Ruoman 4:11 - Di Jamiekan Nyuu Testiment

¹¹ An a lang afta dat apm Iebriyam go get sorkomsaiz. Im go get sorkomsaiz fi shuo se Gad did mek tingz rait bitwiin di tuu a dem iivn duo im neva sorkomsaiz, an Gad did du it kaaz Iebriyam did biliiv iina im. So Iebriyam komiin laik di faada fi aal a di piipl dem we neva get sorkomsaiz bot uu Gad mek tingz rait bitwiin im an dem kaaz dem biliiv iina im.

Ruoman 4:11 ပူးပေါင်းရင်းမြစ်များ

Ruoman 3:22

Gad onggl mek tingz rait bitwiin im an piipl wen dem biliiv iina Jiizas Krais. A so it go fi evribadi weda yu a Juu ar yu a no Juu.

Luuk 19:9

Jiizas se tu im se, “Tide da fambili ya get siev, kaaz da man ya, a wan a Iebriyam pikni tu.

Iibruu 11:7

Afta Gad waan Nowa bout di sitn dem we Nowa kudn si yet, a kaaz Nowa chos iina Gad an av nof nof rispek fi im mek im lisn we Gad se an go bil wan big buot fi siev im fambili. Kaaz Nowa did chos iina Gad so, im kot aaf imself fram di piipl dem iina di worl an shuo se dem rang kaa dem no chos iina Gad. Gad se, “Nowa a sumadi we du wa rait” kaaz Nowa chos iina im.

2 Korintiyan 1:22

Im maak wi fi shuo se wi bilang tu im an gi wi di Spirit iina wi aat so wi wuda nuo se im a-go gi wi aal we im pramis fi gi wi.

Filipiyan 3:9

Mi waahn Jiizas fi tek ful kanchuol a mi — badi an suol. Mi naa dipen pan notn we di Laa se, ar we mi kyan du fi mek miself rait iina Gad yai. Mi a dipen pan di rait sitn dem we Jiizas du, kaaz fi get rait iina Gad yai yu afi dipen onggl pan wa Jiizas du.

Ifiijan 4:30

No du notn fi mek Gad Uoli Spirit afi baal. A im liv iina unu an put im speshal maak pan unu fi shuo se unu bilang tu Gad an se wan die Gad a-go frii unu kaaz a dat im siev unu fa.

Ifiijan 1:13

An wen unu did ier Gad wod — di chuu mesij we siev unu — wen unu biliiv iina Krais Jiizas, Gad gi unu im Uoli Spirit we im did pramis, fi shuo se unu a fi im.

Gyalieshan 6:16

Fi evribadi we grii wid mi — mi prie se Gad wi gi dem piis an dat im wi gud an kain tu dem an aal a im piipl dem.

Gyalieshan 5:5

Bot yu si wi, di wan dem we a chos iina Jiizas Krais, di Uoli Spirit mek wi nuo fi shuor se wi a-go get aal a wa Gad pramis fi gi wi. So wi kyan wiet an luk fi aal we Gad pramis fi gi wi kaaz Gad mek tingz rait bitwiin wi an im aredi.

Gyalieshan 3:29

An ef unu bilang tu Krais Jiizas, den unu a Iebriyam pikni an aal a di sitn dem we Gad pramis fi gi Iebriyam, unu wi get tu.

Gyalieshan 3:22

Bot a no so it go. Iina Gad wod it rait dong se, sin av powa uova evribadi iina di worl, it komiin laik se wi iina prizn. An so Gad pramis fi siev wi an mek wi liv fi eva ef wi biliiv iina Jiizas Krais.

Gyalieshan 3:7

So unu niid fi andastan se di wan dem we chos iina Gad laik Iebriyam — a dem a Iebriyam pikni.

Ruoman 10:11

Jos laik Gad wod se, “Nobadi we put dem chos iina im a-go shiem,”

Ruoman 10:6

Bot dis a wa Gad wod se bout di piipl we get put rait wid Gad kaaz dem biliiv, it se: “No bada tingk tu unuself, ‘A uu a-go go op iina evn?’” (an wen unu a tingk dat, wa unu miin se, a uu a-go go op iina evn an aks Krais Jiizas fi kom dong kom siev wi.)

