Koloshan 1:27 - Di Jamiekan Nyuu Testiment

²⁷ Gad did waahn dem nuo umoch im riili riili bles unu — unu piipl we kom fram aal bout. Da mesij ya se Krais Jiizas liv iina unu aat, an unu kyan luk fi kom si an nuo ou Gad big an powaful.

Koloshan 1:27 ပူးပေါင်းရင်းမြစ်များ

Matyu 13:11

Jiizas se, “Unu get di chaans fi nuo di siikrit sopm dem bout Gad kindom, bot no dem.

Luuk 17:21

an piipl naa go kyan se, ‘Luk, si Gad a ruul ya!’ ar ‘Luk, si Gad a ruul de,’ kaaz Gad a ruul mongks unu aredi.”

Jan 14:17

Da sumadi de a di Spirit we shuo piipl di chuu sitn dem bout Gad. Di worliyan dem kyaahn tek im iin an mek im kanchuol dem laif, kaa dem no si im an dem no nuo im. Bot unu nuo im, kaaz im liv wid unu an a-go de insaida unu.

Jan 14:20

Wen da die de kom, unu a-go si se mi liv iina mi Faada, dat unu liv iina mi an dat mi liv iina unu.

Jan 14:23

Jiizas se tu im se, “Ef sumadi lov mi den da sumadi de a-go du wa mi se dem fi du. Mi Faada a-go lov dem, an di tuu a wi a-go liv wid dem.

Jan 17:26

Mi mek dem nuo yu, an mi a-go gwaan mek dem nuo yu, so dat dem mait-a kyan lov dem wan aneda siem laka ou yu did lov mi, an so mi kyan liv iina dem.”

Jan 6:56

Enibadi we nyam mi badi an we jringk mi blod kluos tu mi, an mi kluos tu dem.

Ruoman 11:33

Gad gud an kain tu aal piipl nof nof! Nobadi no waiz laik im an nobadi no nuo aal we im nuo. Uu kyan se wai im mek op im main fi du di sitn dem we im du? Uu kyan andastan di wie im du tingz?

Ruoman 2:4

Gad tek im taim wid unu, im put op wid unu an im no ponish unu siem taim wen unu du rang. Unu no si se Gad gud tu unu? Ar a kier unu no kier bout dem sitn de? Unu no si se Gad kain tu unu, kaaz im chrai fi get unu fi ton we fram sin an sari fi di rang we unu du?

Ruoman 5:2

Aal a di gud sitn dem we wi a get fram Gad an we wi no dizorv, wi a get dem siek-a wa Jiizas Krais did du an kaaz wi biliiv. An wi wel api kaaz wi nuo fi shuor se Gad a mek wi muor an muor laik im.

Ruoman 8:10

Bot ef Krais Jiizas a liv iina unu, di Spirit wi kaaz unu fi liv. Unu badi a-go ded kaaz a unu sin bot unu spirit a-go liv. Krais Jiizas mek unu liv kaaz Gad put tingz rait bitwiin unu an im.

Ruoman 9:23

Gad tek taim wid dem kaaz im did waahn fi shuo dem ou big, brait an powaful im bi. Im did waahn dem, di piipl we im gud an kain tu, fi si se dem a-go ton laik im. Im did waahn dem, di piipl we im pik an get redi fram lang taim, fi si se im a-go mek dem ton laik im.

1 Korintiyan 3:16

Unu no nuo se unu badi a Gad ous an dat im Spirit a liv iina unu?

2 Korintiyan 2:14

Wi tangk Gad we mek wi eva a win gens di wikid sitn dem we wi fies, chuu wi an Jiizas a wan. Gad yuuz wi fi pred di Gud Nyuuz bout Jiizas aal bout, an da Gud Nyuuz de komiin laik wan swiit swiit sumel.

2 Korintiyan 4:17

Di likl chobl an di sofarieshan we wi a go chuu nou, naa go laas fi eva an dem a no notn wen yu tingk bout di nais nais sitn dem we Gad a-go gi wi, wen wi riich a evn.

