Ruoman 9:30 - Di Jamiekan Nyuu Testiment

³⁰ So den wa wi kyan se bout aal a dat? Wi kyan se dat di piipl we a no Juu, dem neva did a luk fi Gad put tingz rait wid dem, bot Gad mek tingz rait bitwiin im an dem kaaz dem chos iina im.

Ruoman 9:30 ပူးပေါင်းရင်းမြစ်များ

Filipiyan 3:9

Mi waahn Jiizas fi tek ful kanchuol a mi — badi an suol. Mi naa dipen pan notn we di Laa se, ar we mi kyan du fi mek miself rait iina Gad yai. Mi a dipen pan di rait sitn dem we Jiizas du, kaaz fi get rait iina Gad yai yu afi dipen onggl pan wa Jiizas du.

Iibruu 11:7

Afta Gad waan Nowa bout di sitn dem we Nowa kudn si yet, a kaaz Nowa chos iina Gad an av nof nof rispek fi im mek im lisn we Gad se an go bil wan big buot fi siev im fambili. Kaaz Nowa did chos iina Gad so, im kot aaf imself fram di piipl dem iina di worl an shuo se dem rang kaa dem no chos iina Gad. Gad se, “Nowa a sumadi we du wa rait” kaaz Nowa chos iina im.

Gyalieshan 2:16

Bot wi nuo se no chuu sumadi a fala di Laa dat miin se tingz rait bitwiin dem an Gad. A onggl wen wi biliiv iina Jiizas Krais dat tingz kyan rait bitwiin wi an Gad. So iivn wi we a Juu, staat biliiv iina Jiizas Krais. Kaaz wi waahn fi mek tingz rait wid Gad an wi nuo se dat naa apm ef wi jos a fala Muoziz Laa.

Ruoman 4:11

An a lang afta dat apm Iebriyam go get sorkomsaiz. Im go get sorkomsaiz fi shuo se Gad did mek tingz rait bitwiin di tuu a dem iivn duo im neva sorkomsaiz, an Gad did du it kaaz Iebriyam did biliiv iina im. So Iebriyam komiin laik di faada fi aal a di piipl dem we neva get sorkomsaiz bot uu Gad mek tingz rait bitwiin im an dem kaaz dem biliiv iina im.

Ifiijan 2:12

se wan taim, unu neva nou Krais Jiizas, unu a neva paat a Gad piipl, Izrel, an unu kudn kip kompni wid dem niida. Di diil we Gad mek wid im piipl neehn av notn fi du wid unu. Unu did iina di worl, unu neva did a liv fi notn an unu neva nuo Gad.

Gyalieshan 5:5

Bot yu si wi, di wan dem we a chos iina Jiizas Krais, di Uoli Spirit mek wi nuo fi shuor se wi a-go get aal a wa Gad pramis fi gi wi. So wi kyan wiet an luk fi aal we Gad pramis fi gi wi kaaz Gad mek tingz rait bitwiin wi an im aredi.

Ruoman 10:20

Den Aizaiya tel dem plien plien we Gad did se, im tel dem se Gad se, “Di piipl we neva did a luk fi mi, a dem fain mi; di piipl we neva did a aks fi mi, a dem mi mek nuo mi.”

Ruoman 10:6

Bot dis a wa Gad wod se bout di piipl we get put rait wid Gad kaaz dem biliiv, it se: “No bada tingk tu unuself, ‘A uu a-go go op iina evn?’” (an wen unu a tingk dat, wa unu miin se, a uu a-go go op iina evn an aks Krais Jiizas fi kom dong kom siev wi.)

Ruoman 9:14

So den wa unu tingk bout dat? Unu tingk wi kyan se dat Gad no fier? Nuo Sa! Notn kyaahn go so!

1 Piita 4:3

Unu spen inof taim a du wa di worliyan dem laik fi du. Iina di paas aal wa unu mosn du — a dat unu did lang fi du an galang go du. An unu yuus fi jringk uol iip aal di taim. Unu jringk chrang jringk we jongk unu aaf. Den som a di taim dem, unu an unu fren dem wuda av unu wail paati an jringk an galang wid aal kain-a naasinis. An ef dat neva bad, unu put ada gad uova Gad we av aal powa — wat a wikid wikid sitn!

1 Timoti 6:11

Bot aal laik yu Timoti we a wan man a Gad, yu fi ron fram dem wikid sitn de. Yu fi chrai yu bes fi liv ou Gad waahn yu fi liv an fi liv di sitn dem we yu tiich. Yu mos gwaan tiich di Wod an chos se Gad wi gi yu chrent. No gi op, shuo lov an tek yu taim wid piipl tu.

Gyalieshan 3:24

So di Laa did a gyaad wi til Krais Jiizas kom. It did a elp wi fi liv rait so dat wen Jiizas kom wi kuda mek tingz rait wid Gad, ef wi biliiv iina im.

Gyalieshan 3:8

Gad did av a plan fi mek tingz rait bitwiin im an di piipl dem we a no Juu. Ef dem biliiv iina im, im wuda siev dem an tek we dem sin. Dis a did di gud nyuuz we Gad tel Iebriyam fram wie bak wen an we rait dong iina Gad wod. Gad tel Iebriyam se, “Piipl fram aal difrant konchri a-go get bles siek-a wa yu du.”

Ruoman 10:10

Kaaz yu biliiv wid yu aat an wen yu biliiv, Gad wi mek tingz rait bitwiin yu an im; an wen yu se infronta piipl se yu biliiv iina Krais Jiizas, yu wi get siev.

Ruoman 9:31

Bot Izrel, di piipl we Gad pik, dem di a luk fi wan laa we wuda put dem rait wid Gad. Bot dem neva fain it so dem neva get put rait wid im.

Ruoman 5:1

Gad put tingz rait bitwiin wi an im, kaaz wi biliiv iina im. An siek-a wa wi Laad Jiizas Krais did du, wi an Gad a liv iina piis.

Ruoman 4:22

An a dat mek Gad did mek tingz rait bitwiin im an Iebriyam. Im du it kaaz Iebriyam did chos iina im.

Ruoman 4:13

Gad did pramis Iebriyam se di worl wuda bilang tu im an im pikni dem. Gad neva mek im da pramis de kaaz im did a fala di Laa, bot kaaz Iebriyam did biliiv iina Gad an Gad did mek tingz rait bitwiin di tuu a dem.

Ruoman 4:9

A onggl di piipl dem we sorkomsaiz Dievid did a taak bout? A dem wan Gad a-go paadn an mek api? Nuo, im did a taak bout di piipl we no sorkomsaiz tu. Wi se dat Iebriyam did biliiv iina Gad an so Gad mek tingz rait bitwiin im an Iebriyam.

Ruoman 3:5

So wa ef wen wi du rang, piipl si klier klier se Gad aalwiez a du we rait? Wa wi kyan se bout dat? Unu tingk wi kyan se Gad a du rang wen im ponish wi? (Mi jos a taak ou som piipl taak)