Iibruu 11:26 - Di Jamiekan Nyuu Testiment

²⁶ Im did fiil se di sofarieshan we di wan we Gad sen fi siev piipl go chuu, wot muo dan aal a di rich sitn dem we de a Iijip. Im did fiil so, kaaz im yai did de pan di blesn dem we im did a-go get.

Iibruu 11:26 ပူးပေါင်းရင်းမြစ်များ

Matyu 10:41

Enibadi we welkom wan prafit, kaa dem si se a wan prafit dat, dem wi get di siem ting laik wa di prafit dem a-go get. An enibadi we welkom sumadi we du rait iina Gad yai, jos kaa dem si se da sumadi de du wa rait iina Gad yai, dem wi get di siem ting laik we di piipl dem we du rait iina Gad yai a-go get.

Matyu 5:12

Mek unuself api wen dem sitn de apm tu unu; jomp op an dong wid jai iina unu aat, kaa nof gud sitn pudong iina evn fi unu. A siem so dem yuus tu chriit Gad prafit dem we did de ya bifuo unu kom.

Matyu 6:1

“Wach it! No bada du wa rait onggl fi mek piipl si unu! Ef a so, unu kyan no bada luk fi get notn fram Faada Gad we de a evn.

Luuk 14:14

an den Gad wi bles yu. Dem kyaahn pie yu bak, bot yu wi get pie bak wen aal a di ded dem we du rait kom bak alaiv.”

Luuk 14:33

So, ef yu no gi op evriting, yu kyaahn ton wan a mi falara dem.

Aks 5:41

So di apasl dem lef di miitn wel api kaaz Gad did tingk dem gud inof fi mek dem sofa fi Jiizas Krais.

2 Korintiyan 12:10

So mi api se mi wiik. Wen piipl chriit mi bad, wen chobl tek mi, wen piipl kaaz mi fi sofa an wen tingz aad, mi stil api. Mi api fi sofa fi Krais Jiizas kaaz wen mi wiik, a da taim de mi chrang.

2 Korintiyan 6:10

Wi aalwiez api iivn wen wi a sofa. An iivn duo wi puor wi a mek nof piipl rich. Mi no miin se wi elp dem mek moni, dem rich kaaz dem biliiv iina Gad an siek-a wa im a go gi dem wen dem biliiv. A siem so wid wi, it komiin laik se wi naa notn bot wi riili av evriting kaaz wi biliiv iina Gad.

Ifiijan 1:18

Mi prie se Gad wi uopm unu main, so unu kyan andastan di sitn dem we im kaal wi fi tek paat iina. An mi prie se unu wi andastan se di sitn dem we Gad pramis fi gi im piipl dem big an nof.

Ifiijan 3:8

Iivn duo mi no impuotant laik di res a Gad piipl dem, Gad shuo mi lov iivn duo mi no dizorv it an pik mi fi priich tu di piipl dem we a no Juu an fi tel dem bout di nais sitn dem we Krais Jiizas gi im piipl. Dem sitn de so big dat nobadi kyaahn figa dem out.

Filipiyan 3:7

Bot aal a dem sitn de wa mi yuus tu dipen pan fi mek mi rait iina Gad yai, dem komiin laik gyaabij nou. Dem no mek no sens nou dat mi an Krais Jiizas kluos.

Iibruu 10:33

Som a di taim dem, dem did biit unu op an chriit unu bad infronta evribadi; wen a no dat gwaan, a jain unu jain op wid di piipl dem we dem chriit so, an tan saida dem iina fi dem chraiyal an chibilieshan.

Iibruu 10:35

So no bada gi op. Gwaan uol tait, kaaz siek-a dat unu a-go get som blesn de!

Iibruu 11:6

Nou ef sumadi no chos iina Gad, dem kyaahn mek im api non at aal. Kaaz enibadi we kom kom worship Gad afi biliiv fos se Gad de fi chuu, an dat im a-go du som uol iip a gud sitn fi di wan dem we luk fi im aad aad.

Iibruu 13:13

Wi fi galang outsaida di kyamp tu im den. Mek wi sofa an tek biit op, an tek di shiem we im did sofa tu.

Iibruu 2:2

Kaaz ef di mesij we di ienjel dem did gi, ton out chuu, an ef aal a di piipl dem we du rang, an dem we neva lisn, did get ponish laik ou dem fi get ponish,

1 Piita 1:11

Dem did chrai fi fain out a uu ar a wa taim Krais Jiizas Spirit, we iina dem, did aalwiez a taak bout. Di Spirit tel dem wie bifuo da taim ya se Krais Jiizas did a go sofa. An di Spirit tel dem bout aal a di gud gud sitn dem we a-go apm afta dat tu.

1 Piita 4:14

Ef piipl shiem unu, an se aal kain-a bad sitn tu unu kaa unu a fala Krais Jiizas — a bles unu bles. Kaaz a di powaful Spirit — Gad Spirit, kom tan wich paat unu de.

Revilieshan 2:9

Mi nuo bout aal a unu sofarieshan an ou unu puor — bot unu riili rich. An di piipl dem we se dem a Juu bot dem a no Juu, mi nuo ou dem a tel aal saat a lai an a chat bad bout unu. Dem a wan gruup a piipl we bilang tu Sietan.

Revilieshan 3:18

Dis a wa mi tingk unu shuda du, bai guol fram mi, guol we bon iina faiya fi get out aal wa no fi iina it. Ef unu bai da guol de, unu wuda riili get rich. Bai wait kluoz fram mi so unu kyan kova op unuself. Da wie de unu na'afi shiem kaaz unu na'av aan no kluoz. An bai yai jrap fram mi tu fi jrap iina unu yai dem so unu kyan si.