Iibruu 12:2 - Di Jamiekan Nyuu Testiment

² Wi fi kip wi yai lak pan Jiizas. A im fos shuo wi wa it miin fi chos iina Gad, an mek wi kyan chos im iina evri wie. Im nuo se im did a-go en op wel api, so im go chuu di sofarieshan an go ded pan di kraas, an im neehn bizniz se im did a du sitn we evribadi els wuda shiem fi du. Afta dat im galang go sidong a Gad rait an.

Iibruu 12:2 ပူးပေါင်းရင်းမြစ်များ

Matyu 16:21

Fram da taim de, Jiizas staat mek im falara dem nuo se im afi go a Jeruusilem, an di elda, ed priis an Laa tiicha dem a-go mek im sofa uol iip a sitn. Dem a-go kil im, bot chrii die afta dat im a-go kom bak alaiv.

Matyu 20:28

A so it fi go, jos laik ou di Man we Gad Pik neehn kom ya fi nobadi sorv im; a kom im kom ya fi sorv piipl an fi gi op im laif so piipl kyan get frii fram dem sin.”

Maak 14:36

Im se, “Faada, mi faada, notn no de we yu kyaahn du. Siev mi fram dem torbl sofarieshan ya! Bot ef a so yu waahn it fi go, aarait den.”

Maak 16:19

Afta di Laad Jiizas don taak tu dem, Gad tek im op iina evn an mek im sidong a im rait-an-said.

Maak 9:12

Jiizas ansa dem se, “Ilaija kom fi chuu fi get evriting pan chrak. Bot wa mek unu tingk it rait dong se di Man we Gad Pik gweehn afi go chuu nof sofarieshan an piipl a-go chriit im laik se im a no nobadi?

Maak 9:24

Siem taim di bwai faada baal out, “Mi biliiv, elp mi fi biliiv muo!”

Luuk 17:5

Di apasl dem se tu di Laad se, “Laad, elp wi fi chos iina yu muor!”

Luuk 23:11

Afta Erad an im suoja dem laaf aafa Jiizas an tek im mek preke, dem jres im op iina wan priti ruob, an sen im go baka Pailat.

Luuk 24:26

Unu no nuo se di Krais afi sofa dem sitn de bifuo Gad tek im op iina evn an ana im?”

Jan 1:29

Di neks die, Jan si Jiizas a waak kom wich paat im de. Im si im an se, “Unu luk! Si Gad Biebi Shiip de! A im a di wan we a-go mash op an tek we sin fram outa di worl!

Jan 12:24

Mi a tel unu fi chuu chuu, ef wan wiit siid no jrap a grong an ded an ratn, it eva a-go tan wan wiit siid. Bot ef it get fi ded an ratn, it gruo an bier nof ada siid.

Jan 12:32

An mi, wen mi get lif op aafa di ort, mi gweehn mek evribadi kom tu mi.”

Jan 13:3

Nou, Jiizas did nuo se di Faada did gi im powa uova evriting, dat a Gad im kom fram, an dat a Gad im a go bak tu,

Jan 6:40

Kaa mi Faada waahn evribadi we si di Bwai Pikni fi uu im riili bi an we chos iina im fi liv fi eva, an a mi a-go mek dem kom bak alaiv pan di laas die.”

Jan 8:56

Unu faada Iebriyam did glad wen im si fi mi die an iej. Im si'it an did glad bout wa im si.”

Aks 2:36

“So mi waahn aal a unu Izrel piipl fi nuo an andastan dis: Gad mek da siem Jiizas ya Laad an Krais.”

Aks 3:15

Unu kil di wan we gi piipl riil laif, bot Gad mek im kom bak alaiv. An wi si aal a dat wid wi uona yai.

Aks 5:31

Gad big op Jiizas an put im fi sidong a im rait an. Im mek Jiizas wan liida an di wan we a-go siev piipl so dat di Izrel piipl wuda get di chaans fi ton we fram dem sin, shuo se dem sari, an get dem sin paadn.

Aks 5:41

So di apasl dem lef di miitn wel api kaaz Gad did tingk dem gud inof fi mek dem sofa fi Jiizas Krais.

1 Korintiyan 1:18

Kaaz di mesij bout ou Jiizas ded pan di kraas fi wi, komiin laik fuulinish tu di wan dem we no biliiv an we a-go go a el. Bot tu wi, di wan dem we siev, it shuo ou Gad powaful.

1 Korintiyan 1:23

Bot yu si wi, wi priich bout ou Krais Jiizas ded pan di kraas fi siev wi. Di Juu dem beks enitaim dem ier da mesij ya an di piipl dem we a no Juu tingk se a fuulinish wi a taak.

Ifiijan 2:16

Wen Jiizas ded pan di kraas, im put di tuu gruup a piipl dem tugeda an im mek tingz rait bitwiin dem an Gad. A so kom im mek dem tap iet dem wan aneda.

Ifiijan 5:2

Lov unu wan aneda, jos laik ou Krais Jiizas lov unu. Im gi op im laif fi wi laik wan swiit sakrifais we dem bon pan alta gi Gad.

Filipiyan 1:6

So mi nuo dis fi shuor se a Gad imself staat op da gud wok ya iina unu, an im naa go tap nou. Im a-go gwaan du we im a du iina unu laif, til Jiizas Krais kom baka ort.

Filipiyan 3:20

Bot evn a fi wi konchri. An a de-so di wan we siev wi de, Jiizas Krais wi Laad, an wi kyaahn wiet fi im kom bak!

