Revilieshan 2:3 - Di Jamiekan Nyuu Testiment

³ Unu tan op chrang an no gi op wen chobl tek unu, an unu go chuu nof sofarieshan siek-a ou unu biliiv iina mi. An unu aalwiez fala mi, unu neva get taiyad an gi op.

Revilieshan 2:3 ပူးပေါင်းရင်းမြစ်များ

Maak 15:21

Wan man niem Saiman we kom fram Sairiin did a komiin fram konchri (im a did Aligzanda an Ruufos faada). Di suoja dem fuos im fi kyari Jiizas kraas.

Luuk 14:27

Enibadi we no kyari fi'im kraas an kom wid mi, kyaahn ton wan a mi falara dem.

Luuk 18:1

Den Jiizas tel im speshal falara dem da tuori ya fi shuo dem se dem fi aalwiez prie an no gi op.

Luuk 21:19

Uu tan op chrang fi mi no mata wa, wi siev dem laif.

Luuk 5:5

Saiman ansa, “Tiicha, wi wok aad uol nait an wi no kech notn. Bot sins yu se so, mi wi du wa yu se.”

Luuk 8:15

Di wan dem we jrap pan gud grong, a di piipl dem uufa aat riili gud. Dem ier di wod an uol aan pan it. Aal wen aad taim kom, dem stil bier fruut.

Jan 15:21

Bot dem a-go du aal a dem sitn ya tu unu chuu unu a fi mi, an kaa dem no nuo di wan we sen mi kom ya.

Ruoman 12:12

Wail unu wiet fi di sitn dem we Gad pramis fi gi unu, unu mos api kaaz unu nuo se unu a-go get it. Wen chobl tek unu, unu no fi gi op bot unu mos gwaan uol chrang an unu fi prie aal di taim, neva tap.

Ruoman 16:12

Tel Chraifiina an Chraifuosa we a wok fi di Laad oudi fi mi an mi waahn fi sen oudi fi mi gud gud fren Porsis tu. Porsis wok aad aad fi di Laad.

Ruoman 2:7

Yu av som piipl we a liv rait an we aalwiez a du gud fi ada piipl. Dem piipl de waahn Gad fi taak gud bout dem. Dem waahn im fi big dem op an mek dem liv fi eva. An a dem de piipl de Gad a-go mek liv fi eva an eva.

Ruoman 8:25

Bot ef wi no get aal we wi a luk fi get yet, wi wi sidong an wiet an no muuv til wi get it.

1 Korintiyan 13:7

Piipl we av lov iina dem aat neva eva gi op no mata wa apm tu dem an dem neva tap biliiv iina Gad. Piipl we av lov iina dem aat chos Gad fi tek kier a dem an dem wi go chuu eniting we riich dem an no fos ar komplien.

1 Korintiyan 16:16

breda an sista fi fala wa dem piipl de se, an no jos we dem se bot wa enibadi we wok wid dem se tu.

2 Korintiyan 10:15

So wi no brag bout ada piipl wok laik se a wi did du it. Aal wi du a uop se unu wi get chrangga an chrangga iina wa unu biliiv, so dat wi wok mongks unu wi gruo tu.

2 Korintiyan 11:23

Dem a Krais Jiizas sorvant? (Mi a taak laik wan riil madman nou.) Mi a muor Krais sorvant dan dem. Mi wok aada dan dem. Mi get lak op iina prizn nof muor taim dan dem. Mi get nof muor biitn dan dem an a nof taim mi aalmuos ded.

2 Korintiyan 4:1

Gad, chuu im gud an kain, gi wi da wok ya fi du, an so wi naa gi op.

2 Korintiyan 4:16

So iivn duo wi a get uol an wi badi bata-bata fram aal we wi a go chuu, wi no gi op. Evridie Gad mek wi spirit chrangga an chrangga an gi wi di chrent fi gwaan du im wok.

2 Korintiyan 5:9

An so, wi mek shuor se evriting wi du a fi mek Gad api weda wi a liv pan ort ar wi de iina evn wid im.

2 Korintiyan 6:5

Piipl biit wi, dem fling wi iina prizn, kroud an kroud a piipl chrai kil wi aaf bot wi stil a wok. Wi a wok aal wen wi no av di chrent fi wok no muor. Nof nait wi no get no sliip an wi naa no fuud fi iit, bot wi stil a wok.

Gyalieshan 6:2

Wen sumadi av prablem, unu fi elp dem. Unu fi elp unu wan aneda. Kaaz wen unu du dat unu a du we Krais Jiizas se unu mos du.

Gyalieshan 6:9

So mek wi no get taiyad fi du gud, kaaz ef wi no gi op, wen Gad redi, im wi mek wi riip nof gud sitn.

Filipiyan 2:16

Unu fi tel di piipl dem Gad mesij — Gad mesij bout ou dem kyan get di laif we mek dem liv fi eva an eva. Unu fi du dat, so dat wen Krais Jiizas kom baka ort, mi wi kyan buos bout unu se mi neehn ron ar wok so aad mongks unu fi notn.

