Revilieshan 7:9 - Di Jamiekan Nyuu Testiment

⁹ Afta dat mi si wan big kroud a piipl tan op infronta mi, dem did so nof dat nobadi kudn kount dem. Dem kom fram evri konchri, chraib, an piipl we chat aal kain-a langwij. Dem kom tan op infronta di chuon an infronta di Biebi Shiip. Dem did av aan wait jakit we kech dem klier dong a dem fut, an dem did av paam liif iina dem an.

Revilieshan 7:9 ပူးပေါင်းရင်းမြစ်များ

Luuk 12:1

Wen touzn an touzn a piipl staat gyada gyada we Jiizas de, dem did so nof dem aal a tep op tep op pan dem wan aneda. Jiizas taak tu im speshal falara dem fos, im se, “Wach out fi di tuu mout Farisii dem.

Luuk 21:36

Aalwiez a wach, prie se unu wi kyan get we fram aal a wa a-go apm, an prie se unu kyan tan op infronta di Man we Gad Pik.”

Jan 12:13

So dem tek som paam chrii branch an go fi miit im, an dem shout out loud loud se, “Priez Gad!” “Gad bles di wan we im sen kom! im sen im wid fi'im powa!” “Gad bles di wan we a king iina Izrel!”

Ruoman 11:25

Breda an sista mi waahn unu fi andastan da siikrit ya we piipl neva nuo bout bifuo. Mi waahn unu fi andastan it so dat unu no get ful-a unuself an tingk se unu waiz: Di Izrel piipl dem mek op dem main se dem naa biliiv iina Jiizas, bot dat naa go gwaan fi eva. It a-go tap wen aal a di piipl dem we a no Juu an we Gad did pik kom fi biliiv iina im.

Ifiijan 6:13

So unu fi put aan aal a unu aami kluoz dem we Gad gi unu fi protek unuself. Da wie de, enitaim di devl kom chrai fi wok im chrik pan unu, unu wi kyan tan op chrang gens im. Unu wi fait im til im no av no fait lef iina im. An wen unu don fait im, unu wi stil tan op chrang.

Iibruu 11:12

Az a matarafak, fram da wan man ya, wan bag a pikni kom; pikni we nof laik di staar dem we de op iina di skai, an we plenti plenti laik san a sii, iivn duo im did so oul dat im de a griev mout.

Iibruu 12:22

Insted-a dat, unu kom a Mount Zaiyan, di Jeruusilem we de a evn, di siti fi di Gad we mek piipl liv. Unu kom tu wan iip a ienjel we gyada de an we api so til.

Revilieshan 11:15

Wen ienjel nomba sevn bluo fi im chompit, mi ier som loud vais iina evn a se, “Nou fi wi Gad, an Krais Jiizas av di rait fi ruul uova di uol worl an im a-go ruul fi eva an eva.”

Revilieshan 22:3

Notn ar nobadi we Gad no tek iin kyaahn go iina di siti. Gad an di Biebi Shiip chuon a-go iina di siti an Gad piipl a-go worship im.

Revilieshan 3:18

Dis a wa mi tingk unu shuda du, bai guol fram mi, guol we bon iina faiya fi get out aal wa no fi iina it. Ef unu bai da guol de, unu wuda riili get rich. Bai wait kluoz fram mi so unu kyan kova op unuself. Da wie de unu na'afi shiem kaaz unu na'av aan no kluoz. An bai yai jrap fram mi tu fi jrap iina unu yai dem so unu kyan si.

Revilieshan 4:4

Roun di fos chuon, mi si twenti-fuo ada chuon wid twenti-fuo elda sidong pan dem. Di twenti-fuo elda dem did av aan wait kluoz, an evri wan a dem av aan wan guol kroun pan dem ed.

Revilieshan 5:11

Den mi luk an ier di vais a wan uol iip a ienjel. An ef yu fi ad dem op bout touzn an touzn an touzn — yu kyaahn kount dem. Dem gyada roun di chuon an roun di sitn dem an di elda dem.

Revilieshan 5:9

An dem sing wan nyuu sang: “Yu gud inof fi tek di ruol op buk an fi bos aaf di chring dem, kaaz yu did get kil. An yu tek yu blod bai piipl fi Gad fram evri chraib an langwij an piipl an konchri.

Revilieshan 6:11

Den evri wan a dem get wan lang wait jakit we kech dem klier dong a dem fut, an sumadi tel dem se dem fi wiet likl langga til di res a Gad piipl dem we fi get kil laik dem, get kil.

Revilieshan 7:8

A twelv touzn fram Zebyulan chraib, twelv touzn fram Juozif chraib, an fram Benjamin chraib twelv touzn. Aal a dem piipl de get di maak.