Revilieshan 1:16 - Di Jamiekan Nyuu Testiment

¹⁶ Im did av sevn staar iina im rait an, an wan suod wid di tuu said dem wel shaap kom outa im mout. An im fies shain brait laik di son a migl die.

Revilieshan 1:16 ပူးပေါင်းရင်းမြစ်များ

Matyu 17:2

Aal av a sodn Jiizas staat fi chienj rait infronta dem. Im fies staat shain laik di son an im kluoz ton wait wait laik lait.

Aks 26:13

Bot yu ana, bout twelv aklak wen mi did de pan mi wie, mi si wan brait brait lait fram evn, braita dan di son kom uova mi an uova di man dem we did de de wid mi.

Ifiijan 6:17

An mek di fak se unu nuo se Gad siev unu, protek unu siem laik ou suoja elmit protek dem ed fram dem enimi. An uol aan tait pan di suod we di Uoli Spirit gi unu, dat a Gad wod.

Iibruu 4:12

Kaaz wen Gad taak, a laik se di sitn dem we im se alaiv, av powa an kyan du tingz! Gad wod kot beta dan eni wan a di tuu-saidid kotlis dem, an aal buor chuu an plit op suol fram spirit, an kot we wich paat di buon dem jain op fram di blod an sitn dem we de insaida di buon dem. It kyan joj we wi tingk iina wi aat an di sitn dem we wi waahn.

Revilieshan 1:20

Di sevn staar dem we yu si iina mi rait an, an di sevn guol sitn dem fi uol kyanggl, dis a wa dem miin: di sevn staar dem a di liida dem fi di sevn choch dem, an di sevn sitn fi uol kyanggl a di sevn choch dem.”

Revilieshan 10:1

Den mi si wan neda powaful ienjel a kom dong fram evn. An im did av wan kloud rap roun im laik kluoz, an wan rienbuo uova im ed. An im fies shain brait laik di son. An im fut dem komiin laik som kalom we mek outa faiya.

Revilieshan 12:1

Den mi si wan powaful sain iina evn: wan uman we luk laik shi av aan di son — rap roun ar laik ar kluoz, an di muun anda ar fut an wan kroun pan ar ed wid twelv staar.

Revilieshan 19:15

Wan shaap suod kom outa im mout we im a-go yuuz fi waar gens di piipl dem iina di worl an ponish dem. “Im a-go ruul dem wid wan aiyan paip.” An im a-go tep op, tep op pan dem an mash dem out laik wen piipl a mash out griep wid dem fut. Im a-go du dem da wie de fi mek dem si se Gad we av aal di powa, wel mad wid dem.

Revilieshan 19:21

Di res a piipl dem get kil wid di suod we kom outa di man mout we did de pan di aas. An aal a di bod dem nyam di piipl dem badi til dem tumok ful.

Revilieshan 2:1

An den di man we mi did si se tu mi se, “Rait dong da mesij ya sen go gi di liida fi di choch we iina Efisos. Tel im se: Dis a wa di wan we uol di sevn staar dem iina im rait an, an we waak mongks di guol sitn fi uol kyanggl av fi se:

Revilieshan 2:12

“Rait da leta ya sen go gi di liida fi di choch we iina Porgamom an tel im se: Di wan we av di suod we di tuu said dem wel shaap se fi tel im se,

Revilieshan 2:16

Dem fi ton we fram dem sin, shuo se dem sari fi di rang we dem du an beg Gad paadn! Ef unu no du dat, mi a-go kom tu unu suun an waar gens dem wid di suod we kom outa mi mout.

Revilieshan 3:1

An im se tu mi agen se, “Rait da leta ya go gi di liida fi di choch we iina Saadis an tel im se: Di wan we av Gad Uoli Spirit an we uol di sevn staar dem se, mi nuo evriting bout unu. Piipl tingk se unu a fala mi, bot unu riili naa fala mi at aal.