Taitos 2:2 - Di Jamiekan Nyuu Testiment

² Tel di uolda man dem se dem no fi go uova buod wid notn. Dem fi kanchuol demself an liv so piipl kyan rispek dem. Di uolda man dem fi eva chrang iina wa dem biliiv, aalwiez shuo lov an neva gi op.

Taitos 2:2 ပူးပေါင်းရင်းမြစ်များ

Maak 5:15

An wen dem riich we Jiizas de, dem si di man we did av iin diiman. Im did a sidong de, av aan kluoz an iina im rait main. An di piipl dem kech dem fried.

Luuk 8:35

So di piipl dem go fi si a wa did apm. Wen dem riich wich paat Jiizas did de, dem si di man we Jiizas ron di diiman dem outa. Im did a sidong a Jiizas fut, im did av aan kluoz an iina im rait main. An di piipl dem kech dem fried.

Aks 24:25

Wail Paal did a taak bout wa it miin fi sumadi du we rait, kanchuol demself, an di die wen Gad a-go joj evribadi fi aal we dem du, weda gud ar bad, Fiiliks kech im fried an se tu Paal se, “Dat inof fi nou. Yu kyan lef. Wen mi fain taim mi wi sen fi yu agen.”

Ruoman 12:3

Kaaz a di gif we Gad gi mi, mi a tel unu: No bada tingk se unu muor dan wa unu riili bi. Insted-a dat unu fi ombl unuself an joj unuself bies pan di fiet we Gad gi unu.

1 Korintiyan 15:34

Unu fi wiek op, tek kanchuol a unuself an tap sin. Unu shuda shiem, kaaz som a unu no nuo Gad at aal.

1 Korintiyan 9:25

Enibadi we a rona ar uu plie eni kain-a spuot afi eksasaiz an wok aad evridie. Dem afi nuo ou fi kanchuol demself iina evriting we dem du. Dem du dat so dat dem kyan win wan medal. Di medal we dem win kyan mash op bot yu si wa wi a-go get, dat kyaahn mash op — it a-go laas fi eva an eva.

2 Korintiyan 5:13

Som piipl tingk se mi mad, an ef a mad mi mad, dat a fi mi an Gad saat out. Bot ef a no mad mi mad, an a sens mi a taak, a fi elp unu.

Gyalieshan 5:23

Di Spirit mek dem jengkl an mek dem nuo ou fi kanchuol demself. No Laa no de bout we wi tap yu fram liv so.

Filipiyan 4:8

Mi breda an sista, wan muor ting mi waahn se tu unu. Unu si eniting we chuu, eniting we unu kyan rispek, eniting we rait, eniting we gud an kliin, eniting we piipl kyan luk pan an fiil gud bout, eniting we piipl kyan taak gud bout, eniting we fit fi get big op — a dem sitn de unu fi set unu aat an main pan aal di taim.

1 Tesaluoniyan 5:6

So mek wi no sliip laik dem we a liv iina di daak. Bot mek wi kip wi yai waid uopm an wi ed skruu aan gud.

1 Tesaluoniyan 5:8

Bot wi we bilang tu di die, wi fi tingk chriet an chos iina Gad an lov im. Da wie de wi a protek wiself jos laik di suoja dem wen dem wier di metal ves. An jos laik ou di suoja dem put aan di elmit fi protek dem ed, a siem so wi fi protek wiself an luk faawod fi Gad siev wi, an biliiv iina wi aat se im a-go du it.

1 Timoti 1:10

It mek fi di man dem we av seks wid ada man, ar uman we av seks wid ada uman, an fi piipl we tek paat iina aal kain-a seks sin. Di Laa a fi di wan dem we kech an sel piipl fi ton sliev, an fi piipl we a laiyad an piipl we go a kuot go tel lai pan ada piipl. Matarafak it a fi enibadi we go gens di chuu mesij we wi tiich,

1 Timoti 1:14

Jiizas Krais wi Laad did shuo mi lov iivn duo mi neva dizorv it at aal at aal. Im kaaz mi fi biliiv iina im an fi lov piipl.

