Jan 19:6 - Di Jamiekan Nyuu Testiment

⁶ Wen di ed priis dem an dem we gyaad Gad ous si im dem shout out, “Niel im op pan di kraas mek im ded! Niel im op!” So Pailat se tu dem se, “Unu tek im niel im op unuself! Mi no si im du notn rang.”

Jan 19:6 ပူးပေါင်းရင်းမြစ်များ

Matyu 26:58

Bot Piita did de likl forda aaf a fala Jiizas. Im fala im go aal di wie tu wich paat di liida fi di priis dem liv. Im go iin de an go sidong out iina di yaad wid di gyaad dem fi si wa a-go apm tu Jiizas.

Matyu 27:22

Pailat se tu dem se, “Den wa mi fi du wid Jiizas we dem kaal Krais?” Di uol a dem se, “Niel im pan di kraas!”

Matyu 27:24

Wen Pailat si se im neva did a go no we wid dis ya, bot did onggl a rail op di kroud muo, im tek waata wash im an infronta dem an se, “A no mi mek da man ya ded. Fi'im blod de pan fu'unu ed!”

Luuk 23:4

Den Pailat tel di ed priis dem an di kroud se, “Mi no fain no riizn fi chaaj da man ya.”

Jan 18:3

So Juudas kom a di plies wid wan gruup a suoja. Di ed priis dem an di Farisii dem sen som a di man dem we gyaad Gad ous de tu. Di uol a dem go iina di gyaadn wid lamp, taach an aal saat a sitn fi fait wid.

Jan 18:31

Den Pailat se tu dem se, “Tek im an diil wid im bies pan fu'unu uona laa.” Bot di Juu liida dem se, “Di laa no lou wi fi kil nobadi.”

Jan 18:38

“Di chuut, a wa dat?” Pailat aks im. Afta Pailat aks Jiizas dis ya, im go out fi taak tu di Juu dem wan neks taim. Im se tu dem, “Mi no si notn we mi fi chaaj im fa.

Jan 19:15

Bot dem shout out se, “Tek im we! Tek im we! Niel im pan di kraas mek im ded!” “Mi fi niel op unu king pan di kraas mek im ded?” Pailat aks dem. “Siiza a di onggl king wi av,” di ed priis dem se tu im.

Jan 19:4

So wan neda taim, Pailat kom out tu di Juu dem an se, “Unu luk, si mi a tek im out tu unu ya, so unu kyan si se mi no fain se im du notn rang!”

Aks 2:23

Azkaadn tu im plan, Gad gi uova da man de tu unu kaaz a so im did set it op, an im did don nuo se a so tingz did a-go go. An unu mek di piipl we a no Juu kil im pan di kraas.

Aks 7:52

Wich wan a Gad prafit dem fi unu faada faada dem neva mek sofa? Dem aal kil Gad mesinja dem we did tel dem fram wie bak wen se di wan we aalwiez du we rait did a kom. Bot unu sel im out an kil im.