Ruoman 7:5 - Di Jamiekan Nyuu Testiment

⁵ Wan taim wi did a liv ou wi waahn fi liv — wi did a mek wi badi kanchuol wi. Di sitn dem we wi badi did wel waahn fi du, did a kaaz wi fi sin. An chuu wi did nuo Gad Laa, wi staat fi sin muor an muor. Wid aal a di rang sitn dem we wi did a du a onggl ded wi did a go ded.

Ruoman 7:5 ပူးပေါင်းရင်းမြစ်များ

Matyu 15:19

Kaaz a outa di aat aal kain-a wikidnis we piipl tingk op kom fram. Wen sumadi go kil, go sliip wid sumadi we dem no marid tu ar gwaan wid aal kain-a ada seks sin, wen piipl tiif, tel lai, ar tek dem mout tier dong ada piipl — a di aat dem sitn de kom fram.

Jan 3:6

Wen biebi baan, a piipl a av piipl, bot Gad, im mek piipl baan iina di Spirit.

Ruoman 1:26

An kaaz dem a du dem sitn de, Gad lef dem fi bring don shiem pan demself. Im lef dem fi tek paat iina aal kain-a seks sin. An so di uman dem tap du we naamal — dem tap sliip wid man an go staat sliip wid uman.

Ruoman 3:20

Evribadi a-go get ponish, kaaz Gad naa go mek tingz rait bitwiin yu an im jos chuu yu a fala di Laa. Di Laa kyaahn du dat, wa di Laa du a mek wi nuo se wi a sina.

Ruoman 4:15

Kaaz Gad beks wen piipl brok im Laa, an kaaz a di Laa im a-go joj dem piipl de. Bot ef no laa no de de, nobadi kyan brok it, kaaz notn wudn de de fi brok.

Ruoman 5:20

Nou Gad sen di Laa so dat piipl wuda nuo se wa dem a du a sin. Bot wen piipl staat fi sin muor an muor, iivn duo wi neva dizorv it, Gad shuo dem lov muor an muor.

Ruoman 6:13

No lou no paat a unu fi miks op iina sin. No lou sin fi yuuz unu badi fi du aal kain-a wikidnis. Insted-a dat, gi unu laif tu Gad. A laik unu did ded an Gad mek unu kom bak alaiv an a liv nou. So unu mos gi unuself tu Gad. Gi im evri paat a unu so dat im wi yuuz unu fi du wa rait.

Ruoman 6:19

(Mi a yuuz sopm outa unu laif, dis uol ting bout sliev an maasta, fi elp unu andastan wa mi a se. Mi no tingk unu wi andastan ef mi no du dat.) Wan taim unu did tek unuself ton sliev tu aal kain-a naasinis an wikidnis — unu gi op evri paat a unu badi fi tek paat iina aal kain-a sin. A siem so nou unu fi tek unuself ton Gad sliev — unu mos gi op evri paat a unu fi du wa rait. Da wie de unu wi riili bi Gad piipl.

Ruoman 6:21

An wa unu did get fram ou unu did a liv? Di sitn dem we unu did du an we unu shiem bout nou, wa unu did get fram dem? Di onggl ting dem sitn de du, a kaaz piipl fi ded.

Ruoman 6:23

So aal sin du a kaaz piipl fi ded. So ef sin a yu maasta dat a aal yu a-go get. Bot wa Gad gi wi, im gi wi fi frii — a wan gif. Wen wi biliiv iina wi Laad Jiizas Krais, wen wi an im ton wan, Gad mek wi liv fi eva an eva.

Ruoman 7:23

Bot fi mi badi a fala wan difrant laa, an da laa de a go gens di Laa we iina mi ed. Fi mi badi a fala sin laa, an it av mi laik prizna — mi badi du evriting we it se.

1 Korintiyan 15:56

Sin a wa gi det di powa fi ort piipl an sin get fi it powa fram di laa.

2 Korintiyan 10:3

Kaaz iivn duo wi liv iina di worl wi no fait laik ou di worliyan dem fait.

Gyalieshan 3:10

Gad a-go ponish di piipl dem we a fala di Laa an tingk se dat a-go siev dem. Kaaz nobadi kyaahn fala aal a di Laa dem an it rait dong iina Gad wod se, “Enibadi we no fala aal a di Laa dem, Gad a-go ponish dem.”

Gyalieshan 5:24

Di piipl dem we bilang tu Jiizas Krais no mek dem badi ruul dem. Dem no du di wikid sitn dem we dem badi wel waahn du, dem tap dem sitn de. It komiin laik se dem niel dem op pan di kraas an kil dem.

Ifiijan 2:11

“Piipl we no sorkomsaiz,” a dat di Juu dem kaal piipl we neva baan Juu. Di Juu dem kaal demself “piipl we sorkomsaiz,” kaaz fi dem faada sorkomsaiz dem wen dem sumaal, fi shuo se dem a Gad piipl. So memba

Ifiijan 2:3

Matarafak, aal a wi yuus fi liv laka dat wan taim. Wi did a liv onggl fi wa wi badi waahn an fi di rang sitn dem wa wi main tel wi fi du. Wi did komiin jos laik evribadi els we fi get joj an ponish fi dem sin.

Koloshan 3:5

Eniting we insaida unu we bilang tu da worl ya — dash it we! Mi a taak laik seks sin, an ou unu mait-a lang fi go miks op unuself iina dem sitn de. Unu mait-a no tap tingk bout dem, an waahn fi go du dem so til unu galang go du dem. Bot dem de no kliin. Unu fi dash we dat! Plos aal a di sitn dem we unu waahn waahn we no rait; plos di wikid sitn dem we unu waahn fi du. Unu fi klier dem outa unu laif! Kil dem! An unu no fi waahnti-waahnti niida; aal waahn waahn tingz we unu no niid! Wen unu du dat, a worship unu a worship dem sitn de insted-a unu a worship Gad.

Taitos 3:3

Kaaz wan taim wi yuus tu fuul-fuul tu, wi neva waahn fala notn we nobadi se an wi a did sliev tu aal a di wikid sitn dem we wi waahn. Evridie wi beks wid wi wan aneda an wi eva waahn wa sumadi els av. Aal wi du a iet: wi iet evribadi an evribadi iet wi.

Jiemz 1:15

Afta dem don plan, di wikid sitn dem tek kanchuol a dem an mek dem sin. An wen sin don wid dem, it kil dem.

Jiemz 4:1

Mi breda an sista, wa unu tingk a kaaz unu fi a waar an chries aaf unu wan aneda? No di sitn dem we iina unu aat we unu wel waahn an a fait aad aad fi get, iivn duo unu nuo se dem no rait?

1 Jan 3:4

Evribadi we sin brok Gad Laa, kaaz sin a di siem sitn laik wen sumadi brok Gad Laa.