Ruoman 3:10 - Di Jamiekan Nyuu Testiment

¹⁰ A siem so it se iina Gad wod. It rait dong se: “Nobadi, no iivn wan sumadi, du we rait iina Gad yai.

Ruoman 3:10 ပူးပေါင်းရင်းမြစ်များ

Matyu 15:19

Kaaz a outa di aat aal kain-a wikidnis we piipl tingk op kom fram. Wen sumadi go kil, go sliip wid sumadi we dem no marid tu ar gwaan wid aal kain-a ada seks sin, wen piipl tiif, tel lai, ar tek dem mout tier dong ada piipl — a di aat dem sitn de kom fram.

Maak 10:18

Jiizas aks im se, “Wa mek yu kaal mi gud? Nobadi no gud, onggl Gad wan.

Ruoman 11:8

A siem so it rait iina Gad wod se, “Gad mek it so dat dem kyaahn fiil ar andastan notn; dem av yai we kyaahn si an iez we kyaahn ier, an tu da die ya, a so dem tan.”

Ruoman 3:11

Nobadi no riili nuo we rait, Nobadi no riili waahn fi nuo Gad.

Ruoman 3:23

Kaaz evribadi du rang — evribadi a sina. Gad did mek wi laik im an wi did fi tan laik im bot siek-a sin dat neehn apm.

Ruoman 3:4

Notn kyaahn go so! Gad wi aalwiez du wa im se im a-go du, iivn wen piipl lai an se dem du wa dem did pramis fi du. It aal rait dong iina Gad wod se: “Evritaim Gad taak, piipl wi si se wa im a se a chuu sopm. No mata wa piipl se gens Gad, a Gad a-go win.”

Taitos 3:3

Kaaz wan taim wi yuus tu fuul-fuul tu, wi neva waahn fala notn we nobadi se an wi a did sliev tu aal a di wikid sitn dem we wi waahn. Evridie wi beks wid wi wan aneda an wi eva waahn wa sumadi els av. Aal wi du a iet: wi iet evribadi an evribadi iet wi.

1 Piita 1:16

Kaaz it rait dong se, “Unu fi tan kliin an no dabl-dabl iina sin, kaa mi kliin an mi na'av notn fi du wid sin.”

Revilieshan 21:8

Bot di wan dem we a kowad, we no biliiv iina Gad, we mek demself doti wid aal a di naasi sitn we dem du, we kil piipl, we tek paat iina aal kain-a seks sin, we wok uobiya, we worship faalz gad an we tel lai — dem a-go get fling dong iina di liek a faiya we a bon wid solfa. A dis a di sekan det.”

Revilieshan 22:15

Bot di piipl dem we mek demself doti wid aal kain-a naasinis kyaahn go iina di siti: piipl we wok uobiya, du aal kain-a seks sin, kil piipl, worship faalz gad, an piipl we lov fi tel lai, non a dem kyaahn go iina di siti.