Ruoman 6:14 - Di Jamiekan Nyuu Testiment

¹⁴ No mek sin kanchuol unu, kaaz unu no afi fala di Laa no muor. Di Laa kyaahn siev unu. Unu get siev kaaz Gad shuo unu lov iivn duo unu neva dizorv it.

Ruoman 6:14 ပူးပေါင်းရင်းမြစ်များ

Gyalieshan 5:18

Bot ef Gad Spirit liid unu, di Laa naa no powa uova unu.

Ruoman 8:2

Kaaz di Spirit we riili gi laif an we kaaz wi fi ton wan wid Krais Jiizas, da Spirit de set wi frii. Im set wi frii fram di laa we kaaz piipl fi sin an ded.

Iibruu 8:10

Bot nou, afta dem die de, dis a di nyuu pramis we mi a mek wid di Izrel piipl dem, di Laad se. Mi a-go put mi laa dem iina dem ed an mi a-go rait dem dong pan dem aat. Mi a-go bi fi dem Gad, an dem a-go bi fi mi piipl dem.

Ruoman 6:12

So unu mosn mek sin ruul uova unu badi no muor. No mek it ruul uova unu, so dat unu wudn du di sitn dem wa unu badi waahn unu fi du.

Jan 8:36

So ef di Bwai Pikni frii unu, unu frii fi chuu.

Jan 1:17

Kaaz, yu si, Gad gi Muoziz di Laa fi gi wi, bot im yuuz Jiizas fi mek wi nuo wa chuu, an siek-a Jiizas, im shuo wi lov we wi no dizorv.

Gyalieshan 3:23

Bifuo di taim kom wen wi kuda chos iina Jiizas an get siev, di Laa did av wi laik prizna. An it did av wi laik prizna til a did taim fi Gad shuo se wi kuda mek tingz rait wid im ef wi biliiv iina Jiizas.

Ruoman 8:12

So den breda an sista, wi afi liv ou Gad Spirit waahn wi fi liv. Wi no fi fala wi badi, an liv ou it waahn wi fi liv.

Matyu 1:21

Shi a-go av wan bwai pikni an yu fi kaal im Jiizas, kaa im a-go siev im piipl dem fram dem sin.”

Taitos 2:14

Im a di wan we gi op im laif fi siev wi fram aal kain-a wikidnis an mek wi kliin so wi kuda bi im piipl; piipl we eva a chrai fi du gud.

Gyalieshan 4:21

Tel mi sopm, aal a unu we waahn fi fala di Laa an mek it kanchuol unu, unu no andastan wa di Laa a se?

Ruoman 11:6

A no notn we dem du mek im pik dem, im pik dem kaaz im mek op im main fi shuo dem lov iivn wen dem no dizorv it. Ef a neva so it go, ef Gad did a pik piipl bies pan wa dem du, den a no gud an kain im wuda a gud an kain tu piipl.

Ruoman 4:16

A dat mek Gad neva mek im pramis bies pan weda piipl fala ar no fala di Laa, bot bies pan weda dem chos ar no chos iina im. Gad mek it da wie de so dat piipl wuda nuo se di sitn dem we im pramis a fi im frii gif tu aal a Iebriyam pikni dem. No jos di pikni dem we a fala di Laa bot tu di wan dem we biliiv laik Iebriyam tu. Iebriyam a di faada fi evribadi.

Ruoman 6:15

Di Laa kyaahn siev wi, so wi no afi fala it. Wi get siev kaaz Gad shuo wi lov iivn duo wi neva dizorv it. So den wa unu tingk dat miin? Unu tingk it miin se wi kyan gwaan liv iina sin? Nuo sa! Notn kyaahn go so!

Jan 1:14

Nou, di wan we a di Wod ton man, im kom kom liv mongks wi, an wi si ou im big an powaful. Im a Faada Gad wan an onggl dege-dege Bwai Pikni. Faada Gad sen im kom an a di Faada mek im so big an powaful. Di Bwai Pikni shuo wi nof nof lov iivn duo wi no dizorv it, an a bier chuu sitn im shuo wi bout Gad.

Ruoman 5:17

A chuu se siek-a wan man sin, evribadi did afi ded, bot yu si wa apm siek-a wa Jiizas Krais did du, dat moch moch muor powaful dan we Adam did kaaz. Siek-a wa Jiizas du, Gad shuo wi lov iivn duo wi neva dizorv it. Gad put tingz rait bitwiin im an piipl siek-a wa Jiizas did du an evribadi we Gad mek tingz rait wid a-go ruul wid Jiizas wen dem riich a evn.

Ruoman 5:18

So a wan man sin mek Gad joj piipl an se dat dem fi get ponish fi dem sin dem. A siem so a wan man — wan man we aalwiez du we rait, a im mek Gad put tingz rait wid piipl an mek dem liv fi eva an eva.