Ruoman 10:4

Bot Krais Jiizas mek it so dat wi no afi fala di Laa no muor; Gad wi mek tingz rait bitwiin im an enibadi we biliiv iina Krais Jiizas.

Jan 6:35

Den Jiizas se tu dem se, “A mi a di bred we gi laif. Di sumadi we kom tu mi naa go onggri agen. Di sumadi we chos iina mi naa go torsti agen.

Revilieshan 9:4

Gad gi dem powa fi bait piipl an aada dem se dem onggl fi mek di wan dem we no av fi im maak iina dem farid sofa. Bot dem no fi chobl di graas, ar di griin plaant, ar non a di chrii dem pan di ort.

2 Piita 1:1

Mi a Saiman Piita, wan a Jiizas Krais sorvant an apasl dem. Mi a wan a di twelv man dem we did a waak wid im. Mi a rait aal a unu we wi Gad, an Jiizas Krais di wan we siev wi, mek biliiv iina im. Im siev wi so unu kuda get fi biliiv iina im jos laik ou wi biliiv iina im. An im du dat kaaz im no paashal at aal at aal, bot kaaz im gud an kain.

Ruoman 9:30

So den wa wi kyan se bout aal a dat? Wi kyan se dat di piipl we a no Juu, dem neva did a luk fi Gad put tingz rait wid dem, bot Gad mek tingz rait bitwiin im an dem kaaz dem chos iina im.

Ruoman 9:6

Mi naa se Gad brok im pramis dem — Gad du evriting we im pramis fi du, bot a no evribadi we baan iina Izrel a riili Gad piipl.

Ruoman 3:26

Bot iina dem ya taim ya Gad naa go tek taim wid piipl, im a-go ponish dem fi di rang we dem du. Wen im sen Jiizas im shuo wi se im aalwiez du we rait an dat im wi mek tingz rait bitwiin im an piipl, aal dem afi du fi get dem sin dem paadn, a fi biliiv iina Jiizas.

Jan 8:33

Dem ansa im an se, “Wi a Iebriyam pikni an wi neehn a nobadi sliev bifuo. So, ou kom yu fi a se, ‘Di chuut gweehn frii unu’?”

Jan 6:47

Mi a tel unu fi chuu chuu: enibadi we chos iina mi gweehn liv fi eva.

Jan 6:40

Kaa mi Faada waahn evribadi we si di Bwai Pikni fi uu im riili bi an we chos iina im fi liv fi eva, an a mi a-go mek dem kom bak alaiv pan di laas die.”

Jan 3:36

Di sumadi we chos iina im Bwai Pikni a-go liv fi eva, bot di wan we no waahn fi av notn fi du wid im naa go liv, an Gad eva a-go ponish im.”

Matyu 16:16

Saiman Piita se, “Yu a di Krais, di Gad we alaiv Bwai Pikni.”

Matyu 8:11

Ier mi no, uol iip a piipl fram iis an wes a-go kom sidong iit big dina wid Iebriyam, Aizak an Jiekob op a evn iina Gad kindom.

Ruoman 9:33

A dat Gad wod did a taak bout. It rait dong se Gad se: “Lisn Gud! Mi a put wan stuon iina Zaiyan we a-go chrip piipl — wan stuon we a-go kaaz piipl fi faal dong. Bot di piipl we biliiv iina mi, mi naa go mek dem shiem.”

Jan 3:33

Di sumadi we tek iin an fala wa im se shuo klier klier se wa Gad se a chuu sitn.

Ruoman 3:30

A onggl wan Gad de, an a im a Gad fi di Juu dem an di piipl dem we a no Juu. Gad a-go mek tingz rait bitwiin im an di Juu dem wen dem biliiv siem laik ou im wi mek tingz rait bitwiin im an di piipl dem we a no Juu wen dem biliiv.

Ruoman 4:10

A wen unu tingk Gad did du dat? Unu tingk im du it bifuo ar afta Iebriyam get sorkomsaiz? Gad did mek tingz rait bitwiin im an Iebriyam bifuo Iebriyam did sorkomsaiz.