Jiemz 1:4 - Di Jamiekan Nyuu Testiment

⁴ Unu fi gwaan uol aan chrang no mata wa apm an chos iina Gad so unu kyan bi aal we Gad waahn unu fi bi, an so unu wi no shaat a notn.

Jiemz 1:4 ပူးပေါင်းရင်းမြစ်များ

Matyu 10:22

An evribadi a-go iet unu kaaz unu fala mi. Bot enibadi we uol aan tait an tan op chrang til di sofarieshan don, Gad a-go siev dem piipl de.

Matyu 19:20

So di yong man se tu im se, “Mi a fala dem de wid aal a mi aat. So a wa muo mi niid?”

Matyu 5:48

So ier mi nou, unu no fi gud onggl somtaim an onggl tu som piipl; nobadi no fi av notn bad fi se bout unu, tan jos laik unu faada we iina evn — im gud aal di wail, tu evribadi, an nobadi kyaahn se notn bad bout im an a taak chuut.”

Maak 10:21

Jiizas luk pan im an lov im, an se tu im se, “A onggl wan sitn yu shaat a. Go sel evriting we yu av an gi di moni tu di puo piipl dem, an yu wi rich iina evn. Wen yu du dat, kom fala mi.”

Luuk 18:22

Afta Jiizas ier dis, Jiizas se tu im se, “Yu stil av wan ting lef fi du. Sel evriting we yu av an gi di moni tu di puo piipl dem, an yu wi rich iina evn. Wen yu du dat, kom fala mi.”

Luuk 21:19

Uu tan op chrang fi mi no mata wa, wi siev dem laif.

Luuk 8:15

Di wan dem we jrap pan gud grong, a di piipl dem uufa aat riili gud. Dem ier di wod an uol aan pan it. Aal wen aad taim kom, dem stil bier fruut.

Jan 17:23

mi iina dem an yu iina mi — so dem kyan komiin laka wan, an so di piipl dem iina di worl mait-a nuo se a yu sen mi kom, an dat yu lov mi falara dem siem laka ou yu lov mi.

1 Korintiyan 2:6

Nou iivn duo mi no yuuz no big fansi wod, di piipl dem we biliiv iina Gad nof nof, dem tingk se di mesij we mi priich waiz. It no waiz kaaz a sopm we som sumaat piipl tingk op. An it no waiz kaaz di ruula dem we de bout nou an we a-go luuz dem powa an ded, tingk se it waiz.

Gyalieshan 6:9

So mek wi no get taiyad fi du gud, kaaz ef wi no gi op, wen Gad redi, im wi mek wi riip nof gud sitn.

Koloshan 4:12

Epafras, we kom fram mongks unu, an we a wan a Krais Jiizas sorvant dem, im se oudi tu. Im eva a prie fi unu wid aal a im aat. Im prie se unu wi tan op chrang iina Gad an no tap chos iina im. Im prie se unu wi biliiv iina Gad so til nobadi kyaahn mek unu tap chos iina im. An im prie aad se unu wi nuo fi shuor wa Gad waahn unu fi du an fi biliiv.

1 Tesaluoniyan 5:23

Wi prie se Gad imself we gi piipl piis, wi put unu wan said fi liv fi im an sorv im wid aal a unu aat, an wi mek unu tan jos laik im iina evri wie. An wi prie se im wi no mek no paat a unu — spirit, suol ar badi, kyan get bliem fi notn wen wi Laad Jiizas Krais kom bak.

2 Timoti 3:17

Gad wod wi mek im sorvant dem redi an wi mek dem kyan du aal kain-a gud sitn.

Iibruu 13:21

wi gi unu aal a di gud sitn dem we impuotant fi go du wa im waahn unu fi du. Mi prie tu se im wi mek wi ton aal a wa im waahn wi fi ton. An dis wi apm kaaz im wi mek Krais Jiizas du dat. Di piipl dem fi priez Krais Jiizas fi eva an eva an lif im op. Iemen.

Jiemz 1:5

Ef sumadi no waiz, aal dem afi du a aks Gad an im wi mek dem waiz, kaaz Gad naa go uol bak notn fram dem. Im wi gi dem wa dem aks fa so dem wi nuo se im lov dem.

Jiemz 3:2

Aal a wi du rang sitn nof taim. Bot ef sumadi neva se notn rang yet dem no av no sin at aal. Kaaz ef nobadi kyan kanchuol dem tong dem kyan kanchuol dem uol badi tu.

1 Piita 5:10

Bot afta unu sofa likl, di Gad we lov unu so til, we no uol bak non a im lov fram unu, im sed wan we kaal unu fi enjai im powa we kyaahn don, kaaz unu a fala Krais Jiizas — im a-go fiks bak evriting fi unu agen, an di chos unu chos iina im, im a-go mek dat chrang chrang. Im a-go mek unu aat chrang tu, so unu kyan anggl di sofarieshan. An im a-go mek shuor se unu tan op chrang iina im no mata ou rof it mait-a get.

2 Piita 1:9

Bot ef sumadi no av dem, dat de sumadi kyaahn si forda dan dem nuoz an dem blain tu, an dem figet se Gad did paadn dem fram di sin dem we dem did du iina di paas.