Iibruu 2:17 - Di Jamiekan Nyuu Testiment

¹⁷ So siek-a aal a dem sitn de nou, im did afi ton laik im breda an sista dem we de pan ort. Im did afi ton laik dem iina evri wie. Da wie de, az Gad elpa, im kuda ton wan liida fi di priis dem we Gad kyan chos, an im wi gud an kain tu piipl kaaz im andastan we dem a go chuu. An im kuda kom tek we di piipl dem sin tu.

Iibruu 2:17 ပူးပေါင်းရင်းမြစ်များ

Ruoman 15:17

So kaaz mi an Krais Jiizas a wan, mi kyan proud a di wok we mi a du fi Gad.

Ruoman 5:10

Wi a did Gad enimi, an iivn duo wi a did im enimi, Gad sen Jiizas fi ded fi wi sin dem an im mek tingz rait bitwiin wi an im. So nou dat tingz rait bitwiin wi an Gad, wi kyan nuo fi shuor se Jiizas wi siev wi wen Gad kom fi joj di worl. Wi nuo se im wi siev wi kaaz im kom bak alaiv.

Ifiijan 2:16

Wen Jiizas ded pan di kraas, im put di tuu gruup a piipl dem tugeda an im mek tingz rait bitwiin dem an Gad. A so kom im mek dem tap iet dem wan aneda.

Koloshan 1:21

Wan taim unu did faar fram Gad. A bier wikidnis unu yuus tu tingk bout an du, an dat did mek unu an Gad ton enimi.

Iibruu 10:21

Plos wi av wan priis we a wan a di bigis wan eva, an a im ruul uova Gad ous.

Iibruu 2:11

Di tuu a dem kom fram wan fambili: di wan we mek piipl gud an kliin an di piipl dem we a ton gud an kliin. So chuu dat, Jiizas no shiem fi se dem a im breda an sista dem.

Iibruu 2:14

So den, sins dem pikni ya a piipl laik evribadi els, im did ton sumadi jos laka dem, da wie de, wen im go ded, im kuda tek we di devl powa, an mek im naa no muo powa fi kil nobadi.

Iibruu 2:16

Kaaz fi riil, a no di ienjel dem im bizniz wid so moch, bot a Iebriyam pikni pikni dem.

Iibruu 3:1

So mi breda an sista we bilang tu Gad, an we im kaal jos laik ou im kaal mi, unu fi kip unu main pan Jiizas. Im a di mesinja we Gad sen wi, an di liida fi di priis dem we go tu Gad fi wi, siek-a wa wi se wi biliiv iina.

Iibruu 3:2

Gad kaal im an im aalwiez du we Gad se im fi du, jos laik ou Muoziz did du wa Gad tel im fi du wen im did a liid di piipl dem.

Iibruu 3:5

Az wan sorvant we elp an liid Gad piipl dem, Muoziz did aalwiez du wa Gad se im fi du. Im did taak bout di sitn dem we Jiizas wuda se lietaraan.

Iibruu 4:14

Wi av wan liida fi di priis dem we a di bigis wan outa aal a di liida dem fi priis. Im go we Gad de — dat a Jiizas, Gad Bwai Pikni. So laik ou im a fi wi liida fi priis, di uol a wi we se wi biliiv iina im fi uol aan chrang chrang an gwaan biliiv siem wie.

Iibruu 4:15

Kaaz wi no av wan liida fi di priis dem we kyaahn andastan we wi a go chuu, an we no nuo se wi no so chrang wen wi fies notn we wi kaaz wi fi sin. Insted-a dat wi av wan we did get presha fi du aal kain-a rang sitn tu, siem laka wi — bot im neehn sin.

Iibruu 5:1

A pik Gad pik evri wan a di liida fi di priis dem fram mongks dem uona piipl, so dem kuda kom tu Gad fi di piipl dem. An so, dem kyan kom gi Gad aafrin an bon sakrifais gi im fi di piipl dem sin.

Iibruu 5:10

Kaaz Gad pik im fi ton di liida fi di priis dem laik Melkezidek.

Iibruu 5:2

Kaaz di liida fi di priis dem a piipl tu, im wi nuo ou fi tek taim wid piipl we no nuo beta an a du rang, sins im wiik an wi du rang tu.

Iibruu 5:5

A siem ting wid Krais Jiizas. Im neehn jos go tek op liida fi priis pozishan jos so, an big op imself — nuo, a Gad se tu im se, “Yu a fi mi Bwai Pikni; tide mi ton fi yu faada!”

Iibruu 6:20

A de-so Jiizas go tu. Im go de bifuo wi, so im kyan elp wi. An im ton wan liida fi di priis dem fi eva, jos laka Melkezidek.

Iibruu 7:26

Liida fi priis we komiin laik Jiizas, a riili di kain-a liida fi priis we wi niid. Im mek Gad api iina evri kain-a wie. Im no du notn rang; im neva sin. Nobadi kyaahn bliem im fi notn. Gad mek im difrant, im no komiin laka sina piipl. An Gad riez im op ai ai, aiya dan aal evn.

Iibruu 7:28

Di Laa gi piipl we wiik, an we wi du rang, pozishan fi ton di liida fi priis. Bot di pramis we Gad mek, we kom afta di laa, da pramis de mek di Bwai Pikni liida fi di priis dem. An im ton di wan we kyan du evriting we im sopuoz fi du fi eva.

Iibruu 8:1

Nou dis a di mien sitn wi a se: Wi av wan liida fi priis we did sidong pan di rait-an-said a Gad chuon op iina evn.

Iibruu 8:3

Evri liida fi priis afi gi aafrin plos bon sakrifais gi Gad. So da wan ya did afi av sopm fi gi Gad tu.

Iibruu 9:11

Bot Krais Jiizas kom aredi az di liida fi priis fi di gud sitn dem we a kom. An di tent we im go chuu, dat biga an beta dan di ada wan. It no niid notn els fi mek it no beta dan it bi. An a no piipl mek da wan de. Dat miin fi se a no da worl ya it kom fram.