Iibruu 10:36 - Di Jamiekan Nyuu Testiment

³⁶ Unu afi uol aan an pres chuu fi du wa Gad waahn unu fi du, an so get di sitn dem we im pramis fi gi unu.

Iibruu 10:36 ပူးပေါင်းရင်းမြစ်များ

Matyu 10:22

An evribadi a-go iet unu kaaz unu fala mi. Bot enibadi we uol aan tait an tan op chrang til di sofarieshan don, Gad a-go siev dem piipl de.

Matyu 12:50

Kaaz enibadi we du wa mi Faada iina evn waahn dem fi du, a dem a mi breda, sista an mada.”

Matyu 21:31

“So tel mi, wich wan a dem du wa im faada waahn?” Dem se, “Di fos wan.” So Jiizas se tu dem se, “Mi tel unu dis, an a chuu mi a taak, taks kalekta an seks woka a-go go iina Gad kindom bifuo unu!

Matyu 24:13

Bot aal uu eng aan an tan op chrang no mata wa, a dem a-go get siev.

Matyu 7:21

“A no evribadi we kom tu mi an kaal ‘Laad, Laad,’ a-go get fi kom ton wan a dem we Gad ruul uova yu no; onggl di piipl dem we du wa mi Faada iina evn waahn.

Maak 3:35

Enibadi we du wa Gad se dem fi du a mi breda, sista, an mada dat.”

Luuk 21:19

Uu tan op chrang fi mi no mata wa, wi siev dem laif.

Luuk 8:15

Di wan dem we jrap pan gud grong, a di piipl dem uufa aat riili gud. Dem ier di wod an uol aan pan it. Aal wen aad taim kom, dem stil bier fruut.

Jan 7:17

Ef sumadi mek op dem main fi du wa Gad waahn dem fi du, dem a-go fain out ef a riili Gad gi mi wa fi tiich ar ef a mi jos a taak fi miself.

Aks 13:22

Gad tek we di king pozishan fram Saal an gi Dievid. Gad taak gud bout Dievid, im se, ‘Mi si se Dievid, Jesi bwai pikni a wan man we wi tingk ou mi wuda tingk an we wi du evriting we mi waahn im fi du.’

Aks 13:36

“Kaaz afta Dievid du we Gad did waahn im fi du mongks fi'im piipl we im gruo op wid, im ded an dem beri im mongks im faada faada dem griev an im badi ratn.

Ruoman 12:12

Wail unu wiet fi di sitn dem we Gad pramis fi gi unu, unu mos api kaaz unu nuo se unu a-go get it. Wen chobl tek unu, unu no fi gi op bot unu mos gwaan uol chrang an unu fi prie aal di taim, neva tap.

Ruoman 12:2

No mek di piipl we de iina di worl tel unu ou fi liv. Insted-a dat mek Gad chienj di wie ou unu tingk so dat im kyan chienj di wie ou unu a liv. Da wie de unu wi nuo aal a wa Gad waahn unu fi du — unu wi nuo we rait, unu wi nuo wa mek Gad api an unu wi nuo ou im waahn unu fi liv.

Ruoman 2:7

Yu av som piipl we a liv rait an we aalwiez a du gud fi ada piipl. Dem piipl de waahn Gad fi taak gud bout dem. Dem waahn im fi big dem op an mek dem liv fi eva. An a dem de piipl de Gad a-go mek liv fi eva an eva.

Ruoman 8:25

Bot ef wi no get aal we wi a luk fi get yet, wi wi sidong an wiet an no muuv til wi get it.

1 Korintiyan 13:7

Piipl we av lov iina dem aat neva eva gi op no mata wa apm tu dem an dem neva tap biliiv iina Gad. Piipl we av lov iina dem aat chos Gad fi tek kier a dem an dem wi go chuu eniting we riich dem an no fos ar komplien.

Gyalieshan 6:9

So mek wi no get taiyad fi du gud, kaaz ef wi no gi op, wen Gad redi, im wi mek wi riip nof gud sitn.

