Jan 1:14 - Di Jamiekan Nyuu Testiment

¹⁴ Nou, di wan we a di Wod ton man, im kom kom liv mongks wi, an wi si ou im big an powaful. Im a Faada Gad wan an onggl dege-dege Bwai Pikni. Faada Gad sen im kom an a di Faada mek im so big an powaful. Di Bwai Pikni shuo wi nof nof lov iivn duo wi no dizorv it, an a bier chuu sitn im shuo wi bout Gad.

Jan 1:14 ပူးပေါင်းရင်းမြစ်များ

1 Jan 4:9

Gad shuo wi umoch im lov wi wen im sen im wan dege-dege Bwai Pikni iina di worl kom ded fi wi so wi kyan get riil laif.

1 Timoti 3:16

Aal a wi nuo fi shuor se di uol a di sitn dem we Gad shuo wi, we jos big an powaful, a chuu. A chuu se: Jiizas baan a ort laik wan man. Di Uoli Spirit pruuv se Gad did tek im fi im Pikni an di ienjel dem did si im. Piipl priich tu evribadi bout im, evribadi put dem chos iina im an Gad tek im op iina evn.

Jan 1:1

Wen taim did staat, di Wod did de bout, an di Wod did de de wid Gad. Matarafak, di Wod a did Gad.

Gyalieshan 4:4

Bot wen di taim we Gad set did kom, im sen im Bwai Pikni, Jiizas. Iivn duo im a did Gad pikni, Jiizas baan jos laik mi an yu. Im did av wan mada an im did afi fala di Laa tu.

Iibruu 1:3

Wen yu luk pan Gad Bwai Pikni, yu kyan si Gad brait brait lait. An im shuo ou Gad tan, kaaz im komiin jos laik Gad. An im powaful wod mek evriting tan jos laik ou dem fi tan. So wen im don mek di wie so piipl kyan get paadn fram sin im go sidong op a evn, rait saida di wan we muo powaful dan evribadi els. An wich paat im sidong iina evn, a di tap-a-tap pozishan dat, an im get fi ruul uova evriting.

Jan 6:51

Mi a di fuud we gi laif, an we kom dong fram outa evn. Ef enibadi nyam dis ya fuud ya, dem a-go liv fi eva. Mi uona badi a di fuud we mi gweehn gi so di piipl dem iina di worl kyan liv.”

Koloshan 1:19

Eniting we mek Gad Gad, de iina Jiizas tu. Gad did api wid dat; a im mek it apm so.

1 Korintiyan 15:47

Di fos man, Gad tek dot mek fi im badi, bot di sekan man, fi im badi kom fram evn.

Ruoman 8:3

Wi aat so ful op a sin wi kudn fala aal we di Laa se an so di Laa kudn siev wi. Bot Gad du we di Laa kudn du. Gad tek im Bwai Pikni ton im iina wan man, gi im wan badi siem laik fi wi uon we wuda waahn fi sin, an sen im kom a ort fi ded fi wi sin dem.

1 Jan 4:14

Faada Gad sen im Bwai Pikni fi siev wi. Wi did si im, an wi a tel evribadi bout im.

Koloshan 2:9

Uu Jiizas bi no difrant fram uu Gad bi. Eniting we mek Gad Gad, de iina Jiizas tu, an aal wen im did de iina man faam im did tan siem laik Gad.

2 Jan 1:7

Nof laiyad tiicha de iina di worl ya nou. Dem laiyad tiicha ya a taak buot se Jiizas Krais neva kom a ort wid wan badi laik wan man. Dem piipl de a laiyad. Dem a go gens Krais Jiizas.

Revilieshan 21:3

An mi did ier wan loud vais fram di chuon a se, “Fram nou aan Gad yaad a-go de mongks piipl. Im a-go liv wid dem an dem a-go bi fi'im piipl. Gad imself a-go de wid dem an im a-go bi fi dem Gad.

Iibruu 5:5

A siem ting wid Krais Jiizas. Im neehn jos go tek op liida fi priis pozishan jos so, an big op imself — nuo, a Gad se tu im se, “Yu a fi mi Bwai Pikni; tide mi ton fi yu faada!”

Iibruu 10:5

So wen Krais Jiizas kom iina di worl im se, “A neehn sakrifais an aafrin yu did waahn, a dat mek yu get wan badi redi fi mi;

Jan 11:40

Den Jiizas se, “Duohn mi tel yu se ef yu biliiv, yu wuda si ou Gad big an powaful?”

Jan 3:16

“Kaa, yu si, Gad lov di worl so moch dat im gi op im wan dege-dege Bwai Pikni, so enibadi we chos iina im naa go ded bot a-go liv fi eva.

