Ruoman 6:4 - Di Jamiekan Nyuu Testiment

⁴ Wen wi did get baptaiz, a laik wi did ded an beri wid Jiizas Krais. Wi did ded an beri wid im so dat siem laik ou di Faada yuuz fi im griet powa an mek Krais Jiizas kom bak alaiv, a siem so im wuda mek wi kom bak alaiv an gi wi wan nyuu laif.

Ruoman 6:4 ပူးပေါင်းရင်းမြစ်များ

Jan 11:40

Den Jiizas se, “Duohn mi tel yu se ef yu biliiv, yu wuda si ou Gad big an powaful?”

Jan 2:11

Nou, Jiizas wok uol iip a mirikl an da wan ya a did di fos wan outa aal a dem. Im did du it iina Kiena we de a Gyalalii. Da wie de, im shuo ou im big an powaful. An im falara dem biliiv iina im.

Aks 2:24

Bot Gad mek im kom bak alaiv an frii im fram det powa kaaz det kudn kip im dong fi eva.

Aks 2:32

Gad did mek da siem Jiizas de kom bak alaiv, an di uol a wi did si wid wi uona yai.

Ruoman 6:19

(Mi a yuuz sopm outa unu laif, dis uol ting bout sliev an maasta, fi elp unu andastan wa mi a se. Mi no tingk unu wi andastan ef mi no du dat.) Wan taim unu did tek unuself ton sliev tu aal kain-a naasinis an wikidnis — unu gi op evri paat a unu badi fi tek paat iina aal kain-a sin. A siem so nou unu fi tek unuself ton Gad sliev — unu mos gi op evri paat a unu fi du wa rait. Da wie de unu wi riili bi Gad piipl.

Ruoman 6:3

Unu no nuo se wen wi did get baptaiz, wi an Jiizas ton wan? An wen wi did get baptaiz a laik wi did ded siem laik ou im did ded.

Ruoman 6:8

Nou ef wi did ded wid Krais Jiizas, wi biliiv se wi wi liv wid im tu.

Ruoman 6:9

Wi nuo dat sins Gad mek Krais Jiizas kom bak alaiv im naa go kyan ded agen — det naa no powa uova im.

Ruoman 7:6

Bot nou Gad frii wi fram di Laa. Di Laa did av wi laik prizna bot kaaz wi did ded, wi a no prizna no muor. Nou wi sorv Gad, no wen wi fala di Laa, dat a di uol wie, nou wi sorv im wan nyuu wie. Wi sorv im wen wi liv ou Gad Spirit se wi fi liv.

Ruoman 8:11

A Gad Spirit mek Jiizas kom bak alaiv. So den, ef Gad Spirit a liv iina unu, siem laik ou it mek Jiizas kom bak alaiv a siem so Gad wi yuuz im Spirit fi mek fi wi badi kom bak alaiv afta wi ded.

1 Korintiyan 6:14

Gad yuuz im powa an mek di Laad kom bak alaiv, an im a-go mek wi liv agen tu.

2 Korintiyan 13:4

A chuu se, wen dem did niel im op pan di kraas, im neva shuo im powa — im mek imself wiik, bot Gad powa mek im kom bak alaiv an a liv nou. An siem laik ou im did wiik a siem so mi wiik, bot wan die unu wi si se Gad powa a-go mek mi liv laik ou Krais Jiizas a liv an mi a-go gwaan liv wid im.

2 Korintiyan 5:17

Wen sumadi biliiv iina Krais Jiizas, dem ton wan nyuu sumadi. Dem tap liv di wie dem yuus tu liv bifuo dem biliiv an staat liv difrant.

Ifiijan 4:17

So, lisn nou! Mi a Gad sorvant so mi av di rait fi tel unu wa unu fi du. Unu no fi liv no muo laik di piipl dem we no nuo Gad. We dem piipl de main tel dem fi du no mek no sens.

Ifiijan 5:8

Wan taim, unu did a liv iina di daak laik piipl we no nuo Gad. Bot nou dat unu ton di Laad pikni, unu no iina daaknis agen, unu iina lait. So nou, unu mos liv laik piipl we de iina di lait,

Koloshan 3:10

Unu a nyuu sumadi nou. An Gad a mek unu komiin muo an muo laik im. Da wie de unu kyan riili get fi nuo im — di wan we mek unu, an we mek evriting els.

Koloshan 4:1

Az fi unu we uon sliev, unu fi chriit unu sliev rait an unu fi chriit dem fier. Kaaz unu nuo se unu av wan maasta iina evn tu.

1 Piita 3:21

Dem flod waata de komiin laik baptizam we siev wi ya nou. Baptizam a no fi wash aaf wi badi. Wen wi baptaiz, it miin se wi kanchens klier klier an wi mek wan pramis tu Gad. An dat siev wi kaaz Gad mek Jiizas Krais ded an kom bak alaiv.

1 Jan 2:6

Ef sumadi se Gad liv iina dem, dem fi liv di wie Krais Jiizas liv.