Ifiijan 6:6

Unu fi du wa dem tel unu se unu fi du. Du it no onggl kaaz dem a wach unu an unu waahn dem fi tingk se unu a du gud. Bot du it kaaz unu a Krais Jiizas sliev, an unu nuo we Gad waahn unu fi du.

Koloshan 1:11

An wi prie se Gad wi tek fi im powa an mek unu wel chrang, so unu kyan uol aan no mata wa, an no grombl grombl, bot a sing sang iina unu aat

Koloshan 3:24

Kaaz unu nuo se unu a-go get wa di Laad pramis fi gi unu fi aal a di sitn dem we unu du. Kaaz a im unu riili a wok fa.

Koloshan 4:12

Epafras, we kom fram mongks unu, an we a wan a Krais Jiizas sorvant dem, im se oudi tu. Im eva a prie fi unu wid aal a im aat. Im prie se unu wi tan op chrang iina Gad an no tap chos iina im. Im prie se unu wi biliiv iina Gad so til nobadi kyaahn mek unu tap chos iina im. An im prie aad se unu wi nuo fi shuor wa Gad waahn unu fi du an fi biliiv.

1 Tesaluoniyan 1:3

Wi no tap prie an gi Faada Gad tangks fi unu kaaz wi memba ou unu du som gud sitn kaaz unu biliiv iina Jiizas. Wi memba ou unu wok wel aad kaaz unu lov im; an wi tingk bout ou unu neva eva tap luk tu im, an so unu kuda pres aan no mata wa.

Iibruu 11:39

Di uol a dem chos iina Gad an so im did api wid dem. Bot non a dem stil neehn get di sitn dem yet we im did pramis.

Iibruu 12:1

So laik ou wan kroud a piipl de aal bout roun wi, an dem shuo wi aredi ou fi chos iina Gad, wi afi dash aaf evriting we a sluo wi dong iina da ries ya. Di sin we tai op wi fut iizi iizi, wi afi dash dem aaf man, an ron di ries we de infronta wi an no wier out pan di wie.

Iibruu 13:21

wi gi unu aal a di gud sitn dem we impuotant fi go du wa im waahn unu fi du. Mi prie tu se im wi mek wi ton aal a wa im waahn wi fi ton. An dis wi apm kaaz im wi mek Krais Jiizas du dat. Di piipl dem fi priez Krais Jiizas fi eva an eva an lif im op. Iemen.

Iibruu 6:12

Wi no waahn unu fi get liezi an no waahn du notn. Nuo! unu fi tan laik di piipl dem we biliiv iina Krais Jiizas. Dem no gi op, an so dem get wa Gad did pramis fi gi dem.

Iibruu 6:15

An afta Iebriyam wiet ou lang an gwaan chos Gad, im get wa Gad pramis im.

Iibruu 6:17

A siem so Gad did waahn shuo di piipl dem we im pramis klier klier se im riili a-go gi dem wa im pramis dem, an im naa go chienj im main, so im no jos pramis dem, bot im swier pan tap a dat.

Iibruu 9:15

A so kom im mek wan nyuu plan bitwiin Gad an piipl. So di piipl dem we Gad kaal fi bi fi im uona piipl dem, im kyan bles dem fi eva laik we im pramis fi du. Dat kyan apm kaaz im ded, an kaaz im go ded di piipl dem we sin an brok di uol taim plan we Gad did mek wid dem, dem piipl de kyan get paadn.

1 Piita 1:9

Unu wel api kaaz Gad a siev unu suol kaaz unu chos iina im.

1 Jan 2:17

Di worl an aal a di wikid sitn dem iina it a go we bot aal a di piipl dem we du we Gad waahn dem fi du wi liv fi eva.

Revilieshan 13:10

Ef nobadi fi get lak op iina prizn, a dat a-go apm tu dem. Ef nobadi fi get kil wid di suod, dem a-go get kil wid di suod. Dat miin se Gad piipl dem mos tan op chrang an no mek notn tap dem fram chos iina Gad no mata wa apm.

Revilieshan 14:12

So Gad piipl we du we im se afi tan op chrang an gwaan chos Jiizas.”