2 Korintiyan 4:6

Di Gad we se, “Mek di lait shain iina di daak,” a im siem wan mek im lait shain iina wi aat so dat wi kyan andastan umoch im lov wi an ou powaful im bi. An wi onggl get fi andastan dem sitn de wen wi biliiv iina Krais Jiizas.

2 Korintiyan 6:16

Faalz gad kyan de iina Gad choch? Unu badi a di ous fi di Gad we kyaahn ded. Gad imself se: “Mi wi liv iina dem aat an mi wi waak wid dem. Mi wi bi dem Gad an dem a-go bi mi piipl.”

Gyalieshan 2:20

An a no mi a liv no muor bot a Krais Jiizas a liv iina mi. Nou mi liv kaaz mi chos iina Gad Bwai Pikni — di wan we lov mi an we ded fi mi.

Gyalieshan 4:19

Mi pikni we mi lov, jos laik ou mada go chuu nof pien wen dem a av biebi — a siem so mi a fiil pien fi unu. An mi naa go tap fiil pien til unu an Jiizas a wan, an unu staat fi biyiev laik im.

Ifiijan 1:7

Jiizas gi op im laif pan di kraas an fi im blod mek wan wie fi frii wi an paadn wi fram wi sin dem. A chuu Gad gud an kain mek dem sopm ya kyan apm.

Ifiijan 2:22

So, unu piipl we a no Juu, kaaz unu chos iina Jiizas, Gad a bil op unu an di Juu dem we chos iina Jiizas. Im a bil unu op tugeda fi faam wan ous we Gad Spirit liv iina.

Filipiyan 4:19

An kaaz unu an Krais Jiizas kluos, fi mi Gad gweehn gi unu evriting we unu niid. An unu nuo se im wel rich, an we im av kyaahn ron out.

Koloshan 1:5

Unu du dem sitn de kaaz unu a luk fi get wa Gad put op iina evn fi wi, an unu nuo fi shuor se unu a-go get dem. Wa Gad put op a di sed sitn dem we unu did ier bout wen unu did ier di Gud Nyuuz, an da mesij de chuu.

Koloshan 2:3

A im wan kyan mek unu andastan di chrezha dem we Gad did aid. Dem chrezha de wi mek unu waiz an kyan andastan, an riili nuo bout Gad. Kaaz a iina Krais Jiizas dem chrezha de de.

Koloshan 3:11

Siek-a dat, wi no av Juu piipl difrant fram piipl we a no Juu. Wi no av piipl we sorkomsaiz difrant fram di wan dem we no sorkomsaiz. Wi no kaal nobadi wail, farina piipl, an wi no av sliev difrant fram piipl we frii. Kaaz rait ya nou, Krais Jiizas a aal wi bizniz bout, an im iina aal a wi we a liv da nyuu laif ya.

1 Timoti 1:1

Timoti, dis a Paal, Jiizas Krais apasl. A di Gad we siev wi an Jiizas Krais di wan we mek wi kyan luk fi get aal kain-a gud sitn, aada mi fi bi wan apasl.

Iibruu 6:19

Wen wi chos Gad, an wi nuo fi shuor se im a-go gi wi wa im pramis wi, dat mek wi suol chrangga, an notn we a gwaan kyaahn kom shiek wi op. Wi tan todi jos laik wen di angka fi di ship jrap a di batam a di sii so di ship tan wan plies. An wen wi chos iina Gad so, di sitn dem we wi set wi aat pan, dem sitn de go insaid baka di kortn, go wan speshal speshal plies we Gad tan an we di priis dem wan kyan go.

1 Jan 4:4

Mi pikni we mi lov — unu a Gad pikni, an unu si di wan dem we go gens Gad, unu win dem aredi, kaaz di wan we iina unu muo powaful dan di wan we iina di worl.

Revilieshan 3:20

Lisn mi! Mi tan op rait a di duor an a nak. Ef enibadi ier mi a kaal an uopm di duor, mi wi kom iina im ous an mi an im wi nyam an jringk tugeda.