छ्याःङ माकेत। खुईचेन परमेश्वरगी खि साबा च्योकराङ खिन देत, थेला चुक खाला माने खिता फाप्च्येते ईन्दे थोकराङ खाला माने खि, येशू ख्रीष्टला विश्वास खिन देत। दोस्यिककामा मेन, ज्येनला ङिङज्ये खि, दुक्पा ओङसीनोङ खपे खिन देत थेमे गाङेताङ खा छ्येत लेमु खि। खुई होदोक दोक खित्च्ये छ्य्वापाकामा सेम लै खि।
थोगी खुईचेन स्यारातेबाला खिता सेम लाङच्येते दाक्पोन सेमला लाबा लाबाच्योक खित्च्येते मेलेबा काम सिराते नोमुङ माकेत। परमेश्वरगी खि साबा च्योकराङ खि, येशूला विश्वास खिन देत, ज्येनला ङिङज्ये खि थेमे ज्येनतेबाताङ डिक्ला थुन्ला देत। येशू ख्रीष्टला प्रभु सिन सिरकान्ते सेमला छ्याःङ पाप मेताते मिओनताङ खुई होदोककामा खिन देत।
ကြော်ငြာတွေ