Jiemz 1:12 - Di Jamiekan Nyuu Testiment

¹² Ef unu uol aan chrang an no gi op wen unu a go chuu chraiyal an kraasiz we kom fi tes unu, unu a-go wel api. Kaaz wen unu tes don, Gad gweehn gi unu di kroun a laif we im pramis fi gi evribadi we lov im.

Jiemz 1:12 ပူးပေါင်းရင်းမြစ်များ

Matyu 10:22

An evribadi a-go iet unu kaaz unu fala mi. Bot enibadi we uol aan tait an tan op chrang til di sofarieshan don, Gad a-go siev dem piipl de.

Matyu 25:34

“Den di king a-go se tu di wan dem pan im rait-an-said se, ‘aal a unu we mi Faada bles, kom kom tek Gad Kindom, a fu'unu uon. Gad did fiks it op fu'unu fram im a mek di worl.

Luuk 6:22

Gad bles aal a unu we piipl iet, we dem lef out, disrispek an kaal aal saat a niem an se unu wikid, kaaz unu fala di Man we Gad Pik.

Ruoman 5:4

An wen wi sofa chuu nof sitn an no gi op, Gad wi proud a wi kaaz a tes im did a tes wi an a paas wi paas di tes. An wen wi si se Gad proud a wi, wi wi nuo se im wi gi wi aal wa im pramis wi.

Ruoman 8:28

Wi nuo se aal di piipl we lov Gad an we Gad kaal fi tek paat iina im plan, wi nuo se Gad wok wid dem fi mek shuor se no mata wa apm, evriting wok out fi fi dem gud.

1 Korintiyan 2:9

Bot it rait dong se: “No yai no si, no iez no ier, aal a di sitn dem we Gad pudong fi di piipl we lov im. Nobadi kudn iivn tingk dem op.”

1 Korintiyan 8:3

Bot ef sumadi lov Gad, Gad nuo dem.

1 Korintiyan 9:25

Enibadi we a rona ar uu plie eni kain-a spuot afi eksasaiz an wok aad evridie. Dem afi nuo ou fi kanchuol demself iina evriting we dem du. Dem du dat so dat dem kyan win wan medal. Di medal we dem win kyan mash op bot yu si wa wi a-go get, dat kyaahn mash op — it a-go laas fi eva an eva.

2 Timoti 2:15

Chrai aad an du yu wok di wie Gad waahn yu fi du it. Mek shuor yu du yu wok gud an onggl tiich di chuut. Ef yu du dis, yu naa go av notn fi shiem bout an Gad wi api wid yu.

2 Timoti 4:8

Di Laad we aalwiez fier tu evribadi wen im a joj dem, a-go gi mi wan kroun fi aal a di wok we mi du. Im a-go gi mi it wen im kom bak fi joj di worl. An a no mi wan a-go get kroun, im a-go gi evribadi we did a lang fi im kom bak.

Iibruu 10:32

Bot unu fi memba iina di paas wen unu did jos andastan Gad wie, di sofarieshan we unu did afi go chuu, bot unu uol aan an kot chuu siem wie.

Iibruu 11:17

Kaaz Iebriyam did chos iina Gad wen Gad did tes im, im did redi fi sakrifais Aizak gi im. Im did get di pramis we Gad did mek wid im, an im did stil redi fi gi op im wan dege-dege bwai.

Iibruu 12:5

A memba unu no memba wen Gad did taak tu unu kaaz unu a im pikni, an tel unu tingz we mek unu aat chrang? Iihn? “Mi pikni, wen mi ponish unu fi mek unu si se unu du sitn rang, unu no fi tek it laik se a no notn, an no bada gi op kaaz mi rof unu op an set unu chriet,

Iibruu 6:15

An afta Iebriyam wiet ou lang an gwaan chos Gad, im get wa Gad pramis im.

Jiemz 2:5

Mi breda an sista, ier wa mi a se. No Gad pik di puo piipl iina di worl fi bles dem kaaz dem biliiv iina im? Im pik dem fi tek paat iina im kindom wa im pramis fi gi aal uu lov im.

Jiemz 5:11

Lisn tu mi, wi se di wan dem we tan op chrang fi Gad, a dem bles. Unu memba ou Juob did tan op chrang fi Gad chuu aal a di torbl sitn dem we im sofa? Unu memba ou Gad elp im, an kyari im chuu. Di Laad du aal a dem sitn de kaaz a ou im jengkl an gud an kain.

1 Piita 3:14

Bot aal ef dem mek unu sofa kaaz unu a du wa rait — a bles unu bles! No fried a notn, an no wori unuself.

1 Piita 4:13

Bot unu fi api se unu a sofa laik ou Krais Jiizas did sofa, so unu kyan daans an praans iivn muo wen im kom bak wid aal a di powa, an piipl si ou big, ou laaj an ou powaful im riili bi!

1 Piita 4:14

Ef piipl shiem unu, an se aal kain-a bad sitn tu unu kaa unu a fala Krais Jiizas — a bles unu bles. Kaaz a di powaful Spirit — Gad Spirit, kom tan wich paat unu de.

1 Piita 5:10

Bot afta unu sofa likl, di Gad we lov unu so til, we no uol bak non a im lov fram unu, im sed wan we kaal unu fi enjai im powa we kyaahn don, kaaz unu a fala Krais Jiizas — im a-go fiks bak evriting fi unu agen, an di chos unu chos iina im, im a-go mek dat chrang chrang. Im a-go mek unu aat chrang tu, so unu kyan anggl di sofarieshan. An im a-go mek shuor se unu tan op chrang iina im no mata ou rof it mait-a get.

1 Piita 5:4

An wen di Ed Shepad kom bak, unu wi get wan shaini kroun we naa go fied out.

1 Jan 4:19

Wi lov wan aneda kaaz Gad lov wi fos.

Revilieshan 2:10

No fried a di sitn dem wa unu bout fi sofa. Mi a tel unu, di devl a-go fling som a unu iina prizn fi tes unu. An unu a-go sofa fi ten die. Bot unu fi tan op chrang an chos mi siem wie, iivn ef dem mek op dem main fi kil unu. Kaaz siem laik ou wan rona get wan medal wen im win wan ries, mi wi gu'unu laif fi fu'unu praiz.

Revilieshan 3:19

Di piipl we mi lov, mi taak tu dem aad an chrietn dem out an mek dem nuo se we dem a du rang. So get siiros an ton we fram unu sin dem an shuo se unu sari.

Revilieshan 3:21

Enibadi we biit di devl an no gi iin tu di sitn dem we im waahn dem fi du, mi a-go gi im di rait fi sidong saida mi, pan mi chuon, siem laik ou mi did biit di devl an no gi iin tu di sitn dem we im did waahn mi fi du, an sidong saida mi Faada pan fi'im chuon.