Jan 14:6 - Di Jamiekan Nyuu Testiment

⁶ Jiizas ansa im an se, “Mi a di wie, mi a di chuut, mi a di wan we mek piipl kyan liv. Nobadi kyaahn go tu di Faada ef dem no go chuu mi.

Jan 14:6 ပူးပေါင်းရင်းမြစ်များ

Matyu 11:27

“Mi Faada gi mi evriting. A onggl di Faada wan riili nuo di Bwai Pikni. An nobadi no riili nuo di Faada, onggl di Bwai Pikni wan an enibadi els we di pikni waahn fi mek nuo di Faada.

Jan 1:14

Nou, di wan we a di Wod ton man, im kom kom liv mongks wi, an wi si ou im big an powaful. Im a Faada Gad wan an onggl dege-dege Bwai Pikni. Faada Gad sen im kom an a di Faada mek im so big an powaful. Di Bwai Pikni shuo wi nof nof lov iivn duo wi no dizorv it, an a bier chuu sitn im shuo wi bout Gad.

Jan 1:17

Kaaz, yu si, Gad gi Muoziz di Laa fi gi wi, bot im yuuz Jiizas fi mek wi nuo wa chuu, an siek-a Jiizas, im shuo wi lov we wi no dizorv.

Jan 1:4

Im a di wan we mek evriting liv, an a im kyari lait kom gi piipl so dem kyan si.

Jan 10:28

Mi mek dem kyan liv fi eva, an dem naa go ded. Nobadi naa go grab an tek dem outa mi an.

Jan 10:7

So im se tu dem agen se, “Mi a tel unu fi chuu chuu se dat mi a di giet we di shiip dem go chuu.

Jan 10:9

Mi a di giet. Ef enibadi kom iin chuu mi, dem a-go siev. Dem a-go waak iin an waak out, an dem a-go fain plies wid nais griin graas fi nyam.

Jan 14:19

Likl muo fram nou, di worliyan dem naa go si mi agen, bot unu gweehn si mi. Kaa mi a liv, unu gweehn liv tu.

Jan 15:1

“Mi a wan chrii, di riil chrii we gud fruut gruo pan, an mi Faada a di gyaadna we luk aafa di chrii.

Jan 18:37

“So yu a king, den?!”, Pailat aks im. Jiizas ansa im an se, “ ‘King,’ a di wod yu yuuz. A dis mi did baan fa; a dis ya mek mi kom iina di worl: fi taak tu piipl bout di sitn dem we riili chuu. Evribadi we lov di chuut lisn we mi se.”

Jan 5:21

Kaa, siem wie laka ou di Faada mek ded piipl kom bak alaiv, a siem wie so di Bwai Pikni gi laif tu enibadi im waahn gi'it tu.

Jan 6:33

Kaa, di sumadi we kom dong fram outa evn an we gi laif tu di piipl dem we de iina di worl a im a di fuud we Gad gi.”

Jan 6:51

Mi a di fuud we gi laif, an we kom dong fram outa evn. Ef enibadi nyam dis ya fuud ya, dem a-go liv fi eva. Mi uona badi a di fuud we mi gweehn gi so di piipl dem iina di worl kyan liv.”

Jan 6:57

Jos laik ou di Faada we gi laif sen mi an mek mi liv, a siem so mi a-go mek di sumadi we nyam mi liv.

Jan 6:68

Saiman Piita ansa im an se, “Laad, a uu els wi mos go tu? A yu av di mesij we kaaz piipl fi liv fi eva.

Jan 8:32

Unu gweehn nuo di chuut, an di chuut gweehn frii unu.”

Jan 8:51

Mi a tel unu fi chuu chuu, enibadi we du wa mi tiich naa go ded.”

Aks 3:15

Unu kil di wan we gi piipl riil laif, bot Gad mek im kom bak alaiv. An wi si aal a dat wid wi uona yai.

Aks 4:12

A onggl Jiizas wan kyan siev piipl, an a fi'im niem Gad gi piipl. Nobadi els iina di uol worl kyaahn siev yu.”

Aks 9:2

an aks im fi gi im leta fi kyari go gi di liida fi di Juu dem choch a Damaskos. So dat ef im fain nobadi we a fala wa Jiizas tiich, weda man ar uman, im wuda ares dem an kyari dem bak go a Jeruusilem.

Ruoman 15:16

im mek mi wan a Krais Jiizas sorvant dem an sen mi fi wok mongks di piipl dem we a no Juu. Mi a laik wan priis, fi mi jab a fi priich di Gud Nyuuz we Gad gi mi tu di piipl we a no Juu, so dat di Uoli Spirit kyan mek dem kliin an gi dem op tu Gad laik wan sakrifais, wan sakrifais we Gad kyan api wid.

Ruoman 5:2

Aal a di gud sitn dem we wi a get fram Gad an we wi no dizorv, wi a get dem siek-a wa Jiizas Krais did du an kaaz wi biliiv. An wi wel api kaaz wi nuo fi shuor se Gad a mek wi muor an muor laik im.

Ruoman 5:21

Im du dat, so dat, jos laik ou evribadi evriwe did a ded siek-a dem sin, a siem so Gad lov, iivn duo wi neva dizorv it, wuda kaaz piipl fi liv fi eva. Siek-a Gad lov an siek-a wa wi Laad Jiizas Krais du, Gad put tingz rait bitwiin im an piipl an mek dem liv fi eva an eva.

