Iibruu 9:15 - Di Jamiekan Nyuu Testiment

¹⁵ A so kom im mek wan nyuu plan bitwiin Gad an piipl. So di piipl dem we Gad kaal fi bi fi im uona piipl dem, im kyan bles dem fi eva laik we im pramis fi du. Dat kyan apm kaaz im ded, an kaaz im go ded di piipl dem we sin an brok di uol taim plan we Gad did mek wid dem, dem piipl de kyan get paadn.

Iibruu 9:15 ပူးပေါင်းရင်းမြစ်များ

Matyu 19:29

An enibadi we lef dem yaad, dem breda, sista, faada, mada, pikni ar dem lan siek-a mi, dem wi get bak onjrid taim muo dan wa dem did av; plos dem a-go get fi liv fi eva tu.

Matyu 22:3

Wen a taim nou fi di dina, di king sen im sorvant dem fi go kaal aal uu im did invait, bot dem wudn kom.

Matyu 25:34

“Den di king a-go se tu di wan dem pan im rait-an-said se, ‘aal a unu we mi Faada bles, kom kom tek Gad Kindom, a fu'unu uon. Gad did fiks it op fu'unu fram im a mek di worl.

Matyu 25:36

Mi neehn av aan no kluoz an unu gi mi kluoz fi put aan. Mi did sik an unu tek kier a mi. Mi did de iina prizn an unu kom luk fi mi.’

Maak 10:17

Wen Jiizas did bout fi lef out wan man ron op tu im, go dong pan im nii an aks im se, “Gud tiicha, wa mi mos du ef mi waahn liv fi eva?”

Luuk 18:18

Wan ruula aks Jiizas se, “Mi gud tiicha, wa mi mos du fi liv fi eva?”

Luuk 22:20

A siem so wen dem don nyam, im tek di kop an se, “Da wain ya a di nyuu pramis wa Gad mek wid mi blod we a-go puor out fi unu.

Jan 10:28

Mi mek dem kyan liv fi eva, an dem naa go ded. Nobadi naa go grab an tek dem outa mi an.

Aks 20:32

“So nou mi a put unu iina Gad an, an lef unu wid di mesij bout ou Gad lov unu iivn duo wi no dizorv it. Da mesij de wi tek kier a unu an elp unu tan op chrang an gi unu aal wa Gad pramis fi gi aal a im piipl.

Ruoman 5:10

Wi a did Gad enimi, an iivn duo wi a did im enimi, Gad sen Jiizas fi ded fi wi sin dem an im mek tingz rait bitwiin wi an im. So nou dat tingz rait bitwiin wi an Gad, wi kyan nuo fi shuor se Jiizas wi siev wi wen Gad kom fi joj di worl. Wi nuo se im wi siev wi kaaz im kom bak alaiv.

Ruoman 5:6

Wen wi did wiik an neva av di powa fi elp wiself, Gad sen Jiizas fi ded fi wi — fi ded fi aal wikid piipl. Gad sen im wen im did fiil se di taim did rait.

Ruoman 5:8

Bot Gad shuo wi umoch im lov wi wen im sen Jiizas Krais fi ded fi wi, iivn duo wi a did sina.

Ruoman 6:23

So aal sin du a kaaz piipl fi ded. So ef sin a yu maasta dat a aal yu a-go get. Bot wa Gad gi wi, im gi wi fi frii — a wan gif. Wen wi biliiv iina wi Laad Jiizas Krais, wen wi an im ton wan, Gad mek wi liv fi eva an eva.

Ruoman 8:28

Wi nuo se aal di piipl we lov Gad an we Gad kaal fi tek paat iina im plan, wi nuo se Gad wok wid dem fi mek shuor se no mata wa apm, evriting wok out fi fi dem gud.

Ruoman 8:30

An di piipl we Gad maak, im kaal fi bi im piipl. An di piipl we im kaal, Gad put tingz rait bitwiin im an dem. An di piipl we Gad put tingz rait wid, Gad wi mek dem muor an muor laik im.

Ruoman 9:24

Wi a dem piipl de. Gad kaal wi, an a no jos piipl we a Juu im kaal, im kaal piipl we a no Juu tu.

2 Korintiyan 3:6

A Gad mek wi kyan sorv im an go roun go tel piipl bout di Nyuu Diil we Gad mek wid wi. Da Nyuu Diil ya no av notn fi du wid di Laa we did rait dong. Iina da Nyuu Diil ya Gad sen im Spirit gi wi; kaaz di Laa kil bot di Spirit gi laif.

Gyalieshan 3:20

Bot wen Gad did a mek im pramis tu Iebriyam, im neva sen nobadi — im kom taak tu im imself.

Ifiijan 1:7

Jiizas gi op im laif pan di kraas an fi im blod mek wan wie fi frii wi an paadn wi fram wi sin dem. A chuu Gad gud an kain mek dem sopm ya kyan apm.

2 Tesaluoniyan 2:14

Gad did kaal unu fi get siev fram di taim wen wi did kom tel unu di Gud Nyuuz. Im kaal unu so unu kyan kom get som a di ana we wi Laad Jiizas Krais av.

1 Timoti 2:5

Kaaz a onggl wan Gad de bout, an Jiizas Krais a di migl man, di onggl wan we kyan bring Gad an piipl tugeda.

2 Timoti 2:10

An sins di mesij no iina prizn mi wi gwaan sofa fi di piipl dem we Gad pik. So dat Jiizas Krais wi siev dem an so dem kyan liv fi eva wid Gad.

