Iibruu 8:10 - Di Jamiekan Nyuu Testiment

¹⁰ Bot nou, afta dem die de, dis a di nyuu pramis we mi a mek wid di Izrel piipl dem, di Laad se. Mi a-go put mi laa dem iina dem ed an mi a-go rait dem dong pan dem aat. Mi a-go bi fi dem Gad, an dem a-go bi fi mi piipl dem.

Iibruu 8:10 ပူးပေါင်းရင်းမြစ်များ

2 Korintiyan 3:3

Unu shuo se unu a laik wan leta we Krais Jiizas rait, an we kom bout kaaz a di wok we wi du. Da leta ya no rait wid ingk, it rait wid Gad Spirit we kyaahn ded. An it no rait dong pan rakstuon laik wen Gad did gi Muoziz di Laa bot it rait dong iina di aat a evribadi we biliiv iina Jiizas.

1 Piita 2:9

Bot unu a wan set a piipl we Gad pik. Unu a di king priis — an Gad a di king. Unu a wan speshal piipl we Gad tek fi kom ton fi im uona piipl dem. Im pik unu so unu kyan tel ada piipl ou big im bi an ou gud im bi. Kaaz a im sed wan tek unu outa daaknis an kom put unu iina im brait brait lait.

Ruoman 11:27

An dis a wa mi pramis dem wen mi tek we dem sin.”

Jiemz 1:21

So unu fi get rid a aal a di naasi an torbl sitn dem we so nof bout di plies. Ombl unuself an tek iin di mesij we Gad put iina unu aat we kyan siev unu laif.

Taitos 2:14

Im a di wan we gi op im laif fi siev wi fram aal kain-a wikidnis an mek wi kliin so wi kuda bi im piipl; piipl we eva a chrai fi du gud.

1 Piita 1:23

Unu fi du dis, kaaz nou, unu no jos baan fram unu mada an faada we kyan ded, bot da taim ya unu baan fram Gad — an da siid ya kyaahn ded. Unu baan fram Gad siek-a im wod we alaiv fi chuu, an we a-go liv fi eva an eva.

Jiemz 1:18

Gad mek op im main fi gi wi nyuu laif, so im sen wi di chuu mesij, so wi kuda komiin laik di fos set a fuud fram di fiil fi im.

Matyu 22:32

‘Mi a Iebriyam Gad, Aizak Gad an Jiekob Gad’? Im a no Gad fi ded piipl, bot im a Gad fi uu a liv!”

Iibruu 11:16

Insted-a dat dem did a luk fi wan beta plies — wan we de a evn. So Gad no shiem fi se im a fi dem Gad, kaaz im get wan siti redi fi dem.

1 Korintiyan 6:16

Unu no nuo se enibadi we sliip wid wan uman we sel ar badi fi moni, ton paat a ar badi tu? Kaaz it rait dong iina Gad wod se, “Wen man an uman av seks, it komiin laik se dem badi ton wan.”