Iibruu 4:2 - Di Jamiekan Nyuu Testiment

² Kaaz wi did ier di Gud Nyuuz priich jos laik ou di Izrel piipl dem did ier it tu. Bot di wod we priich neehn elp dem at aal at aal kaaz dem neehn biliiv laik di res a piipl dem we did ier it.

Iibruu 4:2 ပူးပေါင်းရင်းမြစ်များ

Aks 13:46

Bot Paal an Baanabas neva fried fi tel dem di chuut. Dem se, “Wi did afi priich Gad wod tu unu fos bifuo wi kuda priich tu di piipl we a no Juu, kaaz a dat Gad tel wi fi du. Bot unu ton unu bak pan Gad mesij an se a lai wi a tel. Da wie de unu ton unu bak pan Gad. An unu tingk se unu neva gud inof fi liv wid im fi eva an eva laik wa im did pramis. So fram nou aan, wi a lef unu an go priich Gad mesij tu di piipl dem we a no Juu.

Aks 3:26

So wen Gad riez op Jiizas im sorvant, im sen im kom a unu fos fi bles unu. Im bles unu wen im kaaz unu fi ton we fram unu wikidnis.”

Ruoman 2:25

Ef unu a fala di Laa, den di fak se unu sorkomsaiz miin sopm. Bot ef unu naa fala di Laa, unu kuda sorkomsaiz likl muor, it no miin a ting — a laik se unu neva sorkomsaiz iina di fos plies.

Ruoman 3:3

Nou som a di Juu dem brok dem pramis an neva fala wa Gad wod se. So wa unu tingk? Unu tingk se kaaz dem de piipl de brok dem pramis, Gad naa go du wa im se im wuda du?

1 Korintiyan 13:3

An ef mi gi we evriting we mi av, an aal gi op mi badi so dat dem kyan bon it op, ef mi du aal a dat bot no av lov iina mi aat, it naa du mi no gud.

Gyalieshan 3:2

So a wan ting mi waahn unu fi tel mi nou: Unu get di Spirit chuu unu fala di Laa ar kaaz unu biliiv wa unu did ier?

Gyalieshan 3:8

Gad did av a plan fi mek tingz rait bitwiin im an di piipl dem we a no Juu. Ef dem biliiv iina im, im wuda siev dem an tek we dem sin. Dis a did di gud nyuuz we Gad tel Iebriyam fram wie bak wen an we rait dong iina Gad wod. Gad tel Iebriyam se, “Piipl fram aal difrant konchri a-go get bles siek-a wa yu du.”

Gyalieshan 4:13

Unu nuo se a chuu mi did sik mek mi did kom priich di Gud Nyuuz tu unu di fos taim.

1 Tesaluoniyan 1:5

Kaaz wen wi did bring wi Gud Nyuuz kom, a neehn suo-so wod wi bring kom, bot wi bring di mesij wid powa we kom fram di Uoli Spirit. An unu si se wi biliiv wid aal a wi aat se di Gud Nyuuz a chuu. Unu si aal a wa wi did du wen wi did liv mongks unu? Wi did du aal a dem sitn de fi elp unu.

1 Tesaluoniyan 2:13

An siek-a dis wi gi Gad tangks aal di wail. Kaaz wen unu tek iin Gad wod we unu did ier fram wi, unu neehn tek it laik a wod we kom fram man, bot unu tek it fi wa it bi fi chuu — Gad wod, we a wok iina aal a unu we biliiv.

1 Timoti 4:8

Kaaz jos laik ou wi eksasaiz an chrien wi badi so it wi chrang, wi afi eksasaiz an chrien wi aat fi fala Gad. Kaaz wen wi chrien wi aat fi fala Gad wi no jos get chrang bot Gad kaaz wi fi liv nou an fi eva an eva.

Iibruu 11:6

Nou ef sumadi no chos iina Gad, dem kyaahn mek im api non at aal. Kaaz enibadi we kom kom worship Gad afi biliiv fos se Gad de fi chuu, an dat im a-go du som uol iip a gud sitn fi di wan dem we luk fi im aad aad.

Iibruu 3:12

Mi breda an sista, mek shuor se non a unu no av aat we so wikid dat unu no biliiv iina di Gad we alaiv — di siem wan we mek piipl liv.

Iibruu 4:6

So, som piipl stil kyan get di piis iina dem aat we Gad pramis fi gi im piipl dem an fi res laik ou im pramis, bot di wan dem we did ier di Gud Nyuuz priich, dem neehn get dat, kaaz dem neva du wa dem did fi du.

Jiemz 1:21

So unu fi get rid a aal a di naasi an torbl sitn dem we so nof bout di plies. Ombl unuself an tek iin di mesij we Gad put iina unu aat we kyan siev unu laif.

1 Piita 1:12

Gad mek dem si se wa dem did a taak bout a neva did fi dem, bot dem did fi apm fi unu. Di sed sitn we di prafit dem did se, a di siem Gud Nyuuz di priicha dem kom gi unu. A di Uoli Spirit, we did sen dong fram evn, did gi dem di powa fi kom kom tel unu — aal ienjel did waahn andastan dem sitn ya!