Ruoman 2:10 - Di Jamiekan Nyuu Testiment

¹⁰ Bot di piipl dem we eva a du gud an we a liv rait, Gad a-go big dem op an taak gud bout dem. Im a-go gi dem piis iina dem aat. Gad a-go du dat fi piipl we a Juu an fi piipl we a no Juu tu.

Ruoman 2:10 ပူးပေါင်းရင်းမြစ်များ

1 Piita 1:7

Dem ya chraiyal ya, a fi tes umoch unu chos iina Gad, fi mek shuor se unu riili chos iina im, jos laik ou dem tes guol iina faiya fi mek shuor se di guol riil fi chuu. An di chos we unu chos iina Gad — dat wot muo dan guol, kaa guol kyan mash op. So iivn duo unu a go chuu faiya kaa unu chos iina Gad, unu wi gwaan chos iina im siem wie an paas di tes, so Gad wi priez unu an ana unu wen Jiizas Krais kom bak.

Jiemz 3:13

Enibadi mongks unu waiz an av sens? Ef unu liv gud, ombl unuself an du wa rait, dat wi shuo se unu waiz.

Ruoman 8:6

Nou, ef yu onggl a tingk bout di sitn dem we yu badi waahn fi du, yu a-go ded. Bot ef aal yu a tingk bout a di sitn dem we Gad Spirit waahn yu fi du, Gad wi mek yu riili liv an gi yu piis iina yu aat.

Ruoman 2:7

Yu av som piipl we a liv rait an we aalwiez a du gud fi ada piipl. Dem piipl de waahn Gad fi taak gud bout dem. Dem waahn im fi big dem op an mek dem liv fi eva. An a dem de piipl de Gad a-go mek liv fi eva an eva.

Luuk 1:79

It a-go shain pan di wan dem we a liv iina di daak an we fried fi ded. An im a-go shuo wi ou fi liv iina piis.”

Jiemz 2:22

So unu si se wa Iebriyam du shuo se im riili biliiv Gad.

Gyalieshan 5:6

Kaaz wen yu an Jiizas a wan it no mata ef yu sorkomsaiz ar yu no sorkomsaiz. Di onggl ting wa mata a dat yu chos iina im. An yu shuo se yu chos iina im wen yu shuo lov.

Ruoman 5:1

Gad put tingz rait bitwiin wi an im, kaaz wi biliiv iina im. An siek-a wa wi Laad Jiizas Krais did du, wi an Gad a liv iina piis.

Ruoman 2:9

Di piipl dem we a du aal kain-a wikidnis, Gad a-go mek dem fiil nof pien — im a-go mek dem sofa. Im a-go du dat tu piipl we a Juu an tu piipl we a no Juu.

Jan 16:33

“Mi tel unu dem sitn ya so dat unu kyan av piis iina unu aat kaa mi an unu a wan. Iina da worl ya, unu gweehn av chobl an sofarieshan. Bot no fret! Mi don win di fait wid di worl.”

Filipiyan 4:7

Wen unu du dat, Gad wi gi unu piis iina unu aat an main iina wan wie we unu kyaahn iivn andastan. Im a-go du it so unu no afi wori bout notn, kaaz unu an di Laad a wan.

Gyalieshan 5:22

Bot Gad Spirit kaaz fi im piipl fi lov evribadi an aalwiez api no mata wa. It kaaz dem fi liv gud wid piipl, no fi lov fait an fi aalwiez tek taim wid ada piipl. Di Spirit mek dem kain an mek dem eva a du gud fi piipl. It kaaz dem fi bi sumadi we piipl kyan chos.

Ruoman 15:13

Mi prie se Gad, Gad we kaaz piipl fi luk fa an nuo fi shuor se dem wi get wa im pramis, mi prie se im wi gi unu piis iina unu aat an mek unu aat api, api kyaahn don kaaz unu biliiv iina im. Mi prie se im du dat, so dat di Uoli Spirit wi kaaz unu muor an muor fi luk fi get di sitn dem we Gad pramis an nuo fi shuor se yu wi get dem.

Ruoman 14:17

Kaaz Gad Kindom no av notn fi du wid wa piipl iit an jringk ar we dem no iit an jringk. Gad kindom a bout ou piipl liv; ef dem a liv rait, ef dem av piis iina dem aat, an ef dem aat api — an aal a dem sitn de kom fram di Uoli Spirit.

Ruoman 9:23

Gad tek taim wid dem kaaz im did waahn fi shuo dem ou big, brait an powaful im bi. Im did waahn dem, di piipl we im gud an kain tu, fi si se dem a-go ton laik im. Im did waahn dem, di piipl we im pik an get redi fram lang taim, fi si se im a-go mek dem ton laik im.

Ruoman 9:21

Di sumadi we a mek di pat, im no av di rait fi tek piis a klie an mek wan speshal pat we im yuuz sortn an sortn taim, an den tek wan neda piis a klie an mek wan pat fi yuuz evridie?

Aks 10:35

bot enibadi, no mata wich konchri dem kom fram, ef dem worship im an aalwiez du we rait, im wi tek dem fi'im piipl.

Jan 12:26

Enibadi we waahn sorv mi afi fala mi. Eniwe mi de, dem a-go de de tu, an mi Faada a-go big dem op.

Luuk 22:14

Wen di taim kom fi dem nyam it, Jiizas an im apasl dem sidong a di tiebl.

Luuk 19:42

an a se, “Jeruusilem, Ef yu di onggl nuo tide wa wuda gi yu piis — bot di chuut aid fram yu.

Luuk 12:37

It a-go gud fi di sorvant dem uufa maasta fain dem bizi a wiet fi'im kom bak. Mi a tel unu dis, di maasta imself a-go put aan im wok kluoz, mek dem sidong a di tiebl, an im wi sorv dem.

Luuk 9:48

Jiizas se tu dem se, “Enibadi we welkom da likl pikni ya, kaa im chos iina mi, welkom mi tu. An enibadi we tek mi iin, tek iin di wan we sen mi tu. Di wan mongks unu we de a di batam, a im av di tap a tap pozishan.”

Matyu 10:13

Ef di piipl dem iina di yaad tek unu iin, an chriit unu gud, mek di piis we unu aks Gad fi gi dem, tan wid dem, bot ef dem no tek unu iin an chriit unu gud, den aks Gad fi tek it bak.

1 Piita 5:4

An wen di Ed Shepad kom bak, unu wi get wan shaini kroun we naa go fied out.

Jan 14:27

“Mi a lef go we, bot mi a-go mek unu av piis iina unu aat — di kain-a piis we mi av iina fi mi aat. A no di sed kain-a piis yu get fram di worl. No mek unu aat bada unu, an no kech unu fried.

1 Timoti 1:17

So rispek an priez tu di King we a-go bi king fi eva, di onggl Gad, di wan we kyan neva ded an we wi kyaahn si wid wi yai dem, priez tu im fi eva an eva, Iemen!

Iibruu 2:7

Fi wan likl wail yu mek man luo dong dan di ienjel dem. Yu gi im powa. Yu riez im op ai ai, laik a kroun yu put aan pan im ed.