Koloshan 3:8 - Di Jamiekan Nyuu Testiment

⁸ Bot nou, unu fi get rid a aal a dem sitn ya: no get beks an get so mad dat unu kyaahn iivn kanchuol unuself. No kip malis niida, an no chat bad bout piipl an tier dem dong. An no mek no doti wod kom outa unu mout niida.

Koloshan 3:8 ပူးပေါင်းရင်းမြစ်များ

Ifiijan 4:29

Unu fi tap chat doti chat. Taak gud sitn aal di taim. Da wie de, di sitn dem we unu se wi bil op di piipl dem we niid fi get bil op. An enibadi we ier we unu se wi nuo ou Gad lov dem iivn duo dem no dizorv it.

Ifiijan 4:22

Unu lorn se unu fi don we wid di uol laif we unu yuus tu liv an aal a di woklis sitn dem unu yuus tu du, wen unu neva did a fala Jiizas. Dem taim de, unu did lov di wikid sitn dem we onggl did a mash op unu laif.

Ifiijan 5:4

No yuuz doti wod, an no bada wid aigl, kielis an fuul-fuul taak, kaaz Gad piipl no du dem sitn de. Wa unu fi du a gi Gad tangks.

Koloshan 3:5

Eniting we insaida unu we bilang tu da worl ya — dash it we! Mi a taak laik seks sin, an ou unu mait-a lang fi go miks op unuself iina dem sitn de. Unu mait-a no tap tingk bout dem, an waahn fi go du dem so til unu galang go du dem. Bot dem de no kliin. Unu fi dash we dat! Plos aal a di sitn dem we unu waahn waahn we no rait; plos di wikid sitn dem we unu waahn fi du. Unu fi klier dem outa unu laif! Kil dem! An unu no fi waahnti-waahnti niida; aal waahn waahn tingz we unu no niid! Wen unu du dat, a worship unu a worship dem sitn de insted-a unu a worship Gad.

Ifiijan 4:26

Ef unu get beks bout sopm, no mek dat kaaz unu fi sin. An no mek di die don an unu stil beks wid wan aneda.

Iibruu 12:1

So laik ou wan kroud a piipl de aal bout roun wi, an dem shuo wi aredi ou fi chos iina Gad, wi afi dash aaf evriting we a sluo wi dong iina da ries ya. Di sin we tai op wi fut iizi iizi, wi afi dash dem aaf man, an ron di ries we de infronta wi an no wier out pan di wie.

Koloshan 3:9

No lai tu unu wan aneda, kaaz unu don wid di uol taim laif nou, an so unu naa du di sitn dem we unu yuus tu du agen.

1 Piita 2:1

So tap dabl iina aal kain-a sin an wikidnis. No beks wid piipl an no chat tu dem, no bada tel no lai an no bi no ipokrit niida. Unu no fi bad main piipl fi we dem av. An mek shuor se unu no tek unu mout an tier dong nobadi.

2 Korintiyan 12:20

Mi fried se wen mi riich de, unu naa go tan ou mi waahn unu fi tan an mi naa go tan ou unu waahn mi fi tan. Mi fried se wen mi riich de a bier kyas-kyas a gwaan, piipl a-go beks an a shout aafa dem wan aneda, an piipl a bad main ada piipl fi dem sitn dem. Mi fried se mi a-go fain unu a tel lai pan unu wan aneda an a susu-susu bout unu wan aneda an evribadi onggl a-go bizniz bout demself. Wen mi kom de mi fried se mi a-go fain piipl a gwaan buosi-buosi an evriting a-go ton opsaid dong.

1 Korintiyan 3:3

Unu stil a mek di sitn dem we unu badi waahn kanchuol unu. Ef unu eva a kos unu wan aneda, an ef unu eva red yai an waahn waahn unu wan aneda sitn dem, unu no tingk se unu a mek unu badi kanchuol unu? Unu no tingk se unu a gwaan laik di piipl dem we no nuo Gad?

