Ruoman 7:6 - Di Jamiekan Nyuu Testiment

⁶ Bot nou Gad frii wi fram di Laa. Di Laa did av wi laik prizna bot kaaz wi did ded, wi a no prizna no muor. Nou wi sorv Gad, no wen wi fala di Laa, dat a di uol wie, nou wi sorv im wan nyuu wie. Wi sorv im wen wi liv ou Gad Spirit se wi fi liv.

Ruoman 7:6 ပူးပေါင်းရင်းမြစ်များ

Ruoman 1:9

Mi sorv Gad wid aal a mi aat. A sorv mi a sorv im wen mi priich di Gud Nyuuz bout im Bwai Pikni, an im nuo se wa mi bout fi se a chuu: Mi aalwiez a tingk bout unu.

Ruoman 12:2

No mek di piipl we de iina di worl tel unu ou fi liv. Insted-a dat mek Gad chienj di wie ou unu tingk so dat im kyan chienj di wie ou unu a liv. Da wie de unu wi nuo aal a wa Gad waahn unu fi du — unu wi nuo we rait, unu wi nuo wa mek Gad api an unu wi nuo ou im waahn unu fi liv.

Ruoman 6:11

A siem so unu mos luk pan unuself, wen it kom tu sin, a laik unu ded, sin naa no powa uova unu. An kaaz unu an Krais Jiizas a wan, di laif unu a liv nou, unu a liv fi sorv Gad.

Ruoman 6:19

(Mi a yuuz sopm outa unu laif, dis uol ting bout sliev an maasta, fi elp unu andastan wa mi a se. Mi no tingk unu wi andastan ef mi no du dat.) Wan taim unu did tek unuself ton sliev tu aal kain-a naasinis an wikidnis — unu gi op evri paat a unu badi fi tek paat iina aal kain-a sin. A siem so nou unu fi tek unuself ton Gad sliev — unu mos gi op evri paat a unu fi du wa rait. Da wie de unu wi riili bi Gad piipl.

Ruoman 6:2

Nuo sa, notn kyaahn go so! Wen it kom tu sin, a laik a ded wi ded, sin naa no powa uova wi. So ou wi, wi we sin naa no powa uova, ou wi fi a stil liv iina sin?

Ruoman 6:22

Bot nou, unu frii. Sin no kanchuol unu no muor. Unu a Gad sliev, unu bilang tu im iina evri wie an im kaaz unu fi liv rait. An kaaz unu a liv rait Gad wi mek unu liv fi eva an eva. Dat a we yu get wen yu mek Gad ruul uova yu.

Ruoman 6:4

Wen wi did get baptaiz, a laik wi did ded an beri wid Jiizas Krais. Wi did ded an beri wid im so dat siem laik ou di Faada yuuz fi im griet powa an mek Krais Jiizas kom bak alaiv, a siem so im wuda mek wi kom bak alaiv an gi wi wan nyuu laif.

Ruoman 7:1

Breda an sista, mi nuo se unu wi andastan wa mi bout fi se, kaaz aal a unu nuo di Laa. Unu nuo se di Laa av powa uova piipl fi dem uol laif — az lang az dem alaiv, dem afi fala di Laa.

Ruoman 7:2

Mek mi shuo unu wa mi miin. Di Laa se ef wan uman marid, az lang az ar ozban stil alaiv shi afi tan wid im. Bot ef ar ozban ded, di Laa se shi frii.

Ruoman 7:4

Breda an sista a siem so it go wid unu wen it kom tu di Laa. Wen Jiizas did ded a laik unu did ded wid im, so di Laa naa no powa uova unu. Gad mek Jiizas kom bak alaiv an nou wi bilang tu im. Wi bilang tu Jiizas an siek-a dat wi a sorv Gad wen wi liv rait.

2 Korintiyan 3:6

A Gad mek wi kyan sorv im an go roun go tel piipl bout di Nyuu Diil we Gad mek wid wi. Da Nyuu Diil ya no av notn fi du wid di Laa we did rait dong. Iina da Nyuu Diil ya Gad sen im Spirit gi wi; kaaz di Laa kil bot di Spirit gi laif.

2 Korintiyan 5:17

Wen sumadi biliiv iina Krais Jiizas, dem ton wan nyuu sumadi. Dem tap liv di wie dem yuus tu liv bifuo dem biliiv an staat liv difrant.

Gyalieshan 3:13

Nou wi no aalwiez fala aal a di Laa dem an siek-a dat Gad wuda ponish wi. Bot Krais Jiizas siev wi fram get ponish wen im kom an sofa fi wi. Im get ponish so wi wudn get ponish. It aal rait dong iina Gad wod se, “Enibadi we dem eng op pan wan kraas — Gad a ponish dem.”

Gyalieshan 6:15

A no notn ef yu sorkomsaiz ar yu no sorkomsaiz; di onggl ting we mata a se Gad tek yu an ton yu iina wan nyuu sumadi.

Ifiijan 4:24

An unu lorn fi liv laik wan nyuu sumadi we Gad mek aal uova agen. Gad mek unu fi tan jos laik im — fi du wa rait an wa gud an kliin azkaadn tu di chuut.

Filipiyan 3:3

Bot a wi a di piipl we riili get sorkomsaiz — no dem. Wi a di wan we worship Gad iina di Spirit, priez Krais Jiizas, an no buos aaf bout uu wi bi.

Koloshan 3:10

Unu a nyuu sumadi nou. An Gad a mek unu komiin muo an muo laik im. Da wie de unu kyan riili get fi nuo im — di wan we mek unu, an we mek evriting els.