Ruoman 7:14 - Di Jamiekan Nyuu Testiment

¹⁴ Nou wi nuo di Laa kom fram Gad an dat it afi du wid wi spirit. Bot mi, mi a jos wan man. Mi komiin laik wan sliev. Mi a wan sliev an sin a mi maasta — mi afi du wa it se.

Ruoman 7:14 ပူးပေါင်းရင်းမြစ်များ

Matyu 16:23

Bot Jiizas ton tu Piita an se, “Gu we fram mi Sietan! Yu dis a blak op mi wie so, kaa yu naa tingk bout di sitn dem we Gad waahn; a onggl wa piipl waahn de pan yu main!”

Matyu 18:25

Nou, kaa di sorvant kudn pie it bak, di king aada dem fi sel im, an sel im waif an pikni tu, plos aal we im uon so im kuda get bak im moni.

Matyu 5:22

Bot ier wa mi a se, jos beks wid unu breda ar unu sista, an unu afi go a kuot, an di joj a-go se unu gilti an rait unu aaf! An enibadi we shiem dem breda ar sista an tel dem ou dem woklis an dem sitn de, unu a-go afi go a di tap-a-tap joj dem, an enibadi we kaal dem breda ar sista wan woklis gud fi notn fuul — el faiya a-go riich dem.

Matyu 5:28

Bot ier wa mi a tel unu se, unu jos waahn luk pan wan uman we unu no marid tu an waahn ar badi, an a sliip unu don sliip wid ar aredi iina unu aat.

Luuk 5:8

Wen taim Saiman Piita si aal a dis, im jrap dong a Jiizas fut an se, “Kip we fram mi Laad kaaz mi a wan man we du nof rang!”

Luuk 7:6

So Jiizas go wid dem. Wen Jiizas kech nier di ous, di ed suoja sen som a im fren dem fi tel im se, “Laad, no bada yuself, mi no gud inof fi yu kom anda fi mi ruuf.

Ruoman 3:9

So wa? Unu tingk se wi we a Juu beta aaf dan di piipl dem we a no Juu? Nuo sa! Kaaz mi don shuo unu aredi se evribadi, weda dem a Juu ar dem a no Juu, sin kanchuol dem laif — evribadi a sina.

Ruoman 6:6

Wi nuo se di wie wi yuus tu liv, dat don wid — it ded wid Jiizas pan di kraas. It ded wid im so dat sin wudn av no powa uova wi. It ded wid im so dat sin kudn tek wi fi sliev no muor.

Ruoman 7:18

Mi nuo se notn gud no de iina a mi, mi badi naa go mek mi du we rait. Kaaz mi waahn fi du we gud bot mi kyaahn du it.

Gyalieshan 4:3

So yu si wi, wi a laik da pikni de. Wen wi did yong, di spirit dem we did av kanchuol uova di worl did av wi laik sliev.

Ifiijan 3:8

Iivn duo mi no impuotant laik di res a Gad piipl dem, Gad shuo mi lov iivn duo mi no dizorv it an pik mi fi priich tu di piipl dem we a no Juu an fi tel dem bout di nais sitn dem we Krais Jiizas gi im piipl. Dem sitn de so big dat nobadi kyaahn figa dem out.

Iibruu 4:12

Kaaz wen Gad taak, a laik se di sitn dem we im se alaiv, av powa an kyan du tingz! Gad wod kot beta dan eni wan a di tuu-saidid kotlis dem, an aal buor chuu an plit op suol fram spirit, an kot we wich paat di buon dem jain op fram di blod an sitn dem we de insaida di buon dem. It kyan joj we wi tingk iina wi aat an di sitn dem we wi waahn.