Jan 19:30 - Di Jamiekan Nyuu Testiment

³⁰ Wen im get di wain, im se, “It don nou.” Den im ben dong im ed an put im spirit iina Gad an an ded.

Jan 19:30 ပူးပေါင်းရင်းမြစ်များ

Jan 17:4

Mi shuo piipl pan ort ou yu big an powaful, wen mi du di wok we yu did gi mi fi du.

Filipiyan 2:8

An wen im du dat, im ombl imself an du aal we Faada Gad did waahn im fi du — im aal gi op im laif pan di kraas.

Iibruu 12:2

Wi fi kip wi yai lak pan Jiizas. A im fos shuo wi wa it miin fi chos iina Gad, an mek wi kyan chos im iina evri wie. Im nuo se im did a-go en op wel api, so im go chuu di sofarieshan an go ded pan di kraas, an im neehn bizniz se im did a du sitn we evribadi els wuda shiem fi du. Afta dat im galang go sidong a Gad rait an.

Jan 10:11

“Mi a di gud shepad. Di gud shepad wi gi op im laif fi di shiip dem.

Luuk 23:46

Jiizas baal out loud, “Faada, mi put mi spirit iina yu an.” Az Jiizas se dis so, im bluo im bret wan laas taim an ded.

Ruoman 10:4

Bot Krais Jiizas mek it so dat wi no afi fala di Laa no muor; Gad wi mek tingz rait bitwiin im an enibadi we biliiv iina Krais Jiizas.

Jan 19:28

Afta dis, wen Jiizas si se evriting we did fi apm did apm, im se, “Mi torsti.” Im did se dat so dat wa Gad wod se wuda kom chuu.

Maak 15:37

Bot Jiizas baal out loud loud, bluo im bret wan laas taim an den ded.

Jan 10:18

Nobadi no tek we mi laif fram mi. A mi gi it op miself. Mi av di powa fi gi it we an mi av di powa fi tek it bak. A dis ya mi Faada tel mi fi du.”

Jan 4:34

“Fi mi fuud,” Jiizas se tu dem, “a fi du we di wan we sen mi kom ya waahn mi fi du, an fi finish op di wok im gi mi.

Matyu 20:28

A so it fi go, jos laik ou di Man we Gad Pik neehn kom ya fi nobadi sorv im; a kom im kom ya fi sorv piipl an fi gi op im laif so piipl kyan get frii fram dem sin.”

Matyu 27:50

Den Jiizas baal out agen loud loud an put im spirit iina Gad an.

Iibruu 9:22

An bies pan wa di laa se, yu did afi springkl blod pan nieli evriting fi mek it kliin; an ef no blod no ron, no sin no get paadn.

Ruoman 3:25

Gad sen Jiizas fi gi op im laif an siev wi. Wen Jiizas ded pan di kraas, fi im blod pie fi wi sin dem an so wi no afi get ponish. Aal wi afi du fi get wi sin dem paadn, a biliiv iina Jiizas. Wen Gad sen Jiizas im shuo se im no paashal — im chriit evribadi siem wie, kaaz bifuo Jiizas did kom, im neva ponish nobadi fi dem sin, im tek taim wid dem.

Matyu 3:15

So Jiizas ansa im se, “Rait ya nou, du wa mi aks yu fi du, da wie ya wi wi du aal we Gad waahn wi fi du!” So Jan se aarait den an du it.

1 Korintiyan 5:7

Unu mos get rid a aal a di sin we de iina unu laif, jos laik ou wi dash we uol yiis. Unu mos get rid a it so dat unu kyan komiin laik fresh duo we naa no yiis iina it. Kaaz dat a wa unu riili fi bi sins Gad mek unu nyuu wen unu biliiv iina Jiizas. Kaaz Jiizas ded fi set wi frii, im komiin jos laik di biebi shiip we dem did kil a Paasuova taim.

Luuk 22:37

Mi a tel unu, it rait dong se, ‘An dem kaal out im niem wid aal di kriminal dem.’ Wa rait dong, afi apm. A mi it a taak bout an it a gwaan rait ya nou an it a-go don suun suun.”