Filipiyan 4:8 - Di Jamiekan Nyuu Testiment

⁸ Mi breda an sista, wan muor ting mi waahn se tu unu. Unu si eniting we chuu, eniting we unu kyan rispek, eniting we rait, eniting we gud an kliin, eniting we piipl kyan luk pan an fiil gud bout, eniting we piipl kyan taak gud bout, eniting we fit fi get big op — a dem sitn de unu fi set unu aat an main pan aal di taim.

Filipiyan 4:8 ပူးပေါင်းရင်းမြစ်များ

Matyu 22:16

So dem sen som a fi dem falara plos Erad falara dem go a Jiizas. Dem se tu im se, “Tiicha, wi nuo se yu a taak chuut an yu riili a tiich di rait sitn bout wa Gad waahn. Yu no kier bout wa piipl tingk, kaa yu no paashal.

Maak 6:20

kaaz Erad did wel rispek Jan an protek im, kaaz im nuo se Jan a did wan gud man we aalwiez du wa rait. Erad did lov fi lisn tu Jan, iivn duo evritaim im ier im, wa Jan se kanfyuuz im muor an muor.

Luuk 16:15

Jiizas se tu dem se, “Unu aalwiez mek unuself luk gud tu ada piipl, bot Gad nuo unu aat. Yu si aal dem sitn we piipl lov, Gad naa no yuus fi dem.

Luuk 2:25

Nou yu did av wan man iina Jeruusilem niem Simiyan. Simiyan a did wan gud sumadi we riili did a liv fi Gad. Im did a wiet fi Gad frii Izrel fram sofarieshan an di Uoli Spirit did de wid im.

Luuk 23:50

Yu did av wan man we niem Juozif, we bilang tu di gruup we mek op a di ed priis an di Laa tiicha dem. Im did a wan gud an anis man,

Jan 7:18

Sumadi we taak fi imself a luk big op fram piipl, bot sumadi we wok so dat di wan we sen im get big op, a gud sumadi an wa im taak a chuu sitn. Dem no lai.

Aks 10:22

Di man dem ansa im se, “A Kaaniiliyos, wan ed man fi onjrid suoja sen wi. Aal a di Juu dem tingk im a gud sumadi an dem shuo im nof rispek. Wan a Gad ienjel tel im fi sen fi yu so im kyan ier wa yu av fi se.”

Aks 22:12

“Wan man niem Ananaiyas, we riili worship Gad an liv di wie ou di Laa se wi fi liv an we aal di Juu we liv de taak gud bout

Aks 6:3

So breda an sista unu pik sevn man fram mongks unu. Evribadi mos si se dem mek di Uoli Spirit kanchuol dem laif an dem wel waiz. Wi wi put dem inchaaj a da wok ya,

Ruoman 13:13

So mek wi liv ou wi nuo wi fi liv, mek wi liv laik piipl we iina di lait, no laik piipl we iina di daak. Wi no fi tek paat iina no wail seks paati an wi no fi jringk til wi jongk. Wi no fi a sliip roun sliip roun ar a tek paat iina no kain-a seks sin. Unu no fi lov fait an unu no fi red yai fi ada piipl tingz.

Ruoman 13:3

Di piipl we du wa rait, dem no afi fried a di piipl we a ruul uova dem. A jos di piipl dem we a du we rang fi fried. So, ef unu no waahn fi fried a di piipl we a ruul uova unu, jos du wa rait an wen unu du dat dem wi big unu op.

Ruoman 14:18

Enibadi we liv an sorv Krais Jiizas da wie de, wi kaaz Gad fi api wid dem an piipl wi rispek dem fi wa dem du.

Ruoman 2:29

Di piipl dem we a riili Juu a di wan dem we Gad tek fi bi im piipl kaaz dem lou di Uoli Spirit fi chienj dem aat, no kaaz dem sorkomsaiz ar nuo di Laa. Dem de piipl de, Gad a-go big op, iivn ef ada piipl naa big dem op.

