Ruoman 1:13 - Di Jamiekan Nyuu Testiment

¹³ Breda an sista mi waahn unu fi nuo se a nof taim mi mek fi kom si unu bot sopm aalwiez tap mi fram kom. Mi wel waahn fi kom si unu, so dat mi kyan elp di piipl mongks unu fi biliiv an fala Jiizas Krais siem laik ou mi elp di res a piipl dem we a no Juu fi biliiv an fala Jiizas.

Ruoman 1:13 ပူးပေါင်းရင်းမြစ်များ

Jan 12:24

Mi a tel unu fi chuu chuu, ef wan wiit siid no jrap a grong an ded an ratn, it eva a-go tan wan wiit siid. Bot ef it get fi ded an ratn, it gruo an bier nof ada siid.

Jan 15:16

“A no unu pik mi, a mi pik unu an put unu wan said fi bier nof fruut — di kain-a fruut we a-go laas fi eva. Wen dat apm, mi Faada gweehn gu'unu eniting unu aks im fa kaa unu a mi falara.

Jan 4:36

Di sumadi we gyada op di fuud a get fi'im pie, an di fuud we im de gyada a piipl we gweehn liv fi eva. So nou, im we plaant an im we gyada, di tuu a dem gweehn glad tugeda.

Aks 1:15

Iina dem die de, wen di biliiva dem gyada op fi wan a dem miitn, (bout onjrid an twenti a dem did de de), Piita tan op

Aks 14:27

Wen dem riich a Antiyak, Paal an Baanabas gyada op di choch piipl an tel dem evriting we Gad did gi dem powa fi du, an ou Gad gi di piipl we a no Juu di chaans fi biliiv iina im.

Aks 15:12

Evribadi iina di miitn kip kwaiyat an lisn tu Paal an Baanabas wail dem tel dem bout di mirikl an di powaful sitn dem wa Gad gi dem powa fi du mongks di piipl we a no Juu.

Aks 19:21

Afta aal a dem sitn ya apm, Paal mek op im main fi go op a Jeruusilem, so im chravl chuu Masiduoniya an Akaiya. An im se, “Afta mi spen som taim op de, mi afi go a Ruom fi a likl wail.”

Aks 21:19

Afta Paal go iin an tel dem oudi, im staat tel dem evriting wa Gad did a du siek-a fi im wok mongks di piipl we a no Juu.

Aks 28:14

Wi fain som piipl we biliiv iina Jiizas de an dem beg wi fi tan wid dem fi sevn die. Afta dat wi lef an go a Ruom.

Ruoman 1:12

Wa mi a se a dat mi wel waahn kom si unu so dat wi kyan elp fi bil op wi wan aneda. Unu wi get chrang wen unu si umoch mi chos iina Gad, an unu wi elp mi fi get chrang wen mi si umoch unu chos iina Gad.

Ruoman 11:25

Breda an sista mi waahn unu fi andastan da siikrit ya we piipl neva nuo bout bifuo. Mi waahn unu fi andastan it so dat unu no get ful-a unuself an tingk se unu waiz: Di Izrel piipl dem mek op dem main se dem naa biliiv iina Jiizas, bot dat naa go gwaan fi eva. It a-go tap wen aal a di piipl dem we a no Juu an we Gad did pik kom fi biliiv iina im.

Ruoman 7:1

Breda an sista, mi nuo se unu wi andastan wa mi bout fi se, kaaz aal a unu nuo di Laa. Unu nuo se di Laa av powa uova piipl fi dem uol laif — az lang az dem alaiv, dem afi fala di Laa.

1 Korintiyan 1:10

Nou iina wi Laad Jiizas Krais niem, mi a beg unu breda an sista fi tap aagyu wid unu wan aneda an plit op plit op di choch iina gruup. Unu niid fi kom tugeda an mek shuor se aal a unu tingk di siem wie an aal a unu mek op unu main fi du di siem sitn.

1 Korintiyan 10:1

Breda an sista mi waahn unu fi memba se fi wi faada an fi dem faada faada go bak, di kloud did protek di uol a dem wen dem did a kraas di red sii.

