Ruoman 11:12 - Di Jamiekan Nyuu Testiment

¹² So, wen di Juu dem did a sin, Gad bles di worl wid nof nof gud sitn. Wen dem neva fala wa im se dem fi du an luuz out pan aal we im did av fi dem, Gad bles di piipl dem we a no Juu nof nof. So ef Gad du aal a dat wen di Juu dem did ton dem bak pan im, unu no tingk se im a-go bles piipl nof nof muor wen di Juu dem kom bak kom biliiv iina im?

Ruoman 11:12 ပူးပေါင်းရင်းမြစ်များ

Aks 3:21

Jiizas afi tan a evn til di taim kom fi Gad mek evriting nyuu. A dat Gad mek im prafit dem tel piipl fram wie bak wen.

Ruoman 11:15

Kaaz ef wen Gad did ton we fram dem, im mek it so dat di piipl iina di worl kuda ton im pikni, wa unu tingk a-go apm wen im tek dem bak? Wen Gad tek bak di Juu dem fi bi im piipl, it a-go komiin laik se dem did ded an im mek dem kom bak alaiv.

Ruoman 11:25

Breda an sista mi waahn unu fi andastan da siikrit ya we piipl neva nuo bout bifuo. Mi waahn unu fi andastan it so dat unu no get ful-a unuself an tingk se unu waiz: Di Izrel piipl dem mek op dem main se dem naa biliiv iina Jiizas, bot dat naa go gwaan fi eva. It a-go tap wen aal a di piipl dem we a no Juu an we Gad did pik kom fi biliiv iina im.

Ruoman 11:33

Gad gud an kain tu aal piipl nof nof! Nobadi no waiz laik im an nobadi no nuo aal we im nuo. Uu kyan se wai im mek op im main fi du di sitn dem we im du? Uu kyan andastan di wie im du tingz?

Ruoman 9:23

Gad tek taim wid dem kaaz im did waahn fi shuo dem ou big, brait an powaful im bi. Im did waahn dem, di piipl we im gud an kain tu, fi si se dem a-go ton laik im. Im did waahn dem, di piipl we im pik an get redi fram lang taim, fi si se im a-go mek dem ton laik im.

Ifiijan 3:8

Iivn duo mi no impuotant laik di res a Gad piipl dem, Gad shuo mi lov iivn duo mi no dizorv it an pik mi fi priich tu di piipl dem we a no Juu an fi tel dem bout di nais sitn dem we Krais Jiizas gi im piipl. Dem sitn de so big dat nobadi kyaahn figa dem out.

Koloshan 1:27

Gad did waahn dem nuo umoch im riili riili bles unu — unu piipl we kom fram aal bout. Da mesij ya se Krais Jiizas liv iina unu aat, an unu kyan luk fi kom si an nuo ou Gad big an powaful.