5 An kaaz wi nuo se Gad a-go gi wi we im pramis, wi no afi wori. Wi no afi wori kaaz wi nuo se Gad lov wi. Im shuo wi umoch im lov wi wen im gi wi di Uoli Spirit.
“Gad se, ‘Iina di laas die dem, mi a-go put mi Spirit iina piipl evriwe. Unu bwai pikni dem an unu gyal pikni dem a-go priich mi mesij. Unu yong man dem a-go get vijan fram Gad, an unu uol man dem a-go andastan Gad mesij chuu di jriim dem we dem get fram Gad.
So Gad big op Jiizas an put im fi sidong a im rait an. An Faada Gad gi im Bwai Pikni di Uoli Spirit jos laik im did pramis. So aal wa unu a si an a ier ya nou, a Jiizas mek dem a apm.
So mi a rait da leta ya tu aal a unu iina Ruom we Gad lov an uu im kaal fi bi im piipl. Mi prie se wi Faada Gad an di Laad Jiizas Krais wi shuo unu lov iivn duo wi no dizorv it an gi unu piis iina unu aat.
Wi nuo se aal di piipl we lov Gad an we Gad kaal fi tek paat iina im plan, wi nuo se Gad wok wid dem fi mek shuor se no mata wa apm, evriting wok out fi fi dem gud.
A dat Gad wod did a taak bout. It rait dong se Gad se: “Lisn Gud! Mi a put wan stuon iina Zaiyan we a-go chrip piipl — wan stuon we a-go kaaz piipl fi faal dong. Bot di piipl we biliiv iina mi, mi naa go mek dem shiem.”
An so aal a wi we bilang tu Jiizas, fi wi fies no kova op an wi kyan luk pan di Laad brait brait lait. An di Uoli Spirit we a di Laad kaaz wi fi shain brait brait tu. An muor an muor im a mek wi laik imself, til wan die wi a-go luk jos laik im.
Di Gad we se, “Mek di lait shain iina di daak,” a im siem wan mek im lait shain iina wi aat so dat wi kyan andastan umoch im lov wi an ou powaful im bi. An wi onggl get fi andastan dem sitn de wen wi biliiv iina Krais Jiizas.
Bot Gad Spirit kaaz fi im piipl fi lov evribadi an aalwiez api no mata wa. It kaaz dem fi liv gud wid piipl, no fi lov fait an fi aalwiez tek taim wid ada piipl. Di Spirit mek dem kain an mek dem eva a du gud fi piipl. It kaaz dem fi bi sumadi we piipl kyan chos.
An wen unu did ier Gad wod — di chuu mesij we siev unu — wen unu biliiv iina Krais Jiizas, Gad gi unu im Uoli Spirit we im did pramis, fi shuo se unu a fi im.
No du notn fi mek Gad Uoli Spirit afi baal. A im liv iina unu an put im speshal maak pan unu fi shuo se unu bilang tu Gad an se wan die Gad a-go frii unu kaaz a dat im siev unu fa.
So diip dong iina mi aat, mi riili chos se notn we mi du ar we mi se a-go mek mi shiem. Bot laik mi aalwiez du, an a du rait ya nou, mi eva a-go priich an no fried a notn, an mi eva a-go mek Krais Jiizas get nof rispek, weda mi ded ar alaiv.
Nou, wi prie tu wi Laad Jiizas Krais imself an wi Faada Gad — Gad lov wi an no tap gi wi gud wod fi mek wi aat chrang, an im mek wi kyan luk faawod tu som gud sitn tu we im pramis fi gi wi, duo wi no dizorv dem at aal at aal.
A kaaz mi tiich di Gud Nyuuz mek mi a sofa nou. Bot iivn duo mi iina prizn mi no shiem, kaaz mi nuo uu mi biliiv iina. An mi nuo se im wi kip sief aal a di sitn dem we im chos mi wid til di die Gad kom fi joj wi.