Ruoman 8:24 - Di Jamiekan Nyuu Testiment

²⁴ Wi did get siev kaaz a wa wi biliiv — wi biliiv an wi a luk fi Gad gi wi aal we im pramis wi. Bot ef wi did get aal we im pramis aredi wi wudn niid fi biliiv. Kaaz wich wan a wi wuda sidong a wiet an a luk fi get sopm we wi get aredi?

Ruoman 8:24 ပူးပေါင်းရင်းမြစ်များ

Iibruu 11:1

Wen wi chos iina Gad it mek wi shuor bout di sitn dem we wi onggl uop se wi a-go get, an wi nuo se di sitn dem we wi kyaahn si, dem de de fi chuu.

2 Korintiyan 5:7

(An iivn duo wi kyaahn si it wi nuo wi a-go get it kaaz wi no liv wi laif bies pan wa wi kyan si wid wi yai dem bot pan wa wi biliiv.)

2 Korintiyan 4:18

So wi naa wach di sitn dem we wi kyan si, kaaz dem sitn de naa go laas fi eva. Insted-a dat wi wach di sitn dem we wi kyaahn si kaaz dem de sitn de laas fi eva.

1 Piita 1:21

An a im mek unu biliiv iina Gad — Gad we did mek im kom bak alaiv an ana im. So da wie de unu wi chos iina Gad an unu wi kyan nuo fi shuor se im a-go kip im wod an du som gud sitn fi unu.

1 Tesaluoniyan 5:8

Bot wi we bilang tu di die, wi fi tingk chriet an chos iina Gad an lov im. Da wie de wi a protek wiself jos laik di suoja dem wen dem wier di metal ves. An jos laik ou di suoja dem put aan di elmit fi protek dem ed, a siem so wi fi protek wiself an luk faawod fi Gad siev wi, an biliiv iina wi aat se im a-go du it.

1 Piita 1:3

Tangks an priez tu di Gad an Faada a wi Laad Jiizas Krais. Im so gud an kain tu wi, im gi wi nyuu laif wen im mek Jiizas Krais ded an kom bak alaiv. Da wie de, wi nuo fi shuor se wi kyan get wa im pramis wi.

Ruoman 12:12

Wail unu wiet fi di sitn dem we Gad pramis fi gi unu, unu mos api kaaz unu nuo se unu a-go get it. Wen chobl tek unu, unu no fi gi op bot unu mos gwaan uol chrang an unu fi prie aal di taim, neva tap.

Ruoman 5:2

Aal a di gud sitn dem we wi a get fram Gad an we wi no dizorv, wi a get dem siek-a wa Jiizas Krais did du an kaaz wi biliiv. An wi wel api kaaz wi nuo fi shuor se Gad a mek wi muor an muor laik im.

Ruoman 15:13

Mi prie se Gad, Gad we kaaz piipl fi luk fa an nuo fi shuor se dem wi get wa im pramis, mi prie se im wi gi unu piis iina unu aat an mek unu aat api, api kyaahn don kaaz unu biliiv iina im. Mi prie se im du dat, so dat di Uoli Spirit wi kaaz unu muor an muor fi luk fi get di sitn dem we Gad pramis an nuo fi shuor se yu wi get dem.

Koloshan 1:27

Gad did waahn dem nuo umoch im riili riili bles unu — unu piipl we kom fram aal bout. Da mesij ya se Krais Jiizas liv iina unu aat, an unu kyan luk fi kom si an nuo ou Gad big an powaful.

Ruoman 15:4

Evriting we rait dong iina Gad wod, rait dong fi tiich wi an fi elp push wi fi tan op chrang an no gi op so dat wi kyan gwaan luk fi get di sitn dem we Gad pramis wi.

Gyalieshan 5:5

Bot yu si wi, di wan dem we a chos iina Jiizas Krais, di Uoli Spirit mek wi nuo fi shuor se wi a-go get aal a wa Gad pramis fi gi wi. So wi kyan wiet an luk fi aal we Gad pramis fi gi wi kaaz Gad mek tingz rait bitwiin wi an im aredi.

1 Jan 3:3

Evribadi we biliiv se Jiizas a-go mek dem jos laik imself, kip we fram sin, jos laik ou Jiizas kip we fram sin.

2 Tesaluoniyan 2:16

Nou, wi prie tu wi Laad Jiizas Krais imself an wi Faada Gad — Gad lov wi an no tap gi wi gud wod fi mek wi aat chrang, an im mek wi kyan luk faawod tu som gud sitn tu we im pramis fi gi wi, duo wi no dizorv dem at aal at aal.

Koloshan 1:23

A so it go, ef unu riili uol aan chrang an gwaan chos iina im, an ef unu no tap luk faawod tu di gud sitn dem unu ier bout wen unu ier di Gud Nyuuz. Piipl pred da Gud Nyuuz de aal uova di worl. An mi, Paal, mi ton Gad sorvant, so mi kyan pred di Gud Nyuuz tu.

Koloshan 1:5

Unu du dem sitn de kaaz unu a luk fi get wa Gad put op iina evn fi wi, an unu nuo fi shuor se unu a-go get dem. Wa Gad put op a di sed sitn dem we unu did ier bout wen unu did ier di Gud Nyuuz, an da mesij de chuu.

1 Korintiyan 13:13

So nou a chrii tingz lef we wi fi gwaan du: chos iina Gad, gwaan biliiv se im a-go gi wi wa im se im a-go gi wi an fi lov wi wan aneda. Outa aal a dem di muos impuotant wan a lov.

Ruoman 4:18

Iivn duo im neva av no riizn fi biliiv se im wuda get we Gad pramis im, Iebriyam did biliiv siem wie. Im biliiv se Gad wuda mek im di faada fi nof difrant piipl fram aal uova di worl an dat it wuda apm siem laik ou it se iina Gad wod. It se, “Yu a-go av so moch pikni dat nobadi a-go kyan kount dem jos laik ou dem kyaahn kount di staar dem we iina di skai.”

Ruoman 8:20

Gad mek it so dat non a di sitn dem we im mek kuda du wa im mek dem fi du. A no dat di sitn dem we im mek did waahn, bot a dat Gad mek op im main fi du. Gad did du dat so dat di sitn dem we im mek wuda luk

Taitos 3:7

Gad gi wi im Spirit, so nou dat tingz aarait wid wi an im, siek-a ou im lov wi iivn duo wi no dizorv it, wi kyan get wa wi Faada Gad pramis wi; kaaz wi nuo fi shuor se im a-go mek wi liv fi eva.