1 Korintiyan 15:45

It aal rait dong iina Gad wod se, “Di fos man, Adam, Gad did afi mek im — Gad did afi gi im laif.” Bot di laas Adam, im a-go bi wan spirit we kyan gi piipl laif.

Ifiijan 2:18

Siek-a Krais Jiizas, di Uoli Spirit mek aal a wi kyan go tu Faada Gad.

Koloshan 2:17

Aal a dem ruul de, dem no notn laik di sitn dem we a-go kom. Dem a onggl laik wan sheda fi dem sitn de; dem a no di riil ting. Wa riil, a Krais Jiizas.

Koloshan 2:9

Uu Jiizas bi no difrant fram uu Gad bi. Eniting we mek Gad Gad, de iina Jiizas tu, an aal wen im did de iina man faam im did tan siem laik Gad.

Koloshan 3:4

A Krais Jiizas mek unu riili liv. Wen im kom bak piipl a-go si an nuo ou big an powaful im bi. Dem a-go si an nuo uu unu bi tu, kaa unu a-go de de wid im.

Iibruu 7:25

Piipl kyan kom tu Gad siek-a im an im kyan siev dem piipl de fi eva an eva. Im kyan siev dem fi eva kaaz im naa ded so im kyan aalwiez taak tu Gad fi dem.

Iibruu 9:8

Di Uoli Spirit did a shuo se di wie fi get iina di riil tent, di Uoliyis Plies neehn uopm op yet, so langks di uol tent — di wan pan ort, did stil a yuuz.

1 Piita 1:21

An a im mek unu biliiv iina Gad — Gad we did mek im kom bak alaiv an ana im. So da wie de unu wi chos iina Gad an unu wi kyan nuo fi shuor se im a-go kip im wod an du som gud sitn fi unu.

1 Piita 2:4

Wen unu a kom tu di Laad, a wan stuon we a liv unu a kom tu. Im a laik wan stuon we a liv we piipl did ton dem bak pan an se naa no yuus, bot wan we Gad pik an we wot uol iip tu Gad.

1 Piita 3:18

Kaaz Krais Jiizas sofa an ded fi di uol a wi sin wans an faraal. Wan man we du onggl wa rait, ded fi aal a uu a sina, fi bring wi tu Gad. Dem kil di badi, bot Gad mek im liv agen iina di Spirit.

1 Jan 1:8

Ef wi taak se wi neva sin wi onggl a fuul wiself an no chuut no iina wi.

1 Jan 2:23

Ef piipl ton dem bak pan di Bwai Pikni, dem no kluos tu di Faada. Bot ef piipl rispek an fala di Bwai Pikni, dem kluos wid di Faada tu.

1 Jan 5:20

Wi nuo se Jiizas Krais, Gad Bwai Pikni kom an shuo wi di riil Gad. Siek-a Jiizas, wi bilang tu Gad nou — di riil Gad we mek piipl liv fi eva an eva.

1 Jan 5:6

Jiizas Krais a di wan we did kom iina di worl fram evn. Wen im kom im did get baptaiz an den im ded pan di kraas. Im neva onggl get baptaiz, bot im ded pan di kraas tu. Di Spirit taak bout im, an di Spirit onggl taak di chuut.

2 Jan 1:9

Ef nobadi ton we fram di sitn dem wa Krais Jiizas tiich, im no av Gad iina im. Bot di sumadi we uol aan tait tu di sitn dem bout Krais Jiizas, da sumadi de av Faada Gad an im Bwai Pikni a liv iina im.

Revilieshan 1:5

An mi prie se Jiizas Krais, di wan we aalwiez taak di chuut bout Gad, wi gud an kain tu unu an gi unu piis iina unu aat. Im a di fos wan fi ded an kom bak alaiv, an a im ruul uova aal a di king dem we de pan ort. Jiizas a di wan we lov wi an a im frii wi fram wi sin dem wid im blod wen im ded pan di kraas.

Revilieshan 19:11

Wen mi luk, mi fraitn fi si evn uopm op an wan wait aas tan op im infronta mi. An di sumadi we did a raid di aas niem di Wan we Aalwiez Sorv Gad an we Evribadi Kyan Chos. Im du wa rait wen im joj piipl an waar gens im enimi dem.

Revilieshan 20:15

Enibadi uufa niem no rait dong iina di buk we Gad rait di niem a di piipl dem we a-go liv fi eva an eva, dem a-go get fling dong iina di liek a faiya tu.

Revilieshan 22:1

Den di ienjel shuo mi di riva wid di waata we gi laif. Di waata did a kom fram Gad an di Biebi Shiip chuon. Di waata did so klier it luk laik kristal.

Revilieshan 22:17

Di Spirit an di braid se, “Kom Laad Jiizas!” An aal uu ier wa de iina da buk ya, se, “Kom Laad Jiizas!” Aal uufa chuot jrai an we waahn waata fi jringk, kom kom tek di frii waata we gi laif.

Revilieshan 3:14

An den im se, “Rait da leta ya go gi di liida fi di choch we iina Leyodiisiya an tel im se: Da mesij ya a kom fram di wan we niem di Iemen, di wan we aalwiez shuo wi di chuut bout Gad, an a im Gad yuuz fi mek evriting.

Revilieshan 3:7

Im se tu mi agen se, “Rait da leta ya go gi di liida fi di choch we iina Filidelfiya an tel im se: Da mesij ya a kom fram di wan we uoli an we aalwiez du we Gad waahn im fi du. A im av King Dievid kii we shuo se im av di powa fi ruul. Wa im uopm nobadi kyaahn shot, an wa im shot nobadi kyaahn uopm.