Iibruu 6:10 - Di Jamiekan Nyuu Testiment

¹⁰ Gad fier yu nuo. Im naa go figet wa unu du. Im naa figet ou unu shuo umoch unu lov im wen unu elp di breda an sista dem we biliiv iina Gad, an ou unu stil a elp dem.

Iibruu 6:10 ပူးပေါင်းရင်းမြစ်များ

Matyu 10:42

An enibadi we gi wan a mi ombl falara dem iivn wan kop a ais waata, kaa dem si se dem a fi mi falara, mi a tel unu dis, an mi naa lai, da sumadi de a-go get wa dem fi get.”

Matyu 20:7

“Dem ansa bak, ‘Kaaz nobadi naa gi wi no wok sa.’ “So im se tu dem se, ‘Unu gwaan go wok pan mi griep faam tu.’

Matyu 25:17

Di wan we did av tuu bag mek tuu muo tu.

Maak 9:41

Mi a tel unu dis, an mi naa lai, enibadi we gi unu wan kop a waata kaaz unu bilang tu mi, boun fi get wa dem fi get.

Jan 13:20

Fi chuu chuu mi a tel unu se, enibadi we tek iin di sumadi mi sen tek mi iin tu, an enibadi we tek mi iin tek iin di wan we sen mi kom.”

Aks 10:31

Im se tu mi se, ‘Kaaniiliyos, Gad ier yu prieya an im memba wa yu du fi puo piipl.

Aks 10:4

Kaaniiliyos faasn im yai pan di ienjel an staat kech im fried. Im aks, “A wa Laad?” Di ienjel ansa im se, “Gad ier yu prieya dem, an im si di gud sitn dem we yu du fi puo piipl. Gad memba di sitn dem we yu du, an tu im dem komiin laik wan sakrifais.

Aks 11:29

So di piipl dem we biliiv iina Jiizas mek op dem main fi elp Gad piipl we de iina Judiya. Evribadi gi wa dem kuda gi an dem gi bies pan wa dem av.

Ruoman 12:13

Ef unu choch breda an sista no av wa dem niid, unu fi shier wa unu av wid dem an unu mos eva redi fi tek iin piipl we a chravl an naa no we fi stie.

2 Korintiyan 9:1

So nou, mi nuo se mi neva afi rait unu bout di sitn dem we unu a gyada op fi sen go Judiya fi di Juu dem we staat biliiv iina Krais Jiizas.

Gyalieshan 5:13

Breda an sista, Gad kaal unu so dat unu kuda frii fram di Juu dem Laa. Bot dat no miin se unu kyan go liv eni ou unu waahn fi liv. Wa unu fi du a sorv an lov wan aneda.

Gyalieshan 5:6

Kaaz wen yu an Jiizas a wan it no mata ef yu sorkomsaiz ar yu no sorkomsaiz. Di onggl ting wa mata a dat yu chos iina im. An yu shuo se yu chos iina im wen yu shuo lov.

Gyalieshan 6:10

So wen-eva wi av di chaans fi du gud, mek wi du it. Mek wi du gud fi evribadi, wos ef dem a paat a Gad fambili an biliiv iina Jiizas laik wi.

Koloshan 3:17

An no mata wa unu du: no mata wa unu se ar du, unu fi memba se unu a di Laad Jiizas falara, so du wa unu du laik sumadi we a fala im. Wen unu a du dat, unu wi a gi Faada Gad tangks. An unu wi kyan gi im tangks, siek-a wa Krais Jiizas du fi unu.

1 Tesaluoniyan 1:3

Wi no tap prie an gi Faada Gad tangks fi unu kaaz wi memba ou unu du som gud sitn kaaz unu biliiv iina Jiizas. Wi memba ou unu wok wel aad kaaz unu lov im; an wi tingk bout ou unu neva eva tap luk tu im, an so unu kuda pres aan no mata wa.

1 Timoti 6:18

Tel dem fi du nof gud sitn — a dat dem fi rich wid, an tel dem se dem mos gi tu ada piipl an shier wa dem av.

2 Timoti 4:8

Di Laad we aalwiez fier tu evribadi wen im a joj dem, a-go gi mi wan kroun fi aal a di wok we mi du. Im a-go gi mi it wen im kom bak fi joj di worl. An a no mi wan a-go get kroun, im a-go gi evribadi we did a lang fi im kom bak.

Iibruu 10:32

Bot unu fi memba iina di paas wen unu did jos andastan Gad wie, di sofarieshan we unu did afi go chuu, bot unu uol aan an kot chuu siem wie.

Iibruu 13:16

An no figet fi du wa gud, an fi shier we unu av, kaaz Gad lov dem kain-a sakrifais de.

1 Jan 1:9

Bot ef wi si se wi sin an beg Gad paadn, wi kyan nuo fi shuor se Gad wi paadn wi an wash we aal a wi sin dem.