Revilieshan 6:11 - Di Jamiekan Nyuu Testiment

¹¹ Den evri wan a dem get wan lang wait jakit we kech dem klier dong a dem fut, an sumadi tel dem se dem fi wiet likl langga til di res a Gad piipl dem we fi get kil laik dem, get kil.

Revilieshan 6:11 ပူးပေါင်းရင်းမြစ်များ

Matyu 10:21

“Breda an sista a-go infaam pan dem uona breda an sista dem, an mek di piipl dem we a ruul kil dem. A siem so, wan faada a-go an uova im uona pikni. Pikni a-go ton gens dem faada an mada an mek di ruula dem kil dem.

Luuk 15:22

“Bot di faada tel im sorvant se, ‘Mikies! Kyari di bes kluoz kom put aan pan im. Put wan ring pan im fingga an shuuz pan im fut.

Jan 16:2

Dem a-go ron unu outa di Juu dem Choch. Di taim aal a kom wen sumadi a-go kil unu an tingk se dem a du sitn gud fi Gad.

Aks 20:24

Bot fi mi laif no wot notn tu mi kaaz di onggl ting we mi a liv fa a fi mek shuor se mi don mi wok an du aal we mi Laad Jiizas gi mi fi du, fi tel evribadi bout di Gud Nyuuz — ou Gad lov wi, iivn duo wi no dizorv it.

2 Tesaluoniyan 1:7

An unu we a sofa, im a-go mek di sofarieshan tap wen di Laad Jiizas kom fram evn an shuo imself. Da taim de aal a wi a-go get fi res, wi naa go sofa no muo. Jiizas a-go kom fram evn wid im powaful ienjel dem,

2 Timoti 4:7

Mi wok aad fi Gad; mi fait fi wa mi biliiv iina. Mi priich Gad wod an du aal a wa Gad tel mi fi du; mi ron da ries ya til it don an no gi op. Mi a-go sorv im til mi ded.

Iibruu 11:40

Kaaz Gad did plan fi du sitn we wie wie beta fi wi, so wi an dem kyan bi aal a wa Gad waahn wi fi bi di siem taim.

Iibruu 12:23

Unu kom wich paat di fos set a pikni we a fala Krais Jiizas gyada op. Fi dem niem don rait dong iina evn aredi. Unu kom tu Gad tu, we joj evribadi. An unu kom tu dem piipl de we du rait iina Gad yai. Gad don mek dem rait iina evri wie.

Iibruu 4:10

Kaaz di wan we get fi res ou Gad mek piipl res, im did res tu an no du no wok, jos laik ou Gad did res wen im did don fi im wok.

Revilieshan 10:6

An im mek da pramis ya pan di Laad — di Laad we liv fi eva an eva, di Laad we mek evn an evriting we op de, di Laad we mek di ort an evriting pan it, an di Laad we mek di sii an evriting wa iin de, im se, “Dis ya naa go wiet no langga!

Revilieshan 13:15

Gad lou di sekan wail animal fi get powa fi gi laif tu di sitn we luk laik di fos wail animal so dat it kuda taak, an kil enibadi we no waahn worship it.

Revilieshan 14:13

Den mi ier wan vais fram evn se tu mi se, “Rait dong dis: fram nou aan, di piipl dem we ded an dem an di Laad a wan, a dem bles.” Di Spirit se, “Yes, dem aad wok don, an dem a res nou, an aal a di sitn dem wa dem did du wi taak fi dem.”

Revilieshan 17:6

Mi si se di uman did jongk. Shi did jringk an get jongk wid Gad piipl dem blod — di wan dem we dem did kil. Dem kil dem kaaz dem did tan op chrang fi wa dem biliiv bout Jiizas. Wen mi si ar, mi fraitn so til.

Revilieshan 7:14

Mi ansa im se, “Sa, yu nuo di ansa.” Den im se, “Yu si dem piipl ya, dem a di wan dem we go chuu di torbl torbl sofarieshan. Dem wash dem kluoz wait wait iina di Biebi Shiip blod.

Revilieshan 7:9

Afta dat mi si wan big kroud a piipl tan op infronta mi, dem did so nof dat nobadi kudn kount dem. Dem kom fram evri konchri, chraib, an piipl we chat aal kain-a langwij. Dem kom tan op infronta di chuon an infronta di Biebi Shiip. Dem did av aan wait jakit we kech dem klier dong a dem fut, an dem did av paam liif iina dem an.