Koloshan 2:23 - Di Jamiekan Nyuu Testiment

²³ Iivn duo dem ruul ya mait-a soun laik se dem mek gud sens, dem push piipl fi worship di wie ou di piipl dem we mek di ruul dem kom tugeda an se piipl fi worship; dem presha piipl fi gwaan laik se dem ombl; an dem push dem fi anggl dem badi bad — bout a sorv dem a sorv Gad wen dem du dat. Dem ruul ya mait-a luk laik se dem mek sens, bot dem no wot a ting. Dem no elp nobadi fi tan op chrang gens di rang sitn dem we di badi waahn, an fi elp dem kip we fram aal a dem sitn de.

Koloshan 2:23 ပူးပေါင်းရင်းမြစ်များ

Ruoman 13:14

Insted-a aal a dat, unu fi mek Jiizas Krais ruul uova unu an tap tingk bout di wikid sitn dem we unu badi waahn fi du an ou unu kyan get dem sitn de.

Ifiijan 5:29

Kaaz piipl no iet dem uona badi. Wa dem du a fiid an tek kier a demself, siem laik ou Krais luk aafa wi we mek op im choch.

Koloshan 2:18

No fala nobadi we waahn mek unu fiil bad kaaz dem se unu no worship Gad ou unu fi worship im. Dem gwaan an gwaan bout ou unu fi ombl unuself, an bout ou unu fi worship ienjel. No lisn dem. Dem dis a chat a galang bout wa dem kliem se dem si iina vijan. Bot dem a buos an dem no av notn fi buos bout siek-a dem worliyan main.

Koloshan 2:22

Aal a dem ruul ya a taak bout fuud an jringk we onggl yuuz wan taim an we no wot notn afta dat. An unu no fi fala dem ruul ya, kaaz a jos piipl mek dem op an tiich dem.

Koloshan 2:8

Wach unuself! No mek nobadi chrap unu wid aagiment we onggl soun laik se dem mek sens, bot we no riili mek no sens at aal. Nuo! No mek dem tek unu ton no sliev. Dem aagiment de dis a taak bout ou piipl tingk bout sortn tingz, an bout wa faada tiich dem pikni, an we dem pikni de kom tiich fi dem pikni. Dem sitn de jos diil wid ou piipl luk pan di worl, an a jos taak bout powaful spirit we iina di worl. Dem no av notn fi du wid di chuu mesij bout Krais Jiizas.

1 Timoti 4:3

Dem tiich se piipl no fi get marid an dem no fi nyam sortn an sortn fuud. Bot di piipl we biliiv iina di chuu Gad nuo se Gad mek aal fuud fi nyam, aal yu afi du a gi tangks fos.

1 Timoti 4:8

Kaaz jos laik ou wi eksasaiz an chrien wi badi so it wi chrang, wi afi eksasaiz an chrien wi aat fi fala Gad. Kaaz wen wi chrien wi aat fi fala Gad wi no jos get chrang bot Gad kaaz wi fi liv nou an fi eva an eva.