Filipiyan 4:3

An mi a beg unu, mi gud gud fren we aalwiez elp mi iina mi wok fi di Laad, elp dem uman ya we aalwiez tan op chrang wid mi an elp mi pred di Gud Nyuuz. Elp Klement an aal a Gad piipl we wok wid mi tu. Dem niem rait dong iina Gad buk we av di niem a evribadi we Gad a-go mek liv fi eva.

Koloshan 1:11

An wi prie se Gad wi tek fi im powa an mek unu wel chrang, so unu kyan uol aan no mata wa, an no grombl grombl, bot a sing sang iina unu aat

1 Tesaluoniyan 1:3

Wi no tap prie an gi Faada Gad tangks fi unu kaaz wi memba ou unu du som gud sitn kaaz unu biliiv iina Jiizas. Wi memba ou unu wok wel aad kaaz unu lov im; an wi tingk bout ou unu neva eva tap luk tu im, an so unu kuda pres aan no mata wa.

1 Tesaluoniyan 2:9

Breda an sista, wi shuor se unu memba ou aad wi did afi wok. Wi wok die an nait so wi neehn afi presha nobadi ar bordn unu dong wen wi did kom priich tu unu di Gud Nyuuz we kom fram Gad.

1 Tesaluoniyan 5:12

Breda an sista, nou wi a beg unu fi rispek di piipl dem we a wok aad mongks unu, an we a liid an tiich unu.

2 Tesaluoniyan 3:13

Bot breda an sista, unu no fi get taiyad fi du di rait sitn dem.

2 Tesaluoniyan 3:5

Nou, mi prie se di Laad wi mek unu andastan umoch im lov unu an elp unu fi eng aan an no gi op siem laik wa Krais Jiizas did du.

2 Tesaluoniyan 3:8

Wi neehn tek nobadi fuud an nyam it ef wi neehn pie fa. Nuo, wi wok aad, die an nait so wi no afi presha an bordn dong nobadi.

1 Timoti 4:10

Wi put wi chos iina di Gad we kyaahn ded an we siev evribadi, speshali di wan dem we biliiv iina im. Gad pramis fi mek wi liv fi eva ef wi chos iina im an a so mek wi afi chogl an wok aad.

1 Timoti 5:17

Unu fi ana an rispek di elda dem we a gud liida, wos ef dem wok aad fi priich an tiich. Unu fi ana dem an pie dem gud tu.

Iibruu 10:36

Unu afi uol aan an pres chuu fi du wa Gad waahn unu fi du, an so get di sitn dem we im pramis fi gi unu.

Iibruu 12:1

So laik ou wan kroud a piipl de aal bout roun wi, an dem shuo wi aredi ou fi chos iina Gad, wi afi dash aaf evriting we a sluo wi dong iina da ries ya. Di sin we tai op wi fut iizi iizi, wi afi dash dem aaf man, an ron di ries we de infronta wi an no wier out pan di wie.

Iibruu 13:13

Wi fi galang outsaida di kyamp tu im den. Mek wi sofa an tek biit op, an tek di shiem we im did sofa tu.

Iibruu 6:10

Gad fier yu nuo. Im naa go figet wa unu du. Im naa figet ou unu shuo umoch unu lov im wen unu elp di breda an sista dem we biliiv iina Gad, an ou unu stil a elp dem.

Iibruu 6:12

Wi no waahn unu fi get liezi an no waahn du notn. Nuo! unu fi tan laik di piipl dem we biliiv iina Krais Jiizas. Dem no gi op, an so dem get wa Gad did pramis fi gi dem.

Iibruu 6:15

An afta Iebriyam wiet ou lang an gwaan chos Gad, im get wa Gad pramis im.

2 Piita 1:6

An no jos nuo bout Gad niida, bot unu fi nuo ou fi kanchuol unuself tu. No jos nuo ou fi onggl kanchuol unuself, bot unu fi chrai aad tu fi chos iina Gad an pres aan no mata wa. Unu fi gi Gad evri paat a unu laif an du wat-eva im waahn unu fi du.

Revilieshan 1:9

Mi a Jan, unu breda an fren we a go chuu di siem sofarieshan we unu a go chuu. Aal a wi a-go tek paat iina Gad kindom, an siem laik unu, mi naa gi op — mi wi gwaan sofa til Gad kom bak. Kaaz mi priich Gad wod an tel piipl aal a di sitn dem we Jiizas shuo mi, dem put mi pan wan ailan niem Patmos.

Revilieshan 3:10

Kaaz mi tel unu fi tan op chrang an no gi op wen chobl tek unu, an unu dwi'it, mi a-go kip unu sief iina da taim de wen torbl kraasiz an sofarieshan a-go kom pan di uol worl fi tes aal uu liv pan di ort.