1 Korintiyan 4:5

So no bada joj nobadi til di taim rait. Wiet til di Laad kom. Aal a di rang sitn dem we piipl du an chrai fi aid, im wi mek evribadi nuo bout dem an im wi shuo wa riili de iina piipl aat. An den Gad wi big op di wan dem we du di wok we im gi dem an we du it gud.

2 Korintiyan 13:7

Nou wi prie tu Gad se unu wi no du notn we rang, no kaaz wi waahn fi mek wiself luk gud bot kaaz wi aalwiez waahn unu fi du we rait. Wi aalwiez waahn unu fi du we rait iivn ef it luk laik se wi did fiel di tes.

2 Korintiyan 6:8

Som piipl big wi op ada piipl chrai fi put wi dong. Som piipl rispek wi ada piipl chrai fi shiem wi. Som piipl se wi a laiyad bot wi aalwiez tel di chuut.

2 Korintiyan 8:18

A no jos Taitos a kom, wi a sen wan a wi breda dem wid im. Da breda de, im priich Gad wod, an aal a di choch piipl dem rispek im siek-a di gud wok we im a du.

2 Korintiyan 8:21

Wi a du evriting fi mek shuor se wi diil wid dem rait, kaaz wi no jos waahn fi mek Gad api, bot wi waahn evribadi fi api wid di wok we wi a du.

Gyalieshan 5:22

Bot Gad Spirit kaaz fi im piipl fi lov evribadi an aalwiez api no mata wa. It kaaz dem fi liv gud wid piipl, no fi lov fait an fi aalwiez tek taim wid ada piipl. Di Spirit mek dem kain an mek dem eva a du gud fi piipl. It kaaz dem fi bi sumadi we piipl kyan chos.

Ifiijan 4:25

So den, unu fi tap tel lai. Mek aal a wi taak di chuut tu wi wan aneda, kaaz di choch komiin laik wan badi, an aal a wi a paat a it.

Ifiijan 5:9

(kaaz di sitn dem we kom fram di lait, a onggl wa gud, rait an chuu).

Ifiijan 6:14

Unu wi tan op chrang wen unu faasn di chuut roun unu laik wan belt roun unu wies, wen unu du di sitn dem we rait iina Gad yai dem kyan protek unu laik ou suoja aiyan ves protek dem ches.

Filipiyan 3:1

Mi breda an sista, dem ya a di laas sitn dem we mi av fi se. Mi prie se Krais Jiizas wi mek unu wel api. A no notn fi mi rait tu unu bout di siem sitn dem uova an uova agen. Matarafak, dem wi elp kip unu sief tu.

Koloshan 4:5

Unu fi gwaan laik se unu av sens wen unu roun piipl we a no Krais Jiizas falara. No wies no taim, evri chaans unu get unu fi du dat.

1 Tesaluoniyan 4:12

Da wie de, ou unu liv wi mek piipl we no biliiv an chos iina Gad rispek unu an unu no afi luk tu nobadi fi notn niida.

1 Timoti 2:2

Prie fi enibadi we ron wan konchri an fi piipl we iina powa. Prie fi dem so wi kyan liv iina piis an kwaiyat, biyiev laik ou wi fi biyiev an worship Gad.

1 Timoti 3:11

A siem so di uman dem mos liv dem laif so piipl wi rispek dem. Dem no fi susu-susu, lai ar taak bad bout piipl. Insted-a dat dem fi kyan kanchuol demself, no go uova buod wid notn an piipl fi kyan chos dem.

1 Timoti 3:4

Im fi nuo ou fi ron im ous an im pikni dem fi lisn wa im se an shuo rispek.

1 Timoti 4:12

No mek nobadi put yu dong kaaz yu yong. Mek shuor yu liv rait so piipl kyan fala yu: lov piipl, chos iina Gad an liv wan kliin laif an no sin.

1 Timoti 5:10

Ef shi a-go go pan di lis, piipl mos nuo ar fi di gud sitn dem we shi du. Dem mos nuo ar kaaz shi bring op ar pikni dem gud, aalwiez uopm op ar yaad tu piipl an shi wash di fut a di biliiva dem. Dem mos nuo ar kaaz shi elp enibadi we niid elp an kaaz shi du aal kain-a gud sitn.

