Ruoman 5:4 - Di Jamiekan Nyuu Testiment

⁴ An wen wi sofa chuu nof sitn an no gi op, Gad wi proud a wi kaaz a tes im did a tes wi an a paas wi paas di tes. An wen wi si se Gad proud a wi, wi wi nuo se im wi gi wi aal wa im pramis wi.

Ruoman 5:4 ပူးပေါင်းရင်းမြစ်များ

1 Piita 5:10

Bot afta unu sofa likl, di Gad we lov unu so til, we no uol bak non a im lov fram unu, im sed wan we kaal unu fi enjai im powa we kyaahn don, kaaz unu a fala Krais Jiizas — im a-go fiks bak evriting fi unu agen, an di chos unu chos iina im, im a-go mek dat chrang chrang. Im a-go mek unu aat chrang tu, so unu kyan anggl di sofarieshan. An im a-go mek shuor se unu tan op chrang iina im no mata ou rof it mait-a get.

Jiemz 1:12

Ef unu uol aan chrang an no gi op wen unu a go chuu chraiyal an kraasiz we kom fi tes unu, unu a-go wel api. Kaaz wen unu tes don, Gad gweehn gi unu di kroun a laif we im pramis fi gi evribadi we lov im.

Ruoman 15:4

Evriting we rait dong iina Gad wod, rait dong fi tiich wi an fi elp push wi fi tan op chrang an no gi op so dat wi kyan gwaan luk fi get di sitn dem we Gad pramis wi.

Luuk 21:19

Uu tan op chrang fi mi no mata wa, wi siev dem laif.

Filipiyan 2:22

Bot unu wel nuo se di wie ou Timoti liv shuo se im riili wok gud fi chuu, kaaz siem laik ou wan faada an im bwai pikni wok wid dem wan aneda, a siem so im wok kluos wid mi fi pred di Gud Nyuuz.

Iibruu 6:19

Wen wi chos Gad, an wi nuo fi shuor se im a-go gi wi wa im pramis wi, dat mek wi suol chrangga, an notn we a gwaan kyaahn kom shiek wi op. Wi tan todi jos laik wen di angka fi di ship jrap a di batam a di sii so di ship tan wan plies. An wen wi chos iina Gad so, di sitn dem we wi set wi aat pan, dem sitn de go insaid baka di kortn, go wan speshal speshal plies we Gad tan an we di priis dem wan kyan go.