1 Korintiyan 12:1

Nou breda an sista, mi waahn unu fi andastan evriting bout di gif dem we di Uoli Spirit gi.

1 Korintiyan 14:20

Breda an sista no tingk laik se unu a pikni, unu fi tingk laik se unu a big piipl. Onggl gwaan laik pikni wen it kom tu wikidnis kaaz pikni no du no iip a wikid sitn.

1 Korintiyan 14:26

So mi breda an sista, a wa unu fi du den? Mi a-go tel unu! Wen unu gyada tugeda fi av choch, evriting we unu du, unu fi du it so dat unu wi elp evribadi. A so it fi tan wen sumadi a sing wan sang ar a tiich, ar a kyari mesij fram Gad. A so it go wen sumadi a taak iina tongz ar wen sumadi a tel unu we di piipl we a taak iina tongz a se.

1 Korintiyan 9:2

Iivn ef ada piipl no tingk se mi a wan apasl, unu fi nuo se mi a wan! Kaaz di fak se unu an di Laad a wan shuo se mi a riili wan a Gad apasl.

2 Korintiyan 1:8

Breda an sista wi waahn unu fi nuo di chuut bout aal a di sitn dem we wi did afi sofa chuu wen wi did de a Iezha. Di sofarieshan a did muor dan wi kuda manij. It did so bad wi did shuor se a ded wi did a go ded.

2 Korintiyan 2:14

Wi tangk Gad we mek wi eva a win gens di wikid sitn dem we wi fies, chuu wi an Jiizas a wan. Gad yuuz wi fi pred di Gud Nyuuz bout Jiizas aal bout, an da Gud Nyuuz de komiin laik wan swiit swiit sumel.

Gyalieshan 3:15

Breda an sista, mi a-go yuuz sopm we wi du evridie fi chrai an mek unu andastan wa mi a taak bout. Se tuu piipl mek a diil an di tuu a dem pramis fi du fi dem paat. Nobadi kyan brok da diil de ar ad notn tu it.

Gyalieshan 6:18

Breda an sista mi prie se wi Laad Jiizas Krais wi shuo di uol a unu lov iivn duo wi no dizorv it. Iemen!

Filipiyan 1:22

Bot ef mi fi gwaan liv iina da badi ya, mi wi get fi du nof muor sitn fi Jiizas. So wich wan mi fi pik? Mi riili no nuo.

Filipiyan 4:17

A no muor moni mi a luk fram unu mek mi a se dem sitn ya, bot mi waahn unu du muor an muor gud sitn so Gad wi pie unu bak wid aal braata.

Koloshan 1:10

An a so kom unu wi kyan liv laik Gad piipl an eva du di sitn dem we wi mek im api: Unu wi du aal kain-a gud sitn, an get fi riili nuo Gad muo an muo tu.

Koloshan 1:6

Piipl did bring di Gud Nyuuz kom gi unu. An dem kyari it aal uova di worl. It a bier fruut an a gruo jos laik ou it du mongks unu fram di fos die unu ier it an andastan umoch Gad riili lov wi fi chuu, an ou im chriit wi gud iivn duo wi no dizorv it.

1 Tesaluoniyan 2:18

So, wi did waahn fi kom tu unu. Mi fi wan — Paal, mi chrai uova an uova bot Sietan blak wi.

1 Tesaluoniyan 4:13

Breda an sista, wi waahn unu fi nuo bout wa riili apm tu aal a dem we jrap asliip. Da wie ya unu wi no baal an muon laik di piipl dem we no nuo Gad an no ekspek notn gud fi apm afta sumadi ded.

2 Tesaluoniyan 2:7

Kaaz wan wikid sitn de bout we a wok anda di kwaiyat fi kaaz piipl fi go gens Gad Laa. Bot sumadi a uol it bak. An di wan we a uol it bak a-go gwaan uol it til im get muuv outa di wie.

2 Timoti 4:17

Bot di Laad did tan op saida mi an gi mi chrent. Im gi mi chrent so dat mi kuda priich di uol a im mesij tu di piipl dem we a no Juu. An im siev mi fram di piipl dem we did waahn fi fling mi gi di laiyan dem.