1 Timoti 5:2

Di uol uman dem, yu fi taak tu dem laik ou yu wuda taak tu yu mada an di yongga uman dem taak tu dem laik dem a yu sista. Du dis wid wan kliin aat.

Taitos 1:8

Insted-a dat, di elda mos uopm op im ous tu piipl, lov du gud sitn an im aat mos kliin. Im mos fier tu evribadi an im mos nuo ou fi kanchuol imself an du we im nuo iina im main rait an no fala wa im badi waahn fi du.

Taitos 2:14

Im a di wan we gi op im laif fi siev wi fram aal kain-a wikidnis an mek wi kliin so wi kuda bi im piipl; piipl we eva a chrai fi du gud.

Taitos 2:2

Tel di uolda man dem se dem no fi go uova buod wid notn. Dem fi kanchuol demself an liv so piipl kyan rispek dem. Di uolda man dem fi eva chrang iina wa dem biliiv, aalwiez shuo lov an neva gi op.

Taitos 2:7

Yu, Taitos, mek shuor se yu eva a du gud sitn an liv rait, so piipl wi si ou yu liv an fala wa yu du. Wen yu tiich mek shuor se yu taak di chuut an tek it siiros.

Taitos 3:14

Di piipl we biliiv iina Jiizas an we iina Kriit mos lorn fi wok aad an du gud sitn, so dat dem wi aalwiez av inof, so dem kyan gi piipl we niid it.

Iibruu 11:2

A dis mek Gad did api wid wi faada faada dem.

Iibruu 13:18

Prie fi wi. Wi shuor se wi kanchens naa bada wi an wi waahn liv rait iina evri wie.

Jiemz 1:27

Di kain-a wok we gud an kliin iina Faada Gad yai a dis: elp di pikni dem uufa faada an mada dem ded an we a sofa, an di uman dem we ozban ded an we a sofa tu, an kip we fram di wikid sitn dem we iina di worl.

Jiemz 3:17

Bot unu si di piipl dem we Gad mek waiz, fos ting bout dem, dem aat kliin, dem a no waar-buot, dem kier bout ada piipl, an dem no aad-iez. Dem kwik fi paadn piipl we du dem rang, an dem aalwiez du we rait. Dem no paashal an dem a no ipokrit niida.

1 Piita 1:22

Nou dat unu kliin op unu suol kaaz unu fala di riil mesij we dem tiich bout Krais Jiizas, unu kyan riili lov unu wan aneda. Unu mos aalwiez riili lov unu wan aneda wid aal a unu aat.

1 Piita 2:12

Unu mos liv gud an liv rait mongks di piipl dem we no biliiv iina Jiizas, so iivn duo rait ya nou dem a se aal kain-a bad sitn bout unu, an a se a bier wikidnis unu du, dem wi si se a gud sitn unu a du an priez Gad wen im kom baka ort kom big op uu fi get big op an ponish uu fi get ponish.

1 Piita 4:8

An muo dan notn els unu fi riili lov unu wan aneda aal di taim an wid aal a unu aat. Kaa lov kova op sin, no mata ou it mait-a uol iip.

2 Piita 3:1

Fren, dis a mi sekan leta tu unu nou. Mi rait di tuu leta dem fi memba unu bout dem sitn ya, so unu kyan tingk bout wa gud an kliin.

1 Jan 3:18

Mi pikni, wi fi mek shuor se wen wi se wi lov, wi riili lov fi chuu, an dat it shuo iina we wi du an a no jos suo-so wod.

1 Jan 3:3

Evribadi we biliiv se Jiizas a-go mek dem jos laik imself, kip we fram sin, jos laik ou Jiizas kip we fram sin.

1 Jan 4:1

Mi fren, no biliiv iina evri spirit we se dem kom fram Gad. Wa yu fi du a tes di spirit dem fi si ef dem kom fram Gad fi chuu, kaaz a nof nof faalz prafit gaan out aal uova di worl.