Taitos 1:15 - Di Jamiekan Nyuu Testiment

¹⁵ Evriting kliin fi di piipl we aat kliin an uufa main no ful-a sin. Bot notn no kliin fi di wan dem we mek sin ruul dem an we no biliiv. Fi dem aat an main doti.

Taitos 1:15 ပူးပေါင်းရင်းမြစ်များ

Matyu 15:18

Bot di sitn dem we kom outa unu mout, a outa unu aat dem kom fram. An a dem sitn de wi mek piipl doti an no kliin iina Gad yai.

Aks 10:15

Den di vais se tu Piita di sekan taim se, “No tek notn we Gad mek kliin an se it doti an no gud fi iit.”

Ruoman 14:14

Mi an Jiizas a wan an so mi nuo fi shuor se no fuud no de we rang fi mi iit. Bot ef sumadi riili biliiv se it rang fi dem iit sopm, den it wuda rang fi dem iit it.

Ruoman 14:20

No mash op di wok we Gad du uova fuud. So iivn duo evriting kliin an gud fi iit, it wuda rang fi yu iit it ef it a-go kaaz sumadi fi sin.

Ruoman 14:23

Bot ef sumadi iit sopm, an a wanda ef it rang ar it rait fi dem iit it, Gad a-go joj dem an se dat wa dem a du rang, kaaz dem naa liv azkaadn tu wa dem biliiv. An eniting we no lain op wid wa yu biliiv rait, a sin.

1 Korintiyan 10:23

Som piipl se, “Mi kyan du eniting wa mi waahn fi du,” bot a no evriting gud fi yu. Dem se, “Mi kyan du eniting wa mi waahn fi du,” bot a no evriting a-go elp yu fi gruo.

1 Korintiyan 10:25

Yu kyan nyam di miit we dem sel iina di maakit an no afi wori ef it rait ar rang

1 Korintiyan 10:31

Wel, di chuut a weda yu a iit fuud ar jringk jringks — evriting we yu du, yu fi du it iina wan wie we wi kaaz piipl fi priez Gad.

1 Korintiyan 8:7

Bot a no evribadi nuo dis. Som piipl get so yuus tu worship faalz gad dat wen dem iit di fuud dem stil tingk se a wan sakrifais tu di faalz gad dem. An chuu dem stil yong iina wa dem biliiv, dem tingk se dem a sin wen dem nyam da fuud de.

1 Timoti 6:5

Dem sitn ya onggl kaaz bier aagiment mongks piipl we main wikid an no nuo di chuut. Dem piipl de tingk se fi fala Gad, a wan wie fi mek moni.

Iibruu 10:22

So siek-a aal a dem sitn de, kom mek wi jraa kluos tu Gad an no fried. Bot mek wi go tu im an riili chos im wid aal a wi aat. Kaaz Jiizas blod don kliin wi aat so wi kanchens frii, an wi badi don wash iina kliin waata tu.

Iibruu 12:15

Gad lov wi iivn duo wi no dizorv it, so mek shuor se nobadi no ton dem bak pan wa im du fi dem. An mek shuor se nobadi no galang laik bita ruut we gruo kom ton bita chrii. Dem piipl de wi kom kom mek chobl an brok out wan bag a piipl. Mek shuor se dat no apm.

Iibruu 9:14

den tingk bout umoch muo Krais Jiizas blod a-go du fi wi! Siek-a di Spirit we liv fi eva, im kuda gi op imself, an im naa no sin at aal. So fi im blod frii wi kanchens fram di sitn dem we wi du uova an uova fi worship, bot we riili naa no yuus an we boun fi kil wi aaf. Im blod frii wi kanchens fram dem de an mek wi kyan riili sorv di Gad we liv fi eva!