Ruoman 1:16 - Di Jamiekan Nyuu Testiment

¹⁶ Mi no shiem fi priich di Gud Nyuuz kaaz it powaful. A di Gud Nyuuz Gad yuuz fi siev aal a di piipl we chos iina Jiizas. Im yuuz it fi siev di Juu dem fos an den im yuuz it fi siev di piipl dem we a no Juu.

Ruoman 1:16 ပူးပေါင်းရင်းမြစ်များ

Maak 8:38

Kaaz ef nobadi shiem a mi an fi mi mesij iina da worl ya we ful op a sin an piipl we ton dem main gens Gad, di Man we Gad Pik naa go av notn fi du wid dem wen im kom iina im Faada brait brait lait wid im uoli ienjel dem.”

Luuk 9:26

Ef enibadi shiem a mi an wa mi tiich, wen di man we Gad Pik kom, im a-go shiem a dem tu. Wen im kom im lait a-go shain roun im. An di lait we shain roun di Faada an di uoli ienjel dem, a-go shain roun im tu.

Jan 7:35

Di Juu liida dem den se tu dem wan aneda se, “A we da man ya plan fi go so, dat wi naa go kyan fain im? A go im a-go go tu di Juu piipl dem we skyata skyata mongks di Griik piipl dem, so dat im kyan tiich di Griik piipl dem?

Aks 3:26

So wen Gad riez op Jiizas im sorvant, im sen im kom a unu fos fi bles unu. Im bles unu wen im kaaz unu fi ton we fram unu wikidnis.”

Ruoman 10:17

So den, piipl kyan onggl kom fi biliiv wen dem ier di mesij, an dem kyan onggl ier, ef sumadi go priich tu dem bout Krais Jiizas.

Ruoman 15:19

an siek-a di sain dem an di mirikl dem we Gad Spirit gi mi di powa fi du. So fram Jeruusilem go klier a Ilirikom, mi priich di Gud Nyuuz bout Krais Jiizas aal bout.

Ruoman 15:29

an mi nuo se wen mi kom de, Krais Jiizas a-go bles unu nof nof.

Ruoman 2:9

Di piipl dem we a du aal kain-a wikidnis, Gad a-go mek dem fiil nof pien — im a-go mek dem sofa. Im a-go du dat tu piipl we a Juu an tu piipl we a no Juu.

Ruoman 4:11

An a lang afta dat apm Iebriyam go get sorkomsaiz. Im go get sorkomsaiz fi shuo se Gad did mek tingz rait bitwiin di tuu a dem iivn duo im neva sorkomsaiz, an Gad did du it kaaz Iebriyam did biliiv iina im. So Iebriyam komiin laik di faada fi aal a di piipl dem we neva get sorkomsaiz bot uu Gad mek tingz rait bitwiin im an dem kaaz dem biliiv iina im.

1 Korintiyan 15:2

A da mesij ya we wi siev unu ef unu uol aan pan it chrang an kip it iina unu aat. Bot ef unu tap biliiv, di biliiv we unu yuus tu biliiv iina Krais a did fi notn.

1 Korintiyan 2:2

Kaaz mi did mek op mi main se wail mi did de de wid unu, mi wuda onggl priich bout Jiizas Krais an ou dem kil im pan di kraas.

1 Korintiyan 2:4

An wen mi did a tiich an a priich mi neva yuuz no fansi taak laik we di piipl dem we tingk dem waiz yuuz. Mi neva afi du dat fi mek unu biliiv kaaz Gad Spirit yuuz im powa fi shuo unu se aal a wa mi did a se a chuu sopm.

1 Korintiyan 9:12

Ef unu av ada piipl we unu afi sopuot, unu no tingk se unu shuda waahn sopuot wi muor dan dem? Bot iivn duo wi kuda tel unu fi sopuot wi, wi no aks unu fi notn. Wi go chuu evri an eniting so dat wi no tap nobadi fram biliiv di Gud Nyuuz bout Jiizas Krais.

1 Korintiyan 9:18

So den a wa mi a-go get pie? Fi mi pie a dat mi kyan priich di Gud Nyuuz bout Jiizas an no chaaj nobadi. Da wie de mi kyan priich an no aks unu fi sopuot mi iivn duo mi av di rait fi aks unu.

2 Korintiyan 2:12

Nou wen mi go a Chuowas fi priich di Gud Nyuuz bout Jiizas, mi fain se di Laad did don mek wan wie fi mi taak tu di piipl dem.

2 Korintiyan 4:4

Dem no biliiv kaaz di devl we ruul da worl ya, blain dem so dat dem kyaahn si di lait. Im blain dem so dat dem kyaahn andastan di Gud Nyuuz bout Krais Jiizas. Im mek it so dat dem kyaahn andastan se Jiizas a jos laik Gad.

2 Korintiyan 9:13

Siek-a wa unu a du, dem wi priez Gad kaaz unu biliiv an fala di Gud Nyuuz bout Krais Jiizas an kaaz unu shier wa unu av wid dem an ada piipl tu.

Gyalieshan 1:7

Dem ada mesij de a no di chuu mesij — a onggl wan chuu mesij de bout. Bot yu av som piipl we a kanfyuuz unu an we waahn fi chienj op di chuu mesij bout Krais Jiizas.

1 Tesaluoniyan 2:13

An siek-a dis wi gi Gad tangks aal di wail. Kaaz wen unu tek iin Gad wod we unu did ier fram wi, unu neehn tek it laik a wod we kom fram man, bot unu tek it fi wa it bi fi chuu — Gad wod, we a wok iina aal a unu we biliiv.

1 Timoti 1:11

an we lain op wid di Gud Nyuuz bout wa Gad du fi wi wen im sen im Bwai Pikni fi siev wi. A da siem powaful Gud Nyuuz ya, Gad, di wan we piipl fi priez, se mi fi tiich.

2 Timoti 1:12

A kaaz mi tiich di Gud Nyuuz mek mi a sofa nou. Bot iivn duo mi iina prizn mi no shiem, kaaz mi nuo uu mi biliiv iina. An mi nuo se im wi kip sief aal a di sitn dem we im chos mi wid til di die Gad kom fi joj wi.

2 Timoti 1:16

Mi prie se Gad wi gud an kain tu Onisiforos an im fambili. Kaaz im neva shiem fi kom luk fi mi iina jiel an fi mek mi aat api.

2 Timoti 1:8

So no shiem fi tel di piipl dem bout Gad. No shiem fi se yu nuo mi niida, jos chuu dem fling mi iina jiel kaaz mi sorv Gad. Yuuz di powa we Gad gi yu. Sofa wid mi an gwaan tel di piipl bout Gad.

Iibruu 4:12

Kaaz wen Gad taak, a laik se di sitn dem we im se alaiv, av powa an kyan du tingz! Gad wod kot beta dan eni wan a di tuu-saidid kotlis dem, an aal buor chuu an plit op suol fram spirit, an kot we wich paat di buon dem jain op fram di blod an sitn dem we de insaida di buon dem. It kyan joj we wi tingk iina wi aat an di sitn dem we wi waahn.

1 Piita 4:16

Nuo, a no so it fi go. Bot ef unu sofa chuu unu a piipl we biliiv iina Jiizas — a no notn dat fi shiem bout. Insted-a dat, unu fi priez Gad kaaz a big ting dat wen piipl a kaal unu Krais Jiizas falara.