Matyu 14:14 - Di Jamiekan Nyuu Testiment

¹⁴ Wen Jiizas kom outa di buot, im si di iip a piipl dem, an did fiil sari fi dem an im mek aal a uu did sik fi dem get bak beta.

Matyu 14:14 ပူးပေါင်းရင်းမြစ်များ

Iibruu 4:15

Kaaz wi no av wan liida fi di priis dem we kyaahn andastan we wi a go chuu, an we no nuo se wi no so chrang wen wi fies notn we wi kaaz wi fi sin. Insted-a dat wi av wan we did get presha fi du aal kain-a rang sitn tu, siem laka wi — bot im neehn sin.

Matyu 9:36

Wen im si di kroud a piipl dem, im did sari fi dem, kaa aal saat a sitn did a bada dem, dem did kanfyuuz an dem kudn elp demself. Dem did komiin laik shiip we naa nobadi fi tek kier a dem.

Iibruu 2:17

So siek-a aal a dem sitn de nou, im did afi ton laik im breda an sista dem we de pan ort. Im did afi ton laik dem iina evri wie. Da wie de, az Gad elpa, im kuda ton wan liida fi di priis dem we Gad kyan chos, an im wi gud an kain tu piipl kaaz im andastan we dem a go chuu. An im kuda kom tek we di piipl dem sin tu.

Iibruu 5:2

Kaaz di liida fi di priis dem a piipl tu, im wi nuo ou fi tek taim wid piipl we no nuo beta an a du rang, sins im wiik an wi du rang tu.

Luuk 19:41

Afta Jiizas kech nier Jeruusilem an si di siti, im staat baal fi dem

Luuk 7:13

Wen di Laad si ar, im sari fi ar an tel ar se, “Osh! No bada baal!”

Maak 9:22

Uol iip a taim di diiman fling im iina faiya an iina waata fi kil im. Bot ef yu kyan du notn fi'im, tek piti pan wi an elp wi, du.”

Maak 6:34

Wen Jiizas kom outa di buot, im si di big big kroud a piipl pan di sii-said an im fiil sari fi dem, kaaz dem did komiin laik shiip we no av no shepad fi luk aafa dem. So im tiich dem nof sitn.

Matyu 4:23

Da taim de, Jiizas did go aal uova Gyalalii a tiich iina di Juu dem choch. Im did a priich di gud nyuuz bout Gad kindom an a get piipl beta — piipl we av aal kain-a siknis an we sik iina aal saat a wie.

Matyu 14:15

Wen it did a kech iivnin, im speshal falara dem go tu im an se, “Nobadi no liv ya-so an it a get liet nou. Sen we di piipl dem so dem kyan go iina di toun dem we nier ya-so an bai sitn fi nyam.”