Ruoman 6:12 - Di Jamiekan Nyuu Testiment

¹² So unu mosn mek sin ruul uova unu badi no muor. No mek it ruul uova unu, so dat unu wudn du di sitn dem wa unu badi waahn unu fi du.

Ruoman 6:12 ပူးပေါင်းရင်းမြစ်များ

Gyalieshan 5:16

Mi a tel unu liv unu laif laik ou Gad Spirit se unu fi liv. Da wie de unu naa go gi iin tu sin an du di rang sitn dem we unu eva waahn fi du.

Ruoman 6:16

Unu mos nuo se, wen unu tek unuself ton sumadi sliev an se unu a-go fala unu maasta, unu afi du evriting we unu maasta se. Nou unu kyan chuuz fi mek sin unu maasta an ded ar unu kyan mek Gad unu maasta an mek im put tingz rait bitwiin unu an im.

Ruoman 8:13

(Ef yu liv ou yu badi wuda waahn yu fi liv, yu mos ded.) Bot ef yu mek di Spirit elp yu, yu kyan tap du di sitn dem we yu badi waahn yu fi du, an den yu wi liv.

Gyalieshan 5:24

Di piipl dem we bilang tu Jiizas Krais no mek dem badi ruul dem. Dem no du di wikid sitn dem we dem badi wel waahn du, dem tap dem sitn de. It komiin laik se dem niel dem op pan di kraas an kil dem.

2 Korintiyan 4:11

So iivn duo wi alaiv nou, wi nuo se enitaim, enidie wi kyan ded kaaz wi a priich bout Jiizas. Bot wi wi gwaan priich an sofa til dem kil wi so dat piipl wi luk pan wi badi an nuo se Jiizas alaiv an dat a im a kip wi alaiv.

2 Timoti 2:22

So ron we fram di wikid sitn dem we di yong piipl dem waahn fi du an chrai aad aad fi du we rait. Yu mos liv ou Gad waahn yu fi liv an yu fi shuo lov an tek taim wid ada piipl. Chos iina Jiizas an no gi op. Timoti dis a wa yu fi du. An aal a di piipl dem we worship Gad wid wan kliin aat fi du it tu.

Ifiijan 4:22

Unu lorn se unu fi don we wid di uol laif we unu yuus tu liv an aal a di woklis sitn dem unu yuus tu du, wen unu neva did a fala Jiizas. Dem taim de, unu did lov di wikid sitn dem we onggl did a mash op unu laif.

Ruoman 2:8

Bot yu av som ada piipl we onggl bizniz bout demself — dem no du notn fi elp ada piipl. Dem mek op dem main se dem naa du wa rait — dem onggl a-go du we Gad se rang. Dem piipl de Gad a-go shuo dem se im beks wid dem, im a-go ponish dem aad aad.

1 Piita 2:11

Mi fren, mi a beg unu du, laik ou unu a farina pan ort, we a-go de ya fi nou mongks chrienja, no bada du wa di badi waahn — di badi a waar wid di suol.

Taitos 2:12

Di gud we im du fi wi, tiich wi ou fi ton we fram wikidnis an fi no lov di sitn dem we di worliyan dem waahn.

Ifiijan 2:3

Matarafak, aal a wi yuus fi liv laka dat wan taim. Wi did a liv onggl fi wa wi badi waahn an fi di rang sitn dem wa wi main tel wi fi du. Wi did komiin jos laik evribadi els we fi get joj an ponish fi dem sin.

Juud 1:18

Dem did tel unu se iina di laas die dem, di taim wen di worl bout fi don, unu gweehn av som piipl we gweehn mek fon a Gad an im mesij an im piipl. Dem a-go liv onggl fi di wikid sitn dem we dem waahn.

1 Piita 1:14

Laik som nais likl pikni we a fala Gad, no bada gi iin tu di bad sitn dem we unu yuus fi lang fa wen unu neehn nuo no beta, an go bak go du dem.

Taitos 3:3

Kaaz wan taim wi yuus tu fuul-fuul tu, wi neva waahn fala notn we nobadi se an wi a did sliev tu aal a di wikid sitn dem we wi waahn. Evridie wi beks wid wi wan aneda an wi eva waahn wa sumadi els av. Aal wi du a iet: wi iet evribadi an evribadi iet wi.

1 Tesaluoniyan 4:5

Unu no fi go roun an a dabl-dabl iina seks sin laik di worliyan dem we no nuo Gad.

Ruoman 13:14

Insted-a aal a dat, unu fi mek Jiizas Krais ruul uova unu an tap tingk bout di wikid sitn dem we unu badi waahn fi du an ou unu kyan get dem sitn de.

Ruoman 8:11

A Gad Spirit mek Jiizas kom bak alaiv. So den, ef Gad Spirit a liv iina unu, siem laik ou it mek Jiizas kom bak alaiv a siem so Gad wi yuuz im Spirit fi mek fi wi badi kom bak alaiv afta wi ded.

Ruoman 6:14

No mek sin kanchuol unu, kaaz unu no afi fala di Laa no muor. Di Laa kyaahn siev unu. Unu get siev kaaz Gad shuo unu lov iivn duo unu neva dizorv it.

Ruoman 5:21

Im du dat, so dat, jos laik ou evribadi evriwe did a ded siek-a dem sin, a siem so Gad lov, iivn duo wi neva dizorv it, wuda kaaz piipl fi liv fi eva. Siek-a Gad lov an siek-a wa wi Laad Jiizas Krais du, Gad put tingz rait bitwiin im an piipl an mek dem liv fi eva an eva.

Juud 1:16

Dem piipl de no du notn bot grombl an paint fingga pan ada piipl; eniting we dem wikid aat tel dem fi du — a dat dem du. Dem buos bout demself an swiit-taak piipl so dem kyan yuuz dem fi di rang riizn.

2 Korintiyan 5:4

Nou wen mi se a jos wiet wi a wiet fi put aan di nyuu badi, mi no miin se a ded wi jos waahn fi ded so dat wi kyan dash we da badi ya. Wa mi a se a dat wi wel waahn fi put aan di nyuu badi kaaz da badi de a-go laas fi eva. It no komiin laik da badi ya we kyan mash op an ded.