Taitos 1:2

An wen dem andastan Gad wod it wi gi dem sopm fi luk faawod tu. Dem wi luk fi si an nuo fi shuor se Gad wi mek dem liv fi eva. Kaaz lang bifuo di worl did mek Gad pramis fi mek wi liv fi eva, an Gad no lai.

Taitos 3:7

Gad gi wi im Spirit, so nou dat tingz aarait wid wi an im, siek-a ou im lov wi iivn duo wi no dizorv it, wi kyan get wa wi Faada Gad pramis wi; kaaz wi nuo fi shuor se im a-go mek wi liv fi eva.

Iibruu 10:34

Kaaz fi riil, unu aal sari fi di piipl dem we dem chuo iina prizn. An wen dem kom tek we unu sitn dem, unu mek dem galang wid dem, an aal a sumail sed wie, kaaz unu nuo se unu uon tingz we moch moch beta dan dem sitn de, an wa unu uon a-go laas fi eva.

Iibruu 10:36

Unu afi uol aan an pres chuu fi du wa Gad waahn unu fi du, an so get di sitn dem we im pramis fi gi unu.

Iibruu 11:13

Aal a dem piipl ya we ded did a chos iina Gad siem wie, aal wen dem neehn get iina dem an, di sitn we Gad did pramis. (Dem did si dem fram faar faar — lang bifuo dem apm an dem did wel api). An dem neehn fried fi se dem no kom fram ya-so — dat dem a farina pan ort.

Iibruu 12:24

Unu kom tu Jiizas, di wan we iina di migl we mek di nyuu plan bitwiin Gad an piipl. An unu kom tu im blod, we ron an wash we sin, an da blod de tan fi sitn wie beta dan Iebl blod.

Iibruu 13:20

Gad gi wi piis iina wi aat. Im tek di blod we mek di nyuu plan bitwiin wi an im laas fi eva, an mek di ed shepad fi di shiip dem kom bak alaiv — dat a wi Laad Jiizas Krais. Mi prie se di Gad, we du aal a dem sitn ya

Iibruu 2:14

So den, sins dem pikni ya a piipl laik evribadi els, im did ton sumadi jos laka dem, da wie de, wen im go ded, im kuda tek we di devl powa, an mek im naa no muo powa fi kil nobadi.

Iibruu 3:1

So mi breda an sista we bilang tu Gad, an we im kaal jos laik ou im kaal mi, unu fi kip unu main pan Jiizas. Im a di mesinja we Gad sen wi, an di liida fi di priis dem we go tu Gad fi wi, siek-a wa wi se wi biliiv iina.

Iibruu 6:13

Nou wen Gad did mek Iebriyam di pramis, sins nobadi no de we biga dan Gad an muo powaful dan im, im swier pan imself.

Iibruu 6:15

An afta Iebriyam wiet ou lang an gwaan chos Gad, im get wa Gad pramis im.

Iibruu 7:22

An kaaz Gad aal mek pramis wid Jiizas, dis shuo se Jiizas mek di pramis we Gad gi wi beta dan di uol wan fi shuor shuor.

Iibruu 8:13

Wen di Laad se di pramis we im mek a wan ‘nyuu’ wan, im miin se di fos wan naa yuuz agen. An ef sitn naa yuuz, an a get uol, den it suun gaan an don fa.

Iibruu 9:12

An a no guot blod ar kou kyaaf blod im tek du dis. Bot a fi im uona blod im tek go iina di Uoliyis Plies. Im go de onggl wan dege-dege taim an a it dat — im wan siev di uol a wi fram sin fi eva!

Iibruu 9:16

Kaaz wen sumadi rait wan wil, dem afi pruuv se di sumadi ded fos fi di wil av yuus.

Iibruu 9:28

wel a siem so, Krais Jiizas sakrifais imself onggl wan taim fi paadn uol iip a piipl sin. Bot wen im kom bak, a no kom im a kom fi tek we sin bot fi siev di piipl dem we a wiet fi im.

Jiemz 1:12

Ef unu uol aan chrang an no gi op wen unu a go chuu chraiyal an kraasiz we kom fi tes unu, unu a-go wel api. Kaaz wen unu tes don, Gad gweehn gi unu di kroun a laif we im pramis fi gi evribadi we lov im.

1 Piita 3:18

Kaaz Krais Jiizas sofa an ded fi di uol a wi sin wans an faraal. Wan man we du onggl wa rait, ded fi aal a uu a sina, fi bring wi tu Gad. Dem kil di badi, bot Gad mek im liv agen iina di Spirit.

1 Piita 5:10

Bot afta unu sofa likl, di Gad we lov unu so til, we no uol bak non a im lov fram unu, im sed wan we kaal unu fi enjai im powa we kyaahn don, kaaz unu a fala Krais Jiizas — im a-go fiks bak evriting fi unu agen, an di chos unu chos iina im, im a-go mek dat chrang chrang. Im a-go mek unu aat chrang tu, so unu kyan anggl di sofarieshan. An im a-go mek shuor se unu tan op chrang iina im no mata ou rof it mait-a get.

1 Jan 2:25

An wa di Bwai Pikni did pramis a dis: im se wi a-go liv fi eva.

Revilieshan 5:9

An dem sing wan nyuu sang: “Yu gud inof fi tek di ruol op buk an fi bos aaf di chring dem, kaaz yu did get kil. An yu tek yu blod bai piipl fi Gad fram evri chraib an langwij an piipl an konchri.