Ruoman 8:28 - Di Jamiekan Nyuu Testiment

²⁸ Wi nuo se aal di piipl we lov Gad an we Gad kaal fi tek paat iina im plan, wi nuo se Gad wok wid dem fi mek shuor se no mata wa apm, evriting wok out fi fi dem gud.

Ruoman 8:28 ပူးပေါင်းရင်းမြစ်များ

1 Piita 5:10

Bot afta unu sofa likl, di Gad we lov unu so til, we no uol bak non a im lov fram unu, im sed wan we kaal unu fi enjai im powa we kyaahn don, kaaz unu a fala Krais Jiizas — im a-go fiks bak evriting fi unu agen, an di chos unu chos iina im, im a-go mek dat chrang chrang. Im a-go mek unu aat chrang tu, so unu kyan anggl di sofarieshan. An im a-go mek shuor se unu tan op chrang iina im no mata ou rof it mait-a get.

Jiemz 1:12

Ef unu uol aan chrang an no gi op wen unu a go chuu chraiyal an kraasiz we kom fi tes unu, unu a-go wel api. Kaaz wen unu tes don, Gad gweehn gi unu di kroun a laif we im pramis fi gi evribadi we lov im.

1 Korintiyan 2:9

Bot it rait dong se: “No yai no si, no iez no ier, aal a di sitn dem we Gad pudong fi di piipl we lov im. Nobadi kudn iivn tingk dem op.”

Ruoman 8:30

An di piipl we Gad maak, im kaal fi bi im piipl. An di piipl we im kaal, Gad put tingz rait bitwiin im an dem. An di piipl we Gad put tingz rait wid, Gad wi mek dem muor an muor laik im.

2 Timoti 1:9

Gad siev wi an pik wi fi bi im piipl. A no kaaz a notn we wi du mek im du dat. Gad pik wi kaaz im did plan fi gud an kain tu wi. Wie bifuo taim im di plan fi shuo wi lov iivn duo wi no dizorv it an sen Krais Jiizas fi siev wi.

1 Korintiyan 1:9

Gad, di wan we kaal unu fi bi wan wid im Bwai Pikni, wi Laad Jiizas Krais, aalwiez du wa im se im a-go du. So unu kyan chos se im wi de de fi unu.

Revilieshan 3:19

Di piipl we mi lov, mi taak tu dem aad an chrietn dem out an mek dem nuo se we dem a du rang. So get siiros an ton we fram unu sin dem an shuo se unu sari.

Gyalieshan 1:15

Bot Gad gud an kain tu mi. Im pik mi fram mi baan an im kaal mi fi du im wok. An wen im did redi

1 Tesaluoniyan 5:9

Kaaz Gad neehn put wi ya, so im kuda mek wi sofa, bot im du wa im du so di Laad Jiizas Krais kuda siev wi.

Maak 12:30

Yu fi lov di Laad we a yu Gad. Yu fi lov im wid aal a yu aat, yu fi lov im wid aal a yu suol, yu fi lov im wid aal a yu main, an yu fi lov im wid aal a yu chrent.’

Ifiijan 3:11

A so Gad did plan it fi apm fram wie bak wen, an im mek Krais Jiizas wi laad mek it apm siem laik ou im did plan it.

Jiemz 2:5

Mi breda an sista, ier wa mi a se. No Gad pik di puo piipl iina di worl fi bles dem kaaz dem biliiv iina im? Im pik dem fi tek paat iina im kindom wa im pramis fi gi aal uu lov im.

1 Jan 4:19

Wi lov wan aneda kaaz Gad lov wi fos.

2 Timoti 2:19

Bot Gad foundieshan salid an chrang, it a tan op siem wie. An it av dis rait pan it: “Di Laad nuo di piipl dem we a fi im uon,” an “Enibadi we se Jiizas a ‘Laad’ mos tap du wikid sitn.”

1 Jan 4:10

Riil lov a no ou wi lov Gad, bot a ou Gad lov wi an ou im sen im wan dege-dege Bwai Pikni kom ded fi wi sin dem.

Ruoman 9:11

Bifuo Aizak bwai pikni dem did baan, bifuo eni a dem kuda du notn gud ar bad, Gad pik wan fi ruul uova di ada wan. Gad pik im bifuo im baan fi shuo se a no notn we im did du mek Gad pik im — Gad pik uu im waahn fi pik fi du we im waahn im fi du.

2 Korintiyan 5:1

Wi nuo se wi badi a laik di ous dem we wi liv iina, dem naa go laas fi eva. An wi nuo se wen da badi ya mash op, Gad wi gi wi wan nyuu wan we im bil imself. Da badi de wi wi get wen wi riich a evn an it a-go laas fi eva.

Gyalieshan 5:8

A kyaahn Gad we kaal unu fi bi im pikni, a kaaz unu fi tap fala di chuut.

Aks 13:48

Wen di piipl we a no Juu ier dis, dem api so til. Dem gi tangks an priez fi Gad mesij. An aal a di wan dem we Gad did pik fi liv fi eva, biliiv di mesij an get siev.

Ruoman 11:29

Gad naa go chienj im main bout di piipl we im did pik an im naa go tek bak di gif dem we im gi dem.

1 Korintiyan 1:2

Da leta ya a fi aal a Gad piipl we de iina Korint. Gad kaal unu fi bi im piipl an di uol a unu bilang tu im, kaaz a im mek unu an Jiizas ton wan. A no jos unu wi a rait tu — wi a rait tu evribadi we se Jiizas a dem Laad laik wi.

1 Korintiyan 1:24

Bot yu si di piipl dem we Gad kaal fi bi im pikni, weda dem a Juu ar dem a no Juu, da mesij de shuo ou Gad powaful an ou im waiz.

Gyalieshan 1:6

Mi fraitn fi si ou unu kwik fi ton we fram Gad we pik unu an we sen Jiizas fi bi gud an kain tu unu. Unu ton we fram di chuu mesij an staat fala som ada mesij.

Ifiijan 4:1

So den, mi we de a prizn kaaz mi a sorv di Laad, a beg unu — unu we Gad pik fi bi im piipl; mi a beg unu fi liv ou Gad waahn unu fi liv.

Filipiyan 3:14

Mi a push aad fi go chuu an finish di ries an fi get di sitn dem we Gad pudong iina evn fi mi, kaaz a dat Gad kaal mi fi chos Krais Jiizas fa.

Iibruu 9:15

A so kom im mek wan nyuu plan bitwiin Gad an piipl. So di piipl dem we Gad kaal fi bi fi im uona piipl dem, im kyan bles dem fi eva laik we im pramis fi du. Dat kyan apm kaaz im ded, an kaaz im go ded di piipl dem we sin an brok di uol taim plan we Gad did mek wid dem, dem piipl de kyan get paadn.

1 Piita 2:9

Bot unu a wan set a piipl we Gad pik. Unu a di king priis — an Gad a di king. Unu a wan speshal piipl we Gad tek fi kom ton fi im uona piipl dem. Im pik unu so unu kyan tel ada piipl ou big im bi an ou gud im bi. Kaaz a im sed wan tek unu outa daaknis an kom put unu iina im brait brait lait.

1 Piita 3:9

Wen sumadi du unu sopm, unu no fi du dem bak notn. An wen dem kos unu out, no bada kos dem aaf; insted-a dat unu fi aks Gad fi bles dem kaaz Gad kaal unu fi bles unu.