2 Timoti 4:8

Di Laad we aalwiez fier tu evribadi wen im a joj dem, a-go gi mi wan kroun fi aal a di wok we mi du. Im a-go gi mi it wen im kom bak fi joj di worl. An a no mi wan a-go get kroun, im a-go gi evribadi we did a lang fi im kom bak.

Iibruu 1:13

Wich wan a di ienjel dem Gad eva se dis tu: “Sidong rait saida mi, a mi rait an, an kom ruul uova evriting. Sidong de til mi mek yu enimi dem kom ben dong infronta yu, mek yu kak op yu fut pan dem”?

Iibruu 1:3

Wen yu luk pan Gad Bwai Pikni, yu kyan si Gad brait brait lait. An im shuo ou Gad tan, kaaz im komiin jos laik Gad. An im powaful wod mek evriting tan jos laik ou dem fi tan. So wen im don mek di wie so piipl kyan get paadn fram sin im go sidong op a evn, rait saida di wan we muo powaful dan evribadi els. An wich paat im sidong iina evn, a di tap-a-tap pozishan dat, an im get fi ruul uova evriting.

Iibruu 10:14

kaaz im tek jos wan aafrin an mek di uol a wi we a ton kliin iina Gad yai ton jos laik ou wi fi ton fi eva an eva.

Iibruu 10:33

Som a di taim dem, dem did biit unu op an chriit unu bad infronta evribadi; wen a no dat gwaan, a jain unu jain op wid di piipl dem we dem chriit so, an tan saida dem iina fi dem chraiyal an chibilieshan.

Iibruu 11:36

So a dat apm tu som a dem kaaz dem chos iina Gad, bot yu av som ada wan — dem laaf aafa dem an tek wip biit dem. Som aal get tai op wid chien an lak op iina prizn tu.

Iibruu 12:3

Unu fi luk pan Jiizas, luk ou di wikid sina dem chriit im wel bad, bot im uol aan an pres chuu siem wie. Unu fi tingk bout dat so unu no get taiyad an waahn gi op.

Iibruu 13:13

Wi fi galang outsaida di kyamp tu im den. Mek wi sofa an tek biit op, an tek di shiem we im did sofa tu.

Iibruu 5:9

An nou dat im go chuu aal a dat, an kom ton aal a we im sopuoz fi bi, im en op ton di wan we siev piipl fi eva, so langks dem du wa im tel dem fi du.

Iibruu 7:19

Kaaz di laa kudn mek notn ton aal we it fi ton. Bot nou Gad gi wi sitn beta fi luk faawod tu an dat bring wi kluos tu im.

Iibruu 8:1

Nou dis a di mien sitn wi a se: Wi av wan liida fi priis we did sidong pan di rait-an-said a Gad chuon op iina evn.

Iibruu 9:28

wel a siem so, Krais Jiizas sakrifais imself onggl wan taim fi paadn uol iip a piipl sin. Bot wen im kom bak, a no kom im a kom fi tek we sin bot fi siev di piipl dem we a wiet fi im.

Jiemz 2:1

Mi breda an sista, sins unu se unu chos iina wi powaful Laad Jiizas Krais, unu kyaahn chriit som piipl beta dan som.

1 Piita 1:11

Dem did chrai fi fain out a uu ar a wa taim Krais Jiizas Spirit, we iina dem, did aalwiez a taak bout. Di Spirit tel dem wie bifuo da taim ya se Krais Jiizas did a go sofa. An di Spirit tel dem bout aal a di gud gud sitn dem we a-go apm afta dat tu.

1 Piita 3:18

Kaaz Krais Jiizas sofa an ded fi di uol a wi sin wans an faraal. Wan man we du onggl wa rait, ded fi aal a uu a sina, fi bring wi tu Gad. Dem kil di badi, bot Gad mek im liv agen iina di Spirit.

1 Piita 3:22

Jiizas Krais de iina evn nou an im de saida Gad rait an. Im av kanchuol uova aal a di ienjel dem, an di spirit dem we ruul an av powa.

Juud 1:21

Tan iina Gad lov an gwaan wiet fi Jiizas kom an mek wi liv fi eva, kaaz a dat im a-go du, kaaz im so gud an kain tu wi.

Revilieshan 1:11

Di vais se tu mi se, “Rait dong dem sitn ya we yu si iina wan buk an sen it go a di sevn choch dem: sen it go a Efisos, Simorna, Porgamom, Taiyataira, Saadis, Filidelfiya an Leyodiisiya.”

Revilieshan 1:17

Wen mi si di man, mi fling dong miself a im fut an no muuv — laik se mi ded. Den im chrech out im rait an, an toch mi an se tu mi se, “No bada fried. Mi a di fos an mi a di laas — evriting staat wid mi, an evriting don wid mi.

Revilieshan 1:8

Di Laad Gad se, “A mi staat evriting an evriting don wid mi. Mi a di wan we alaiv, di wan we de bout fram wie bak wen, an di wan we a-go kom baka ort. A mi a di wan we av aal a di powa.”

Revilieshan 2:8

“Rait da leta ya go gi di liida fi di choch we iina Simorna an tel im se: Di Laad Gad se: Mi a di fos an mi a di laas — evriting staat wid mi, an evriting don wid mi. Mi a di wan we alaiv, di wan we de bout fram wie bak wen, an di wan we a-go kom baka ort.”