Ruoman 6:23 - Di Jamiekan Nyuu Testiment

²³ So aal sin du a kaaz piipl fi ded. So ef sin a yu maasta dat a aal yu a-go get. Bot wa Gad gi wi, im gi wi fi frii — a wan gif. Wen wi biliiv iina wi Laad Jiizas Krais, wen wi an im ton wan, Gad mek wi liv fi eva an eva.

Ruoman 6:23 ပူးပေါင်းရင်းမြစ်များ

Matyu 25:46

“An dem piipl ya, dem a-go go wich paat dem get ponish fi eva, bot di wan dem we du we rait iina Gad yai, Gad a-go mek dem liv fi eva.”

Jan 10:28

Mi mek dem kyan liv fi eva, an dem naa go ded. Nobadi naa go grab an tek dem outa mi an.

Jan 17:2

Kaa yu gi yu Bwai Pikni powa uova evribadi, so dat im kyan mek di piipl dem we yu gi tu im liv fi eva.

Jan 3:36

Di sumadi we chos iina im Bwai Pikni a-go liv fi eva, bot di wan we no waahn fi av notn fi du wid im naa go liv, an Gad eva a-go ponish im.”

Jan 4:14

bot enibadi we jringk di waata we mi gi'im naa go torsti agen. Yu si, di kain-a waata we mi a-go gi'im gweehn ton wan spring iina im, wan we no tap ron, an we kaaz im fi liv fi eva.”

Jan 4:36

Di sumadi we gyada op di fuud a get fi'im pie, an di fuud we im de gyada a piipl we gweehn liv fi eva. So nou, im we plaant an im we gyada, di tuu a dem gweehn glad tugeda.

Jan 5:24

“Mi de tel unu fi chuu chuu, enibadi we ier we mi se an chos iina di wan we sen mi, a-go liv fi eva. Dem naa go get sen fi ded. Nuo! Dem get muuv uova fram we paat dem wuda ded, an gaan uova tu we paat dem gweehn liv.

Jan 6:27

No wok fi fuud we kyan pwail an we naa go laas no taim. Wok fi di kain-a fuud we a-go mek unu liv fi eva, a dat de fuud di Man we Gad Pik gweehn gi unu. Faada Gad put im speshal maak pan im fi shuo se im av di rait fi du we im du.”

Jan 6:40

Kaa mi Faada waahn evribadi we si di Bwai Pikni fi uu im riili bi an we chos iina im fi liv fi eva, an a mi a-go mek dem kom bak alaiv pan di laas die.”

Jan 6:68

Saiman Piita ansa im an se, “Laad, a uu els wi mos go tu? A yu av di mesij we kaaz piipl fi liv fi eva.

Ruoman 1:32

Iivn duo dem nuo se Gad se enibadi we a tek paat iina dem sitn de, dizorv fi ded, dem gwaan liv dem laif siem wie. Wos dem aal a tel ada piipl se a gud sitn dem a du wen dem tek paat iina dem sitn de tu.

Ruoman 2:7

Yu av som piipl we a liv rait an we aalwiez a du gud fi ada piipl. Dem piipl de waahn Gad fi taak gud bout dem. Dem waahn im fi big dem op an mek dem liv fi eva. An a dem de piipl de Gad a-go mek liv fi eva an eva.

Ruoman 5:12

A wan man kaaz sin fi kom iina di worl, an a da man de sin kaaz im fi ded. An siem ou it go wid im a siem so it go wid evribadi — evribadi sin so evribadi a-go ded.

Ruoman 5:17

A chuu se siek-a wan man sin, evribadi did afi ded, bot yu si wa apm siek-a wa Jiizas Krais did du, dat moch moch muor powaful dan we Adam did kaaz. Siek-a wa Jiizas du, Gad shuo wi lov iivn duo wi neva dizorv it. Gad put tingz rait bitwiin im an piipl siek-a wa Jiizas did du an evribadi we Gad mek tingz rait wid a-go ruul wid Jiizas wen dem riich a evn.

Ruoman 5:21

Im du dat, so dat, jos laik ou evribadi evriwe did a ded siek-a dem sin, a siem so Gad lov, iivn duo wi neva dizorv it, wuda kaaz piipl fi liv fi eva. Siek-a Gad lov an siek-a wa wi Laad Jiizas Krais du, Gad put tingz rait bitwiin im an piipl an mek dem liv fi eva an eva.

Ruoman 6:16

Unu mos nuo se, wen unu tek unuself ton sumadi sliev an se unu a-go fala unu maasta, unu afi du evriting we unu maasta se. Nou unu kyan chuuz fi mek sin unu maasta an ded ar unu kyan mek Gad unu maasta an mek im put tingz rait bitwiin unu an im.

Ruoman 6:21

An wa unu did get fram ou unu did a liv? Di sitn dem we unu did du an we unu shiem bout nou, wa unu did get fram dem? Di onggl ting dem sitn de du, a kaaz piipl fi ded.

Ruoman 8:13

(Ef yu liv ou yu badi wuda waahn yu fi liv, yu mos ded.) Bot ef yu mek di Spirit elp yu, yu kyan tap du di sitn dem we yu badi waahn yu fi du, an den yu wi liv.

Ruoman 8:38

Kaaz mi nuo fi shuor se notn at aal kyan mek Krais Jiizas tap lov wi. It no mata ef wi ded ar wi alaiv, im naa tap lov wi. No ienjel, ruula ar powa iina evn kyan tap im fram lov wi. Notn we a apm nou an notn we a-go apm, wi mek im tap lov wi.

Ruoman 8:39

Mi nuo fi shuor se, notn we de wie op iina di skai ar we de anda di ort kyan mek im tap lov wi. Az a matarafak, notn we Gad mek, notn at aal kyan tek we di lov we kom fram Gad an we Krais Jiizas shuo wi.

Ruoman 8:6

Nou, ef yu onggl a tingk bout di sitn dem we yu badi waahn fi du, yu a-go ded. Bot ef aal yu a tingk bout a di sitn dem we Gad Spirit waahn yu fi du, Gad wi mek yu riili liv an gi yu piis iina yu aat.

Gyalieshan 3:10

Gad a-go ponish di piipl dem we a fala di Laa an tingk se dat a-go siev dem. Kaaz nobadi kyaahn fala aal a di Laa dem an it rait dong iina Gad wod se, “Enibadi we no fala aal a di Laa dem, Gad a-go ponish dem.”

Taitos 1:2

An wen dem andastan Gad wod it wi gi dem sopm fi luk faawod tu. Dem wi luk fi si an nuo fi shuor se Gad wi mek dem liv fi eva. Kaaz lang bifuo di worl did mek Gad pramis fi mek wi liv fi eva, an Gad no lai.

Jiemz 1:15

Afta dem don plan, di wikid sitn dem tek kanchuol a dem an mek dem sin. An wen sin don wid dem, it kil dem.

1 Jan 2:25

An wa di Bwai Pikni did pramis a dis: im se wi a-go liv fi eva.

Revilieshan 21:8

Bot di wan dem we a kowad, we no biliiv iina Gad, we mek demself doti wid aal a di naasi sitn we dem du, we kil piipl, we tek paat iina aal kain-a seks sin, we wok uobiya, we worship faalz gad an we tel lai — dem a-go get fling dong iina di liek a faiya we a bon wid solfa. A dis a di sekan det.”