Matyu 24:6 - Di Jamiekan Nyuu Testiment

⁶ Unu a-go ier se waar a gwaan a woi woi an waar a gwaan anda unu nuoz. Bot mek shuor se unu no fraitn yu no, kaa aal a dem sitn ya afi gwaan, bot non a dem de no miin di worl don yet.

Matyu 24:6 ပူးပေါင်းရင်းမြစ်များ

Luuk 21:9

Enitaim unu ier bout waar an se govament get ton uova, no fraitn. Dem sitn ya afi gwaan fos, bot di en naa go kom siem taim.”

Jan 14:1

“No wori unuself. Chos iina Gad, an chos iina mi tu.

2 Tesaluoniyan 2:2

no bada mek nobadi twis op unu ed an fraitn unu so dat unu kyaahn iivn tingk chriet. Nobadi! No mek no mesij we nobadi kliem se dem get fram di spirit an no faam a leta we kliem se it kom fram wi we a tel unu bout se: di die wen di Laad fi kom bak de ya aredi. No mek non a dat twis op unu ed. No biliiv non a dat!

Jan 14:27

“Mi a lef go we, bot mi a-go mek unu av piis iina unu aat — di kain-a piis we mi av iina fi mi aat. A no di sed kain-a piis yu get fram di worl. No mek unu aat bada unu, an no kech unu fried.

Matyu 24:14

An da Gud Nyuuz ya bout Gad Kindom afi go priich aal uova di worl. So evribadi wi get di chaans fi ier di chuut. A onggl afta dat, di worl a-go don.

Luuk 21:19

Uu tan op chrang fi mi no mata wa, wi siev dem laif.

Luuk 22:37

Mi a tel unu, it rait dong se, ‘An dem kaal out im niem wid aal di kriminal dem.’ Wa rait dong, afi apm. A mi it a taak bout an it a gwaan rait ya nou an it a-go don suun suun.”

Matyu 26:54

Bot ef mi du dat, ou wa rait dong iina Gad wod, we se a so it fi go, wuda kom chuu, iihn?”

Matyu 2:3

Nou wen King Erad ier dis ya, dis bada bada im ed, an it bada uol iip a piipl iina Jeruusilem tu.

Revilieshan 6:4

Den mi si wan sekan aas kom out, red laik faiya. Di sumadi we did a raid im did get powa fi mek di piipl dem pan ort ton gens dem wan aneda an kil aaf dem wan aneda iina waar. Im did get wan big suod tu.