1 Timoti 1:2

Timoti, yu komiin laik se yu a riili fi mi pikni kaaz di tuu a wi biliiv an chos iina di siem Gad. Mi prie se wi faada Gad an wi Laad Jiizas Krais wi gud an kain tu yu, shuo yu lov iivn duo wi no dizorv it an gi yu piis iina yu aat.

1 Timoti 1:5

Mi tel yu fi du dis so di piipl dem kyan lov dem wan aneda wid di kain-a lov we kom fram wan gud aat, we nuo rait fram rang. Wen dem lov dem wan aneda so, dem a ak laik piipl we riili bilang tu Gad.

1 Timoti 3:11

A siem so di uman dem mos liv dem laif so piipl wi rispek dem. Dem no fi susu-susu, lai ar taak bad bout piipl. Insted-a dat dem fi kyan kanchuol demself, no go uova buod wid notn an piipl fi kyan chos dem.

1 Timoti 3:2

Di elda fi liv im laif so dat nobadi kyaahn se notn bad gens im. Im fi av onggl wan waif, im fi nuo ou fi kanchuol imself an no go uova buod wid notn. Piipl mos kyan rispek im an im fi kyan chriit piipl gud wen dem kom a im yaad. Di elda mos nuo ou fi tiich.

1 Timoti 3:4

Im fi nuo ou fi ron im ous an im pikni dem fi lisn wa im se an shuo rispek.

1 Timoti 3:8

Siem laik di elda, di diikan dem fi bi sumadi we piipl rispek. Dem no fi tel wan sumadi sitn an go tel sumadi els sitn difrant, dem no fi lov jringk tu moch an dem no fi waahn waahn moni.

1 Timoti 5:1

No disrispek di uol man dem iina di choch an taak tu dem eni an eni wie. Taak tu dem laik ou yu wuda taak tu yu faada. Taak tu di yong bwai dem laik dem a yu breda.

Taitos 1:13

Im neva did a lai wen im se so. Dat miin se yu afi set dem chriet an karek dem aad aad, so dat dem wi biliiv iina di chuut

Taitos 1:8

Insted-a dat, di elda mos uopm op im ous tu piipl, lov du gud sitn an im aat mos kliin. Im mos fier tu evribadi an im mos nuo ou fi kanchuol imself an du we im nuo iina im main rait an no fala wa im badi waahn fi du.

Taitos 2:7

Yu, Taitos, mek shuor se yu eva a du gud sitn an liv rait, so piipl wi si ou yu liv an fala wa yu du. Wen yu tiich mek shuor se yu taak di chuut an tek it siiros.

Failiiman 1:9

Bot siek-a ou yu lov Gad piipl mi a beg yu insted. Mi, Paal, wan oul man an we nou iina prizn kaaz mi tiich bout Jiizas.

1 Piita 1:13

So siek-a aal we Gad du, mek shuor se unu get unu main redi fi akshan. Kanchuol unuself an staat liv siiros. Kip unu main onggl pan di blesn dem we Gad a-go gi unu wen Krais Jiizas kom bak.

1 Piita 4:7

Bot, di taim wen aal a dis a-go don suun kom. So klier unu ed an staat tingk chriet, get unu main redi fi akshan, kanchuol unuself an staat liv siiros. Du aal a dat so dat unu kyan prie.

1 Piita 5:8

Wach out! Wiek op. Unu fi get unu main redi fi akshan. Klier unu ed an staat tingk chriet. Unu enimi — di devl, im a siniik roun laik wan wikid onggri-beli laiyan, a luk sumadi fi nyam.

2 Piita 1:6

An no jos nuo bout Gad niida, bot unu fi nuo ou fi kanchuol unuself tu. No jos nuo ou fi onggl kanchuol unuself, bot unu fi chrai aad tu fi chos iina Gad an pres aan no mata wa. Unu fi gi Gad evri paat a unu laif an du wat-eva im waahn unu fi du.