Jan 2:11

Nou, Jiizas wok uol iip a mirikl an da wan ya a did di fos wan outa aal a dem. Im did du it iina Kiena we de a Gyalalii. Da wie de, im shuo ou im big an powaful. An im falara dem biliiv iina im.

Jan 14:6

Jiizas ansa im an se, “Mi a di wie, mi a di chuut, mi a di wan we mek piipl kyan liv. Nobadi kyaahn go tu di Faada ef dem no go chuu mi.

Iibruu 1:5

Kaaz wich wan a di ienjel dem Gad eva se dis tu, iihn, “Yu a fi mi Bwai Pikni; tide mi ton fi yu faada”? Ar wich wan a dem im eva se dis bout, “Mi a-go ton fi'im faada, an im a-go ton fi mi Bwai Pikni”?

Jan 14:9

So Jiizas se tu im se: “Yu no nuo mi, Filip, afta mi de mongks unu fi so lang? Enibadi we si mi si di Faada tu. Ou yu fi a aks mi se, ‘Shuo wi di Faada’?

Luuk 9:32

Aal dem taim ya, Piita an Jiizas ada tuu falara dem did faas asliip. Wen dem wiek op, dem si di tuu man dem a tan op wid Jiizas an wan lait a shain roun im.

Jan 17:22

Mi gi dem di uol iip a rispek yu did gi mi so dat dem kyan kom wan jos laka ou mi an yu a wan:

Jan 3:18

Enibadi we chos iina Gad Bwai Pikni no get rait aaf, bot di piipl dem we no chos iina im, dem don rait aaf aredi, kaa dem no chos iina Gad wan dege-dege Bwai Pikni; dem no chos iina im niem.

Luuk 2:11

Di wan we a-go siev unu baan tide iina di toun we Dievid kom fram. Im a Krais, di Laad.

Iibruu 2:11

Di tuu a dem kom fram wan fambili: di wan we mek piipl gud an kliin an di piipl dem we a ton gud an kliin. So chuu dat, Jiizas no shiem fi se dem a im breda an sista dem.

2 Korintiyan 12:9

Bot im tel mi se, “Mi wi gud tu yu, an dat a aal yu a-go eva niid, kaaz wen yu wiik, a da taim de yu wi riili si fi mi powa.” So mi api fi buos bout di sitn dem we mek mi wiik. Mi wi buos bout dem so dat Krais Jiizas powa wi kova mi an protek mi.

Matyu 1:16

an Jiekob did a Juozif faada, dat a Mieri ozban — Mieri we did av Jiizas — dat a Krais Jiizas.

Koloshan 2:3

A im wan kyan mek unu andastan di chrezha dem we Gad did aid. Dem chrezha de wi mek unu waiz an kyan andastan, an riili nuo bout Gad. Kaaz a iina Krais Jiizas dem chrezha de de.

Ifiijan 3:8

Iivn duo mi no impuotant laik di res a Gad piipl dem, Gad shuo mi lov iivn duo mi no dizorv it an pik mi fi priich tu di piipl dem we a no Juu an fi tel dem bout di nais sitn dem we Krais Jiizas gi im piipl. Dem sitn de so big dat nobadi kyaahn figa dem out.

Ruoman 9:5

Di Izrel piipl, dem a di pikni fi di uol taim liida dem — di liida dem we Gad did pik an we a did di ed fi di difrant difrant chraib dem. A fi dem fambili Krais Jiizas kom fram. Mek evribadi priez Gad, Gad we ruul uova evriting, fi eva an eva. Iemen!

Luuk 2:7

an shi av ar fos pikni, wan bwai. Shi rap im op iina biebi blangkit an put im iina di baks we di animal dem nyam outa, kaaz no spies neva iina di ges ous fi dem.

Aks 13:33

Im kip im pramis we im did mek tu wi faada faada dem wen im mek Jiizas kom bak alaiv. Kaaz it rait dong iina Saam tuu se, “ ‘Yu a fi mi bwai pikni; tide tide mi ton yu faada.’

Jan 8:32

Unu gweehn nuo di chuut, an di chuut gweehn frii unu.”

Jan 17:24

“Faada, mi waahn di piipl dem we yu gi mi fi de eniwe mi de, so dat dem kyan si di uol iip a rispek we yu gi mi, kaa yu lov mi fram bifuo di worl did mek.

Jan 18:37

“So yu a king, den?!”, Pailat aks im. Jiizas ansa im an se, “ ‘King,’ a di wod yu yuuz. A dis mi did baan fa; a dis ya mek mi kom iina di worl: fi taak tu piipl bout di sitn dem we riili chuu. Evribadi we lov di chuut lisn we mi se.”

Revilieshan 19:13

Im did av aan lang jakit we suok iina blod, an dem kaal im Gad wod.