Revilieshan 21:22 - Di Jamiekan Nyuu Testiment

²² Mi neehn si Gad ous iina di siti, kaaz di Laad Gad we nobadi no powaful laik an di Biebi Shiip, a dem a Gad ous.

Revilieshan 21:22 ပူးပေါင်းရင်းမြစ်များ

Jan 4:23

Bot di die an taim de kom — an it de ya nou — wen di piipl dem we riili worship di Faada gweehn worship im ou di Spirit waahn dem fi worship an fram wie dong iina dem aat. Kaaz a dem de saat a piipl de di Faada a luk fa fi worship im.

Revilieshan 1:8

Di Laad Gad se, “A mi staat evriting an evriting don wid mi. Mi a di wan we alaiv, di wan we de bout fram wie bak wen, an di wan we a-go kom baka ort. A mi a di wan we av aal a di powa.”

Revilieshan 16:7

Den mi ier wan vais fram di alta se: “Yes, Laad Gad, nobadi no powaful laik yu, yu joj piipl ou dem fi get joj an gi dem wa dem dizorv!”

Revilieshan 5:6

Den mi luk an si wan Biebi Shiip we luk laik dem did kil im bot im kom bak alaiv. Mi si im tan op nier di chuon, an di fuo laiv sitn dem an di elda dem tan op roun im. Im av sevn aan an sevn yai we a Gad Uoli Spirit we im sen aal bout di ort.

Koloshan 2:9

Uu Jiizas bi no difrant fram uu Gad bi. Eniting we mek Gad Gad, de iina Jiizas tu, an aal wen im did de iina man faam im did tan siem laik Gad.

Jan 4:21

So, Jiizas se tu ar se, “Liedi, chos mi pan da wan ya: di taim a-go kom wen piipl naa go worship di Faada pan da mountn ya ar iina Jeruusilem.

Revilieshan 15:3

An dem did a sing di sang we Muoziz, Gad sorvant, sing an di sang wa di Biebi Shiip sing: “Laad Gad yu powaful an evriting wa yu du powaful. Yu a King fi aal a di konchri dem iina di worl, an evriting wa yu du an se a chuu.

Revilieshan 11:17

Dem se: “Laad Gad, yu we av aal di powa, wi gi yu tangks. Yu a di wan we alaiv, an di wan we de bout fram wie bak wen. Wi tangk yu se yu a shuo yu powa an ruul uova di uol worl.

Revilieshan 4:8

Evri wan a di fuo sopm dem av siks wing an di uol a dem badi plos dem siks wing dem ful op a yai. Dem av yai aal anda dem wing. Die an nait dem neva tap se: “Uoli, uoli, uoli Laad Gad a yu av aal di powa. Yu did de bout fram wie bak wen, yu aalwiez a-go de bout, an a yu a-go kom baka ort.”

Koloshan 1:19

Eniting we mek Gad Gad, de iina Jiizas tu. Gad did api wid dat; a im mek it apm so.

Jan 10:30

Mi an di Faada a wan an di siem.”

Revilieshan 19:15

Wan shaap suod kom outa im mout we im a-go yuuz fi waar gens di piipl dem iina di worl an ponish dem. “Im a-go ruul dem wid wan aiyan paip.” An im a-go tep op, tep op pan dem an mash dem out laik wen piipl a mash out griep wid dem fut. Im a-go du dem da wie de fi mek dem si se Gad we av aal di powa, wel mad wid dem.

Revilieshan 16:14

Di spirit dem a diiman spirit we du som powaful sitn. Dem go out aal uova di worl go gyada op di king dem fi waar — di waar we a-go apm pan di big die wen Gad, we muo powaful dan evribadi, a-go joj piipl.

Matyu 24:2

Jiizas se tu dem se, “Unu si aal a dem sitn ya? Ier mi no, an a chuu mi a taak, no iivn wan a dem stuon ya a-go lef pan tap a dem wan aneda. Di uol a dem a-go lik dong!”

Revilieshan 7:15

Siek-a dat “dem tan op infronta Gad chuon nou an a sorv im die an nait iina im ous. An di wan we sidong pan di chuon a-go liv wid dem an protek dem.

Revilieshan 7:17

Kaaz di Biebi Shiip we de a di migl a di chuon a-go tek kier a dem jos laik ou wan shepad tek kier a im shiip dem. Im a-go liid dem go a wan plies we fresh kliin waata eva a ron. An Gad gweehn jrai op aal a dem yai-waata.”

Revilieshan 14:4

Dem man ya neva sliip wid no uman — dem neva av seks. Dem fala did Biebi Shiip evriwe im go. Dem did get siev fram mongks di piipl dem we de pan di ort, so dem bilang tu Gad an di Biebi Shiip. Dem komiin laik di fos paat a di sitn we sumadi gi Gad fram dem faam.

Jan 13:32

Ef di Man we Gad Pik shuo piipl ou Gad big an powaful, den suun suun Gad imself gweehn shuo dem ou di Man we im Pik big an powaful.