Matyu 5:22

Bot ier wa mi a se, jos beks wid unu breda ar unu sista, an unu afi go a kuot, an di joj a-go se unu gilti an rait unu aaf! An enibadi we shiem dem breda ar sista an tel dem ou dem woklis an dem sitn de, unu a-go afi go a di tap-a-tap joj dem, an enibadi we kaal dem breda ar sista wan woklis gud fi notn fuul — el faiya a-go riich dem.

Gyalieshan 5:15

Bot ef unu kip aan a bait an chaa op chaa op unu wan aneda laik unu a wail animal, unu beta wach out, kaaz unu a-go mash op unu wan aneda.

Ruoman 13:13

So mek wi liv ou wi nuo wi fi liv, mek wi liv laik piipl we iina di lait, no laik piipl we iina di daak. Wi no fi tek paat iina no wail seks paati an wi no fi jringk til wi jongk. Wi no fi a sliip roun sliip roun ar a tek paat iina no kain-a seks sin. Unu no fi lov fait an unu no fi red yai fi ada piipl tingz.

Juud 1:8

A siem so dem piipl de kliem se dem get vijan an so dem du aal kain-a naasinis we mash op dem badi. Chuu dem kliem se dem get vijan dem go gens Gad, fait gens enibadi we a ruul uova dem, an bad mout Gad ienjel dem.

2 Piita 2:18

Dem mek big chat we no wot notn an chrai fi jraa we di piipl dem we jos bieli ton we fram di piipl dem we naa liv rait. Kaaz dem piipl ya bieli muuv we fram dem sitn de, an wi stil wel waahn av seks iivn duo dem no marid an dabl-dabl iina aal kain-a sin, di faalz tiicha dem yuuz dis an jraa dem we.

Jiemz 2:7

No dem siem wan a chat aal saat a torbl sitn buot di Wan we wi bilang tu gud niem?

1 Timoti 1:20

Tuu piipl we dis apm tu a Aimeniyos an Aligzanda. Mi ton dem uova tu Sietan so dat dem wi lorn no fi kos Gad.

1 Timoti 1:13

Im pik mi iivn duo mi yuus tu kos im an taament im piipl dem. Duo mi did wikid, im di stil gud an kain tu mi kaaz im si se dem taim de mi neva biliiv iina im an mi neva riili nuo wa mi did a du.

Gyalieshan 5:26

Mek wi no get ful-a wiself an tingk se wi beta dan ada piipl. Mek wi no provuok wan aneda an mek wi no red yai fi wan aneda sitn dem.

Gyalieshan 5:20

Di piipl we mek dem badi kanchuol dem worship aal kain-a faalz gad an wok uobiya. Dem chriit piipl aad an dem lov kos an fait. Dem bad main piipl fi we dem av an it no tek notn fi set dem aaf. Di piipl dem we mek dem badi kanchuol dem eva waahn piipl fi rispek dem bot dem no rispek nobadi. Dem onggl bizniz wid demself. Dem kaaz piipl fi plit op an dem onggl taak tu dem fren.

Maak 7:22

sliip wid ada piipl we dem no marid tu, waahnti-waahnti, wikid, tel lai, no bizniz wid no laa an brok evri wan a dem, red yai, tek dem mout tier dong ada piipl, shuo aaf, an ful op a aal kain-a fuulinish.

Revilieshan 16:9

Di son did so at it bon di piipl dem bad bad. An iivn duo dem a bon op, dem stil a kos Gad, Gad we av powa uova di sitn dem we mek piipl sofa. Dem kos im an stil wudn ton we fram dem sin an gi Gad priez.

Juud 1:13

Di wikid sitn we dem du a-go shuo op laik fraat pan sii waata. Dem piipl ya komiin laik staar we no tan we Gad put dem fi tan, so Gad a-go lak dem op iina wan daak daak plies fi eva an eva.

2 Piita 2:7

an ef im siev Lat, wan man we du wa rait iina Gad yai, an uu did taamentid iina im suol siek-a di doti laif we di wikid piipl dem roun im did a liv,

Ifiijan 4:25

So den, unu fi tap tel lai. Mek aal a wi taak di chuut tu wi wan aneda, kaaz di choch komiin laik wan badi, an aal a wi a paat a it.