Maak 4:20 - Di Jamiekan Nyuu Testiment

²⁰ Bot som ada siid jrap pan gud grong. Dem a di piipl we ier Gad wod an tek it iin an it bier uol iip a fruut: toti, siksti ar iivn wan onjrid taim muor dan wa di faama did plaant.”

Maak 4:20 ပူးပေါင်းရင်းမြစ်များ

Koloshan 1:10

An a so kom unu wi kyan liv laik Gad piipl an eva du di sitn dem we wi mek im api: Unu wi du aal kain-a gud sitn, an get fi riili nuo Gad muo an muo tu.

Luuk 8:15

Di wan dem we jrap pan gud grong, a di piipl dem uufa aat riili gud. Dem ier di wod an uol aan pan it. Aal wen aad taim kom, dem stil bier fruut.

Maak 4:8

Bot som a di siid dem jrap pan gud grong, an kom bier fuud. Som bier toti an siksti an iivn onjrid taim muo dan wa di faama did plaant.”

Matyu 13:23

Bot di siid we jrap pan gud grong nou, da sumadi de ier Gad wod an andastan it. So, laik di siid we plaant pan gud grong im bier wan onjrid, siksti ar toti taim muo fruut dan wa di faama did plaant op.”

2 Piita 1:8

Ef unu av dem kain-a wiez ya, an unu riili nuo di Laad Jiizas Krais, dem sitn ya wi gruo muo an muo iina unu aat. An gud sitn wi apm iina unu laif.

Ruoman 7:4

Breda an sista a siem so it go wid unu wen it kom tu di Laa. Wen Jiizas did ded a laik unu did ded wid im, so di Laa naa no powa uova unu. Gad mek Jiizas kom bak alaiv an nou wi bilang tu im. Wi bilang tu Jiizas an siek-a dat wi a sorv Gad wen wi liv rait.

Jan 15:16

“A no unu pik mi, a mi pik unu an put unu wan said fi bier nof fruut — di kain-a fruut we a-go laas fi eva. Wen dat apm, mi Faada gweehn gu'unu eniting unu aks im fa kaa unu a mi falara.

1 Tesaluoniyan 4:1

Nou, breda an sista, fi don wa wi did a se bifuo: wi did don tiich unu aredi ou fi liv so Gad wi api wid unu (an wi nuo se a so unu a liv). Bot, wi a aks unu, an a beg unu iina di Laad Jiizas niem fi liv so muo an muo.

Filipiyan 1:11

an dat evriting we unu du wi gud fi chuu — a onggl Krais Jiizas kyan mek unu du dem sitn de. Mi a prie fi aal a dat so dat Faada Gad wi get nof rispek an priez.

Matyu 13:8

Bot som a di siid dem jrap pan gud grong an kom bier fuud. Som bier wan onjrid taim muo dan wa di faama did plaant, som siksti an som toti.”

Jan 15:2

Im brok aaf aafa mi aal a di lim dem we no bier fruut. An im chrim op di lim dem we bier fruut so dat dem kyan bier muo.